Read turkana Akitoodikinet 6 Bible Online

Akitoodikinet 6 - turkana bible

Akitoodikinet 6

¹Ani erumor engolik Imesek a Akuj ebwangi egoliet lo ekingaren alukan-kaarei tangaa, sodi eira ayong epei a ngitieng aluomwon ayarete elimuni a etoil alo ikoni agirokinet tama, “Bua!”

² Ani engoliari ayong, ataanyunga angole naakwaan. Atingit itwaan ni adokit angole ngina akau, dio nakinae ngesi ekiraun. Tarama ngesi angole esaki aliwor ekedwangan lo idwangi.

³Dio tobwang Imesek egoliet lo a ngiarei, sodi eira ayong etiengit lo ayari lo a ngiarei ebala, “Bua!”

⁴ Topud angole ache naarengan. Nakinae ekamean a angole kangina apolou na ayaunea ejie nakwap, sodi taaras ngitunga make. Nakinae ngesi ekileng loapolon.

⁵Dio tobwang Imesek egoliet lo a nguuni, sodi eira ayong etiengit lo a nguuni lo eyari ebala, “Bua!” Ani engoliari ayong, ataanyunga angole nakirion. Atingit ekamean a angole kangina ngaratilio ngaarei anakan keng.

⁶Eira ayong ibore ni asibit etoil eruuni alotieng aluomwon ayarete kangulu ebala, “Akitemiet apei a ngakanoi a ngaropiyae a akolongit a apei, ka ngakitemiet ngauni a ngimomwa a ngaropiyae a akolongit a apei. Nakaneni wara nyiinyasu akimiet a a ngikito a emuna!”

⁷Dio tobwang Imesek egoliet lo a nguomwon tangaa, eira ayong etiengit lo eyari lo a nguomwon ebala, “Bua!”

⁸ Ani engoliari ayong, ataanyunga angole napus-akwaan ikwa ekuron. Anyaritae ekiro a itwaan ani adokit angole ngina Akitu, nabo atupit ngesi Akwap a ngikatoak anaabor. Tachamakinae kesi epolokinete ewae epei aluomwon a akwap, sodi taara kotere ejie ka eron a akoro ka edeke ta ngitieng a moding.

⁹Dio tobwang Imesek egoliet lo a ngikan tangaa. Ataanyunga ayong alotooma ekeno lo ipeyonokinere Akuj ngitai kangulu kadaang aario ani etatameta akiroit a Akuj ta ni araakatar ngikaanyunak a Kiristo.

¹⁰Tachalut kesi iremasi ebalasi, “Ekapolon Akuj Noationon Noi, na italeuno tarai kon na iteni! Eliwor ori monan itubio iyong ngakiro a ngitunga a akwap sodi kirira iyong kesi ani kiareta sua?”

¹¹ Nakinae ipei kech daang eworu loakwaan, tolimok kesi atamar kiangasi cha mono wadio, tanang itemokin etiae a ngikasubak etich ka ngikaitotoi kech lu eario, loger lo aarere kesi dang.

¹²Sodi ataanyunga ayong Imesek ebwangi egoliet lo a ngikan-kapei tangaa. Tamaranik akwap lokojokon, kirioner akolong chuch, sodi torenger elap puu loger a ngaakot.

¹³Tachakun ngikanyer kwap nalup, loger a ngameyena anaajonak ana echakuunun alokitoe na ekutakinea ekuwam loapolon.

¹⁴Tongopia adis loger a akitab ana ebilakinitae, sodi tolemarae emoru daang ka ekwar a anam ani sek ayakasi.

¹⁵Dio ngikapolok ka ngikarikok a ngitunga ka lu a ngasigerea ka ngikabarak ka ngitunga lu eyenikinitae ta nabo ngitunga luche daang, erikot ka lo nyerai erikot, toduka anatabab ka tooma ngamoru na ayakasi lomoru.

¹⁶Tanyarata kesi ngimoru ka ngatabab tamasi, “Totikoe sua kidaa anakonyen kangolo ibooyi alokicholong ka anyunyura a Imesek!

¹⁷ Akolongit naaronon a anyunyura ngesi naga, ngae tokona eweikini?”