Read turkana Rus 4 Bible Online

Rus 4 - turkana bible

Rus 4

¹Tolot Boas kiboikin lokidor a ere, nipalem iriameenere. Sodi bu eyenet a Elimelek losek abala Boas. Tanyara Boas ngesi tama, “Bua mono iyong lodia lo kiboikin nege.” Dio itwaan ngini tolot kiboikin.

²Tochun Boas ngikasukou ngitomon a ere kangolo tolimok kesi dang tama, “Kiboikinos nege.” Apot kesi kiboikinos.

³Tolimok Boas eyenet keng tama, “Kona tokona abongunio Naom alo Moab, esaki ngesi agielar amana a Elimelek alo erai eyenet yok.

⁴Nakaneni asaki ayong iyong dang toyen ngakiro nguna. Tokona, ani kisaki iyong akigiel, togiel eyakasi ngikasukou lugu nege. Ani pekisaki iyong akigiel, tolim iyong kainyo iyong ngesi mono echamit igieli, atotupuu ayong erai pekigiel iyong.” Tolim ekile ngolo tama, “Agieli ayong.”

⁵Tolim Boas tama, “Ejok noi. Nakaneni ani kigieli iyong amana ngina ani a Naom, ejoikinit iyong irumi apuserut nabe Rus na akwap a Moab. Sodi toliworor amana ngina jik aka ngitunga a Elimelek.”

⁶Tatachu ekile ngolo tama, “Ani kikote neni, nyapedori ayong akigiel amana ngina kainyo idodiunit neni atamar nyepedorete ngide kang akirum amana ngina. Togiel iyong kainyo nyapedori ayong.”

⁷ Ngirwa ngulu alo Isirael, arai na esakere akilokony ngiboro, alemuuni ekagielaran ibore, tolem amukat keng nak ekagielan ibore. Eger ngolo ngesi edodiununeta Ngisirael atamar arumor ngakiro nguna.

⁸Na alimokinea ekile ngolo Boas tama, “Togiel iyong,” abu ngesi tobut amukat keng nak Boas.

⁹Ani erumor tolimok Boas ngikasukou ngulu ka ngitunga luche daang tama, “Iraakasi esi akolongit naga ngikaanyunak atamar agiel ayong ani a Naom ibore daang nikolong arai ika Elimelek ka talokookeng lu enyaritae Kilion ka Malon.

¹⁰ Erumi nabo tani Rus na akwap a Moab, na erai apuserut a Malon. Eliwor Rus aberu kang. Iratakinete ngakiro nguna ngiboro a awi a ekasian sodi nyeengopiyarea ekiro keng alotunga keng ka ere keng. Esi iraakasi ngikaanyunak akolongit naga.”

¹¹Tolimut ngitunga daang lu ayakasi neni ka ngikasukou tamasi, “Iteni kirai sua ngikaanyunak. Kimiek Ekapolon Akuj kisikwaanik aberu kon ka Rael ka Lea nakolong edoikinete Yakobo ngide lukaalak. Ibari iyong alomachar a Epirasa nabo toliwor lo kiyenikinitae alo Betleem.

¹² Kikok awi kon na a Peres alokookeng a Yuda ka Tamar, kotere ngide lu kiinakini Ekapolon Akuj iyong anaberu anasorokit kana.”

¹³Sodi abu Boas tolema Rus, toriko nawi kitiliwo aberu keng. Topia Ekapolon Akuj Rus topoti, kidou ikoku nisapat.

¹⁴Tolimokis ngaberu Naom tamasi, “Kipuroe Ekapolon Akuj! Kiinak ngesi iyong akolongit naga etatait lo kitani iyong. Kimiek idia en toliwor lo eyenikinitae alo Isirael!

¹⁵Kimina iyong nateran kon nabo kisubea ngesi iyong ngakiro na idwangito na a ngide alusapa a ngikan-kaarei. Kidoik nabo tokona ngesi iyong etatait lo kiteyari iyong nabo kiyok anamojongu kon.”

¹⁶Tolem Naom idia tadak, toliwor ngesi edakeene.

¹⁷Tanyarata ngaberu ekiro a idia Obed ebalasi “Edoikin Naom idia!” Toliwor Obed apakeng a Yese alo arai apakeng a Daudi.

¹⁸Nugu kesi eraakasi ngalesea a Peres. Arai Peres apakeng a Esiron,

¹⁹alo arai apakeng a Ram, alo arai apakeng a Aminadab,

²⁰alo arai apakeng a Nachon, alo arai apakeng a Salimon,

²¹alo arai apakeng a Boas, alo arai apakeng a Obed,

²²alo arai apakeng a Yese, alo arai apakeng a Daudi.