Read turkana Rus 2 Bible Online

Rus 2 - turkana bible

Rus 2

¹Ayei Naom eyenet keng anyaritae Boas. Arai Boas ekabaran lo ayanasi ka Elimelek.

² Akolongit apei tolimok Rus ataakeng tama, “Kimiekinae atolot namanat edepuunu ngikinyam lu echakanakin nalup, alomana a itwaan kadaang ani cha kachamuni ayong alomari mana keng.” Tolimok Naom ngesi tama, “Kape ikakoku.”

³Sodi toloma Rus mana kidep ngikinyam lu aisianakinete ngikalemak. Ikwa kerai amana na ayei ngesi ngina aka Boas alo ayanasi ka Elimelek.

⁴Ani ekisidi bu Boas alo Betleem kimala ngikalemak tama, “Kiruko ka Ekapolon Akuj!” Tatachut kesi tamasi, “Kitopia iyong Ekapolon Akuj!”

⁵Kingit Boas itwaan ni aweikinit luche tama, “Ani aberu naga?”

⁶Tatachak itwaan ngini ngesi tama, “Erai ngesi aberu napeyonon ngoon erukunete ka Naom anakwap a Moab.

⁷Kengisi ngesi ayong tama, ‘Kimiekinae ewap ngikalemak anaabor edep ngikinyam lu echakanakin nalup.’ Nyiangara ngesi jik natete esiakinea akidep ngikinyam nataparach tanang tokona na eangarea wadiochichi.”

⁸Sodi tolimok Boas Rus tama, “Kiira ngakiro kang, kidep ngikinyam alomana kana bon. Wara nyiilot wache. Kiruko ka ngaberu na eyakasi nege,

⁹ewae lo elemete kesi kiruko ka kesi aapei. Alimok ayong ngisorok lu eya mana kang atamar nyikichan iyong. Ani kinyam iyong akure, tamat ngakipi na eya nakurumo na ilelebito kesi.”

¹⁰Kijuuru Rus tatap ereet keng ngalup,[2] tolimok Boas tama, “Nyoni ilemunor iyong akingarakin ayong kona? Nyoni ijokearor iyong anikang kona atarai bo ayong itwaan a akwap a ache?”

¹¹Tatachak Boas ngesi tama, “Eira ayong daang na isubea iyong ataakon na atoanea lokile kon. Ayeni ayong atamar iisikini iyong apakon ka itiokon ta akwap kon sodi bu akiruk ka ngitunga lu nyeanyuna iyong a ache.

¹²Kitopia iyong Ekapolon Akuj kotere ngakiro nguna isubi iyong. Kiinak iyong Ekapolon Akuj na erai Akuj a Isirael ebachit loapolon noi, Akuj ngina ibu iyong nikeng isaki ayuuno.”

¹³Tolim Rus tama, “Irai iyong itwaan ajokon ekapolon. Ajoker ayong etau ani kisuruorea iyong ayong niajokon, tani bo pekarai ayong akasuban etich kon.”

¹⁴Esaa lo emujere, tolimok Boas Rus tama, “Bua omu amugati adio kilumok lomuna.” Dio Rus kiboikinos ka ngikasubak etich sodi nak Boas ngesi ngikinyam lu apeitoe. Kimuj ngesi kimwon, topiyanu akimuj epewae.

¹⁵Ani enyouni Rus akidep ngikinyam, kichikichikak Boas ngikasubak etich keng tama, “Kimiekisi ngesi kidep tani alokinyam alu eenitae. Warasi nyiitengero.

¹⁶Toututu tani ngikinyam ngiche lu eenitae kimiekis kidongo, sodi bu ngesi kidep. Warasi nyiikilakis.”

¹⁷Sodi toloma Rus akidep erau tanang ebong. Ani epiatari ngesi erau, kitemokin ngakiloi asibit ngatomon.

¹⁸Yaa ngesi ngikinyam lore kidodik ataakeng etiae lo edepuni ngesi. Nak ngesi ataakeng tani akimuj na apiyanuni ngesi.

¹⁹Kingit Naom ngesi tama, “Aliwae ianyunea iyong akimuj naga daang? Idepi iyong ngikinyam alomana a ngae? Epiari Akuj itwaan ni kingarakini iyong.” Sodi tolimok Rus ataakeng tama, “Edepi ayong ngikinyam alomana a itwaan enyaritae Boas.”

²⁰ Tolimu Naom tama, “Epiari Ekapolon Akuj Boas. Iyoonokini Ekapolon Akuj ngakichikakinet keng alotunga alu eyarete ka lukatoak.” Tolim nabo ngesi tama, “Erai itwaan ngini iyenet yok, ipei a ngitunga alu ejoikinit kitanete ngoni.”

²¹Sodi tolimu Rus tama, “Nabo kaneni dang kalimokini Boas ayong tama, ‘Kiruko ka ngikasubak etich luche tanang ni elemiyarere ngamanat.’ ”

²²Tolimok Naom Rus tama, “Kongina ikakoku, ejoikinit iyong irukete ka ngaberu nache alomana a Boas. Epedorio iyong akichan erai kisub etich alomana a itwaan a iche.”

²³Nakaneni kiruko Rus ka kesi tochunakis ngikinyam daang tanang ni elemiyarere erau ka ngakanoi. Kibooyoto Rus ka ataakeng.