Read turkana Akitoodikinet 9 Bible Online

Akitoodikinet 9 - turkana bible

Akitoodikinet 9

¹Dio tokutak emalaikat lo a ngikan aburuch keng. Ataanyunga ayong etop lo achakun kwap, sodi nakinae engaaret lo a adui ana nyesaluni.

²Tangaa etop adui na nyesaluni, toneteun apuru anadui kangina na ikoni apuru a adui anaapolon inokakinitae akim. Kisirionik apuru a adui kangina akolong ka kidiama.

³Topudut ngimases anapuru kangina pena nakwap, nakinae agogongu na ikoni na a ngikuutanea.

⁴Tolimokinae atamar nyiinyasut nginyia kori ngikito, kori ibore cha daang nipus erupunit. Nakaneni tamarae kesi towana ngitunga make lu emam emachar a Akuj aloreetin kech.

⁵Tachamakinae kesi eboliatar ngitunga ngulu a ngilapio a ngikan, nakaneni nyear kesi. Ekoni apipilu a aboliaro kech na a ekuutan na ekonyea itwaan.

⁶ Esakete kesi akitu ngilapio lukan ngulu nakaneni nyeanyunete, esakete kesi atamar atotoaka nakaneni ipungar akitu anikech.

⁷Tosubut ngimases ngangolei na esukito ejie. Anapito kesi anakies kech ngikiraunea lu esibit ngika a egolit, ekote ngireetin kech ngireetin a ngitunga.

⁸Ekote ngitim kech ngitim a ngaberu, kikote ngikel kech ngikel a ngingatunyo.

⁹Arapitae ngirarumo kech a ibore ani ikoni aupwal a asuat. Aruo etoil a ngabeben kech ikwa eruye a ngaurukukui ana irito ngangolei nakaalak ekerete alojie.

¹⁰Ayakasi kesi ngikosiman lu a ngiikwa loger a ekuutan, eraakasi ngikosiman ngulu ngesi ewaneeneta kesi ngitunga a ngilapio a ngikan.

¹¹ Eyei ekapolon lo epolokinit kesi, ngesi emalaikat lo eweikinit adui na nyesaluni. Enyaritae ekiro keng a Ngaeburaniae Abadon, ani kotere Ngagirik enyaritae Apolion, (eger keng atamar, “Ekamunyaran”).

¹² Adaunosi nginyas lu ekingaren, eringa ngiche ngiarei isidiuno.

¹³Ani erumor tokutak emalaikat lo a ngikan-kapei aburuch keng. Eira ayong etoil anaamwar anaomwon a egolit ana a ekeno a ngakipeyos a Akuj, alo ayei ngaren Akuj.

¹⁴Tolimok etoil ngolo emalaikat lo a ngikan-kapei tama, “Talachak ngimalaikae luomwon lu eenikinitae nangolol naapolon a Eupurate!”

¹⁵Talachakinae ngimalaikae luomwon ngulu. Asadito kesi kotere esaa ka akolongit ka elap ta ekaru lo eareta atiaket apei ana a ngauni a ngitunga kadaang.

¹⁶Katolimokin ekimar a ngajorei ana adokito ngangolei: arai ngalupui ngamiae ngaarei.

¹⁷Ani anakisingolikinet kesingolikini Akuj, ataanyunga ngangolei ka ngikameak ngangolei. Anapito kesi alorarumo ngasua naarengak ikote akim, topuseaka loger a adis, nabo tanyangaka loger a akibirit. Ekote ngakies a ngangolei kanguna ngakies a ngingatunyo. Apudunit akim ka apuru ta akibirit anakituk kech.

¹⁸Taara atiaket na a ngauni a ngitunga ngakiro nakesiak nugu, akim ka apuru ta akibirit, na apudunito anakituk a ngangolei.

¹⁹ Kainyo ayei agogongu a ngangolei kanguna nakituk kech ka ngikosiman kech. Ekote ngikosiman kech ngimunio lu eya ngakies, nakaneni ewaneeneta kesi ngitunga.

²⁰Ani ngitunga luche daang lu nyeara ngakiro nakesiak nguna, nyereuna kesi aloborei alu kolong asubete kesi ngikulepek. Nyepalikina kesi akilip ngipean, kori ngakujo nasubuna a egolit, kori akwangat na elalak ngaropiyae, kori ngasua nanyangayek, kori ngamoru ka ngakito, na eraakasi ngiboro lu emam ibore eanyungarete kori iirarete kori nyeloose.

²¹Kori nyelungete kesi akiar na eareeneta ngitunga kori akapel na esubatar kori emalaanu kori akoko kech.