Read turkana Akitoodikinet 21 Bible Online

Akitoodikinet 21 - turkana bible

Akitoodikinet 21

¹Dio ataanyunga ayong adis nakitetet ka akwap nakitetet. Tongopia adis na a ekingaren nabo topuripuriakin anam.

²Sodi ataanyunga ayong ere lo italeunitoe, Yerusalem lokitetet, etiyaun anadis ani a Akuj, esubakinitae eriyan, ekoni ateran na enapit esaki aanyun ka lokile keng.

³Eira ayong etoil lo eruoro alokicholong alo apolou irema ebala, “Kingolik a! Eboikin Akuj kiding ngitunga. Iboikin kiding kech, eliworosi kesi ngitunga keng, eliwor ngesi Akuj kech.

⁴ Emiatari ngesi ngakiyo daang anakonyen kech. Engopi akitu jik, engopi apipilu ka akigoro ta ariaba. Angopia eboyor lokolong ngorot.”

⁵Dio tolim lo ebooiy alokicholong a apolou tama, “Kingolik a! Etiliwo tokona ayong daang ngakitet!” Katolimok nabo ngesi ayong tama, “Kigirak nugu, kainyo eraakasi ngakiro nugu ngaka iteni nanupat.”

⁶Sodi tolim ngesi tama, “Arumor! Ayong ngesi lo ekingaren ka lo a esal, nabo arai akisiakinet ka asalun. Ainakini ayong itwaan daang ni enyamit akure, ngakipi na nyetachio na a elelea alo a akiyar.

⁷Itwaan cha daang ni epiu, eanyuni nugu, Aliwor ayong Akuj keng, dio toliwor ngesi lokookang.

⁸ Nakaneni ngitunga lukakurianak ka lu elimonorosi ka lu ibatara Anakuj ka lukaarak ka lumalaae ka lu emuroote ka lu ilipito ngakujo nasubuna ka lukaliokok daang, ni erai akwap kech ngesi anam na enoki akim ka akibirit, na erai akitu na a ngaarei.”

⁹Epei a ngimalaikae a lukan-kaarei alu atingito ngatubwae na eleleba ngakiro nakan-kaarei nakesiak na a esal, bu nikang tama, “Bua kedodik ateran, aberu a Imesek a Akuj.”

¹⁰Katorik ayong etau a Akuj, kayaa emalaikat kidiama emoru lotikooyen. Kedodik ayong Yerusalem, ere lo italeuno, epuduni anadis ani a Akuj,

¹¹nabo etokwaikwai akwangis a Akuj. Ekwaikwai ere ngolo loger a amoru anakaalan a ngaropiyae, na ikoni amoru nakamalamalan enyaritae alumas nabo alilii loger a akiyo.

¹²Apolot awas keng awoi noi, ayakasi ngidorin ngitomon ka ngiarei lu apolokinito ngimalaikae ngitomon ka ngiarei. Egiritae ngirora a ngitela a lutomon ka ngiarei a Ngisirael lodorin.

¹³Ayakasi ngidorin nguuni lowaitin daang, ayakasi nguuni kide, ayakasi nguuni kwap, ayakasi nguuni kuju, toyakas nguuni too.

¹⁴Adukitoe awas a ere kangolo kidiama ngamoru ngatomon ka ngaarei na esiakinitere akiduk. Egiritae ngamoru nguna ngirora ngitomon ka ngiarei a ngimeanara a Imesek.

¹⁵Atingit emalaikat lo kiruoro ka ayong asuat nakapis na a egolit, nakitemiet ere ka ngidorin keng, ta awas keng.

¹⁶Ikwaan ngiwaitin a ere daang pulure, awoyau ka aurianut. Kitem emalaikat ere a asuat anakapis keng anakitemiet, arai awoyau keng ngakilomitae ngabunge ngaarei ka ngamiae ngoomwon alowaitin ka kidiama ta kwap.

¹⁷Kitem emalaikat awas dang, arai awoyau keng na alokidiama ngimitae ngitomwon-kapei a akitemiet ana etemio ngesi.

¹⁸Adukitoe awas a ngamoru anaarengak kaalak a ngaropiyae, nakaneni adukitoe ere a egolit bon, alo amalimali loger a akiyo.

¹⁹Ngamoru na isiakinitere akiduk awas a ere, asiritoe a ngamoru anagelagelae ana elalak ngaropiyae. Amoru na ekingaren isiakinitere akiduk awas arai nakamalamalan enyaritae alumas arai na a ngaarei apus-arengan, arai na a ngauni amoru nakaagongon noi, arai na a ngoomwon napus-aliban,

²⁰enyaritae na a ngikan saridoniki, arai na ngikan-kapei naarengan, arai na a ngakan-kaarei nanyang, enyaritae na a ngakan-kauni berili, enyaritae na a ngakan-koomwon topas, enyaritae na a ngatomon kirisopiraso, enyaritae na a ngatomon ka apei yasinito, tanyaritetei na a ngatomon ka ngaarei amesisto.

²¹ Ani ngidorin lutomon ka ngiarei araakasi ngamoru nakamalamalak elalak ngaropiyae enyaritae ngalului ngatomon ka ngaarei. Asubunitae ekidor epei analulu a apei. Arai erot lo a ere egolit bon, atakani yaaye kona a akiyo.

²²Nyeanyungara ayong akai a Akuj alore, kainyo akai a ere kangolo ngesi Ekapolon Akuj Naationon Noi ka Imesek.

²³Nyesakit ere ngolo akolong kori elap lu inwakunete, kainyo akwangis a Akuj ngesi inwakunit, nabo Imesek ngesi erai ataa keng.

²⁴Eloose ngibukui kotere akicha keng, nabo eyaunete ngikarikok a ngakwapea ebari kech nikeng.

²⁵Engaarosi ngidorin a ere apaaran daang, nyegolio jik kainyo emam akwaar kaina.

²⁶Eyaunete kesi apolou ka ebari a ngibukui alu nyerai Ngiyaudi tooma ere.

²⁷ Nakaneni emam ibore nia nginyas ni elomari tooma ere ngolo, kori itwaan daang ni esubi ngakiro na a ngileech ka ni iruoro alioko. Ngulu igiritae ngirora kech nakitab na a akiyar na a Imesek, kesi elomarete lore.