Read turkana Akitoodikinet 5 Bible Online

Akitoodikinet 5 - turkana bible

Akitoodikinet 5

¹Ataanyunga ayong akitab anakan ana aloteten kangolo ibooyi alokicholong a apolou, kebutakina ngagiran lowae lo alokidiama ka lo alotooma sodi togoloi a ngigoliet a ngikan-kaarei.

²Sodi engolik ayong emalaikat lo a ngikilinga, lo alimuni irema ebala, “Ngae ejoikinit ebwangi ngigoliet lukan-kaarei sodi tangaa akitab?”

³Nakaneni amam itwaan anadis kori anakwap kori alotooma ngalup ani eya ngikaram ni engaari akitab sodi kingolik tooma keng.

⁴Ekalou ayong lokojokon noi kainyo angopi itwaan ni ejoikinit engaari akitab ngina kori akingolikin tooma.

⁵ Sodi katolimok ekasukout epei tama, “Wara nyiigor. Kingolik a! Epiu engatuny lo a ekitela a Yuda lo erai ales a Daudi, ibore daang, sodi tobwangea ngesi ngigoliet lukan-kaarei nabo tangaa akitab.”

⁶Sodi engolik ayong Imesek a Akuj ewei alokiding ekicholong a apolou, eriamito ngesi ngitieng luomwon ayarete ka ngikasukou. Tosub kear Imesek ngini. Ayakasi ngaamwar ngakan-kaarei ka ngakonyen ngakan-kaarei, lu eraakasi ngiborei a Akuj ngikan-kaarei lu emam ngawat, lu amearitae lowaitin a akwap daang.

⁷Tolot Imesek tolema akitab anakan ana aloteten kangolo ibooyi alokicholong a apolou.

⁸Napei alemarea ngesi akitab ngina, tadakakinos ngitieng luomwon ayarete ka ngikasukou lutomwon-arei ka nguomwon ngaren Imesek. Atingit ipei kech daang agita ka ngatubwae a egolit na elelebitae emitina, arai ibore ngini ngakilipet a ngitunga a Akuj.

⁹ Toeokis kesi eeos lokitetet tamasi: “Ejoikina iyong ilemari akitab tobwang ngigoliet. Kainyo kiario kolong iyong, ani kotere akitu nakon ngina igielak iyong Akuj ngitunga a ngitela kadaang, ngabukui ka ngakwapea ta ngibukui daang.

¹⁰ Itiliwo iyong kesi apolou a ngimurok alu esubete etich a Akuj yok, nakaneni epolokinete kesi ngakwapea.”

¹¹Engolia ayong nabo, eira etoil a ngimalaikae alu eraakasi ngabunge ka ngalupui eeosi! Erikaunito kesi ekicholong a apolou ka ngitieng luomwon ayarete ta ngikasukou.

¹²Eremasi kesi ebalasi: “Ejoikinit Imesek nikolong aario eanyuni apolou ka ebari ka aosou ta agogongu, ka arimatoi ka ekipur ta apiaro!”

¹³Eira ayong ngiborei anadis, anakwap ka tooma ngalup ta tooma nganamea, ngiborei lu eyarete daang anakwap, aeosi ebalasi, “Agasi apiaro ka arimatoi ka ekipur ta agogongu nakajik, min ni eyei ngolo ibooyi alokicholong a apolou ka Imesek!”

¹⁴Tatachut ngitieng luomwon ayarete tamasi, “Aamen!” Tadakakinos ngikasukou kwap kilipa.