Read turkana Rus 3 Bible Online

Rus 3 - turkana bible

Rus 3

¹Ani ekisidi abu ataakeng na anyaritae Naom tolimok ngesi tama, “Nyejoikinit mono ayong kasakakini iyong ekile lo kiusi taanyunea awi na erai akon a?

²Toyen atamar itwaan nibe Boas ni been irukito iyong ka ngaberu na esubete etich keng, erai eyenet yok. Atabong naga epiesi ngesi erau.

³Ejoikinit iyong ilotar kiwasakin akimiet nakaakunyon, sodi tanap ngiworui luajokak noi, ani erumor tolot ni epiesea ngesi erau. Nakaneni wara ngesi nyeeyen atamar iyei iyong neni eringa ngesi nyemata ka akimuj.

⁴Ani elosi ngesi akiper, tongichu lokojokon toyen ni inapakin ngesi. Ani ejotoor ngesi, tolot iyong kiwolo eworu keng kinapakin nakejen keng. Kilimokini ngesi iyong ngakiro na ejoikinit isubakini.”

⁵Tatachu Rus tama, “Asubakini ayong ngakiro daang nakilimok iyong ayong.”

⁶Sodi tolot Rus nipieset ngalemet tosub ngakiro daang na alimokini ngesi ataakeng.

⁷Na arumorea Boas akimat ka akimuj, abu talakar. Tolot ngesi nipieset erau kinapakin neni tojotoor. Toniamar Rus kiwolo eworu a Boas dio kinapakin nakejen keng.

⁸Ani enangi kiding akwaar, toriangakin Boas kibeloor, nakaneni tatalasi ngakiro aperio aberu kaneni.

⁹Kingis ngesi tama, “Ngae iyong?” Tatachu Rus tama, “Erai ayong Rus, akasuban etich kon. Kona iraakar iyong eyenet a lokile kang, iyong ejoikinit kitani ayong. Nakaneni ejoikinit iyong kirumi ayong.”

¹⁰Tolim Boas tama, “Kipiari iyong Ekapolon Akuj noi ikakoku. Ijoker iyong tokona noi edwang tani nikolong a ekingaren kainyo nyesaka iyong atamar kiruma ngisorok lu kebarito kori lu kiboosit.

¹¹Tokona ikakoku, wara nyiem. Asubakini ayong daang na kilimok iyong ayong kainyo kiyenete iyong tani ngitunga a ere daang atamar irai aberu ajokon.

¹²Iteni dir arai ayong eyenet a lokile kon lo ejoikinit ketani iyong, nakaneni eyei eyenet a lokile kon eche lo eyanasi ka ngesi noi.

¹³ Toper iyong nege akwaar naga. Moi nataparach kingichuni ngoni kechamuni ngesi akirum iyong kori kemam. Ani kechamu, emam ngakiro. Ani pekechamu, ekongi tokona ayong alongaren Ekapolon Akuj jik atamar kerumi ayong iyong. Toper iyong nege tanang nataparach.”

¹⁴Toper ngesi nakejen keng tanang ebayiari. Nakaneni tonyou ngesi eringa akwap emuimui, tolimok Boas ngesi tama, “Nyejoikinit ngitunga eyenete atamar aperi aberu nege.”

¹⁵Tolimok Boas ngesi tama, “Yau awaru nakon ngina topeta.” Topeta Rus awaru sodi tookok Boas ngesi erau ngakiloi esibit ngatomwon-arei, ani erumor kisiwok. Tolot Rus lore.

¹⁶Ani enangi ngesi nawi kingit ataakeng ngesi tama, “Apot ngakiro kikokis ai ikakoku?” Sodi Rus kisisau daang na asubea Boas ngesi.

¹⁷Tolim nabo tama, “Katolimok Boas ayong tama, ‘Nyibongori nika ataakon a ngakan anikirion,’ sodi kainak ngesi ayong erau logo daang.”

¹⁸Tolimok Naom ngesi tama, “Kidarou cha iyong ikakoku, ejokearosi ngakiro nugu daang. Nyiangakini Boas akolongit naga eringa nyerumoro ngakiro nguna.”