Read turkana Akitoodikinet 20 Bible Online

Akitoodikinet 20 - turkana bible

Akitoodikinet 20

¹Sodi ataanyunga ayong emalaikat etiyaun anadis, etingit anakan keng engaaret a adui ana nyesaluni ka erikot loapotion.

²Kirum emalaikat ngolo emun loapolon, emun lokolong ngorot, lo erai Ekipe kori lo erai ekiro keng eche Esiitan, sodi toen ngesi ngikaru 1,000.

³Tachakak emalaikat ngesi nadui na nyesaluni, togol adui sodi kimulelea, nyiingala ngesi ngibukui nabo jik tanang ngikaru 1,000 edaun. Nakaneni ani adaunet a ngikaru kangulu, talachakinae ngesi mono wadio.

⁴Sodi ataanyunga ayong ngikicholongo a apolou a Akuj, ani lu ebooyete kaneni, nakinae agogongu na iriraata. Ataanyunga ayong tani ngitai alu kolong atuborio ngakies kotere ni iruorotor ngakiro na iteni na edodiuni Yesu ka akiroit na a Akuj. Nyilipa kesi etiengit kori ekisikwaane keng losubuna, kori nyemacharikina kesi tani emachar a etiengit loreetin kech kori nakan kech. Toyarut kesi topolokis kesi aapei ka Kiristo ngikaru abunget apei.

⁵(Nyeyaruna ngikatoak luche tanang ngikaru lu eraakasi 1,000 edaunosi). Ayarunet na ekingaren eyaruneta ngikatoak ngesi naga.

⁶Epiaritae lu epete nayarun na ekingaren a ngikatoak, elakarosi lokojokon noi. Emam akitu na a ngaarei agogongu anikech. Eliworosi kesi ngimurok a Akuj ka lu a Kiristo, nabo epolokinete kesi ka ngesi aapei a ngikaru 1,000.

⁷Ani adaunet a ngikaru alu eraakasi 1,000, elachakinio Esiitan ani eenikinitae,

⁸elosi ngesi kingala ngibukui lu epetakina nakwap daang, na eraakasi Gog ka Magog. Echunakini Esiitan kesi wapei kotere ejie, elalakearosi kesi totiata asinyen na eyei lokwaas a anam.

⁹Topetakin kesi nakwap wadaang sodi kiriama adakar a ngitunga a Akuj ka ere lo emina ngesi. Nakaneni totiyaun akim anadis sodi tomunya kesi.

¹⁰Dio tachakakinae Ekipe lo engalae kesi nanam na a akim ana itonoki akibirit, nisek achakakinio etiengit ka ekadwaran lokaliokon, sodi toboliare kesi akwaar ka apaaran, nakajik.

¹¹Sodi ataanyunga ayong ekicholong lo apolou akwang topolot, ataanyunga tani lo ebooyi alokicholong kangolo. Tongopiasi akwap ka adis alongaren keng nakaneni nyeanyungara nabo jik.

¹²Sodi ataanyunga ayong ngikatoak, luuchik ka luapolok ewaasi daang aapei alongaren ekicholong a apolou. Tangaarae ngakitabea, sodi tangaarae nabo akitab ache, akitab na a akiyar. Kirirae ngikatoak itemem ka na asubete kesi, loger lo igiritere nakitabea.

¹³Dio kipud anam ngikatoak lu ayakasi tooma keng. Kipudut akitu ka akwap a ngikatoak ngikatoak lu atingito. Sodi kirirae daang itemem ka na asubete kesi.

¹⁴Dio tachakakinae akitu ka akwap na eyakasi ngikatoak nanam na a akim. (Anam na akim naga ngesi erai akitu na a ngaarei).

¹⁵ Itwaan cha daang ni nyerukaunio ekiro keng igiritae nakitab na a akiyar, tachakakinae nanam na a akim.