Read turkana Akitoodikinet 8 Bible Online

Akitoodikinet 8 - turkana bible

Akitoodikinet 8

¹Na abwangea Imesek egoliet lo a ngikan-kaarei tangaa, kililing ibore daang anadis chek a anus a esaa.

² Dio ataanyunga ayong ngimalaikae ngikan-kaarei lu ewaasi alongaren Akuj, nakinae kesi ngaburucho ngakan-kaarei.

³Bu emalaikat eche lo atingit itubwa a egolit ni inomere emitina, towo alokeno alo ipeyonokinere Akuj. Nakinae ngesi emitina lokaalan kimorik aapei ka ngakilipet a ngitunga a Akuj, sodi tolem eraakasi ngakipeyos alokeno a egolit alo ipeyonokinere Akuj alo eyei ngaren ekicholong a apolou.

⁴Topuruu apuru a emitina anakan a emalaikat alo awei alongaren Akuj, kidir apuru kidiama imorikina ka ngakilipet a ngitunga a Akuj.

⁵ Dio tolem emalaikat itubwa ni inomere emitina, kilelebik akim na ebunit alokeno alo ipeyonokinere Akuj, sodi tachakak nakwap. Togirok akwap, tobelak Ekipe, kimileau nabo tamaranik akwap.

⁶Tasaka ngimalaikae lukan-kaarei lu atingito ngaburucho ngakan-kaarei akutakin ngaburucho nguna.

⁷ Tokutak emalaikat lo ekingaren aburuch keng. Totiyaun ngamoru a akiru ka akim, imorikina ka ngaakot tobukun kwap. Tonom atiaket apei ana a ngauni a akwap ka ngikito ta nginyia lukalibak daang.

⁸Dio tokutak emalaikat lo a ngiarei aburuch keng. Ibore ni asibit emoru loapolon anoki, tachakakinae nanam.

⁹ Kibelei atiaket apei ana a ngauni a anam toliwor ngaakot, totoaka atiaket apei ana a ngauni a ngitieng kadaang alu ayarete ayakasi nanam, kinyasunae atiaket apei ana a ngauni a ngatubwae.

¹⁰Tokutak emalaikat lo a nguuni aburuch keng. Etop loapolon lo anoki loger a akinwaket, tachakun anadis, tachakakin natiaket apei ana a ngauni angangololin ka ngileleae a ngakipi.

¹¹ (Enyaritae ekiro a etop kangolo “Adwaris.”) Kibelei atiaket na a ngauni a ngakipi todwarer, sodi totoaka ngitunga lukaalak ani amaasa ngakipi nguna, kainyo apot kibelos todwaraketa.

¹²Dio tokutak emalaikat lo a nguomwon aburuch keng. Taramae atiaket na a ngauni a akolong ka na a elap ta na a ngikanyer sodi tongopia atiaket na a ngauni a akicha anikech. Tongopia akicha a atiaket ana a ngauni a apaaran ka atiaket na a ngauni a akwaar.

¹³Dio engolia ayong, eira egole lo aporit alokiding adis irema ebala, “Oitiakoi kare! Abe etioko nginyas eanyunete lu ibooyete anakwap esaa lo ekutakineta ngimalaikae luuni idongito ngaburucho kech!”