Read turkana Akitoodikinet 22 Bible Online

Akitoodikinet 22 - turkana bible

Akitoodikinet 22

¹Abu emalaikat kedodik ayong angolol a ngakipi ana a akiyar emalimali loger a akiyo, eleleunit alokicholong a apolou a Akuj ka loa Imesek.

²Kitoru kiding erot lo a ere. Ayei ekitoe lo akiyar lokeku lokayaaye ka lokalaalo a angolol, akoniununi ekitoe ngolo ageor akoniunet ngatomon ka ngaarei ekaru epei, akoniet apei, elap epei. Eraakasi ngakui keng ekitoe lo itojoki ngibukui.

³ Emam ibore daang ni ilamit Akuj ni emini lore ngolo. Emini ekicholong lo a apolou a Akuj ka lo a Imesek lore ngolo nakaneni ilipete ngikasubak etich keng ngesi.

⁴Ingolikinete ereet keng, nabo igirakinio ekiro keng loreetin kech.

⁵Nyemini akwaar nabo jik, kori nyesakete kesi akicha a ataa kori na a akolong kainyo Ekapolon Akuj ngesi eliwor akicha kech, nabo epolokinete kesi eraakasi ngikapolok nakajik.

⁶Sodi katolimok ayong emalaikat tama, “Eraakasi ngakiro nugu na iteni nanupan. Ekapolon Akuj na einakinit ngikadwarak Etau keng, ngesi ameu emalaikat keng akidodikin ngikasubak etich keng na ejoikinit esubakinosi atipei.”

⁷Ebala Yesu, “Topupok a! Abunit atipei! Epiaritae lu iwapito ngakiro na edwaritae na eyakasi nakitab naga!”

⁸Ayong Yoana ngesi eira nabo engolik ngakiro nugu daang. Ani na arumorea ayong akipup ka akingolikin kesi, ebusokin ayong kwap diye ngakejen a emalaikat alo kedodikini ayong ngakiro nugu, sodi atasak ayong akilip ngesi.

⁹Nakaneni katolimok ngesi ayong tama, “Nyiikok neni! Arai ayong dang ekasuban etich loger kon ka ngikaitotoi kon lu eraakasi ngikadwarak a Akuj ka nabo luche daang lu iwapito ngakiro na eyakasi nakitab naga. Kilip iyong Akuj!”

¹⁰Katolimok tama, “Wara nyiimunon ngakiro na edwaritae anakitab kana kainyo aapuu ni edikino ngakiro nugu daang esubakinotor.

¹¹ Itwaan cha daang ni erono, ejoikinit erubakini esubi naaronok, ani itwaan cha daang nia nginyas, ejoikinit erubakini erai nia nginyas. Itwaan cha daang niajokon, ejoikinit erubakini esubi naajokak, ani itwaan cha daang ni italeuno, ejoikinit erubakini erai ni italeuno.”

¹²Ebala Yesu, “Topupok a! Abunit atipei, kirukunit ka ebachit lo ainakini itwaan daang itemem ka na asubi ngesi.

¹³ Ayong ngesi lo ekingaren ka lo a esal, akisiakinet ka esal.”

¹⁴Epiaritae lu ilotarete ngiworui kech tosegeta tachamakinae enyamete ageor na a ekitoe alo a akiyar nabo kitoro lodorin tolomasi lore.

¹⁵ Nakaneni eyakasi lu ikote ngingokwo nikalapatan a ere, ka lu emuroote, ka lumalaae ta lukaarak, ka lu ilipeenete ngakujo nasubuna ta lu eliokoko, tominas alioko.

¹⁶ “Ayong Yesu ngesi ameu emalaikat alimokin esi ngitunga a ngikanisae ngakiro nugu. Arai ayong ales a Daudi, ayong ngesi etop lokanokan a ataparach.”

¹⁷Ebalasi Etau a Akuj ka ateran, “Bua!” Itwaan daang ni iirari nguna, echamit elimuni tama, “Bua!” Bu itwaan cha daang ni enyamit akure. Itwaan cha daang ni esaki ngakipi na akiyar, tolema pas.

¹⁸Echikichiki ayong Yoana daang lu iirarete ngakiro na edwaritae na eyakasi nakitab naga, itwaan cha daang ni iatakini ibore iche nakiro nugu, iatakini Akuj nikeng eriras a ngakiro anakesiak isisaunitae anakitab kana.

¹⁹ Ani kelema itwaan idio akiroit adio anakiro ana edwaritae anakitab kana, edemari Akuj ngesi ekimar keng lo a ageor ana a ekitoe alo a akiyar, ka ere lo italeuno lo isisaunitae anakitab kana.

²⁰Ani ngini iruoro eger a ngakiro kanguna kadaang ebala, “Iteni dir! Abunit atipei!” Kikokis neni. Bua Ekapolon Yesu!

²¹Agasi ajokis a Ekapolon Yesu min nikus kadaang. Aamen.