Read turkana 1 Samuel 1 Bible Online

1 Samuel 1 - turkana bible

1 Samuel 1

¹Ayei itwaan a ekitela a Epiraim anyaritae Elikana. Alomit ngesi lore a Rama anakwap ana a ngimukur a Epiraim. Arai ngesi lokookeng a Yeroam, alo arai lokookeng a Eliu, alo arai lokookeng a Tou, alo arai lokookeng a Supu.

²Ayakasi Elikana ngaberu ngaarei. Anyaritae apei Ana tanyaritetei nache Penina. Ayakasi Penina ngide, nakaneni amam Ana ngide.

³Ekaru daang, arotonokini Elikana alo Rama tolot Chilo akilip ka akipeyonokin Akuj Namerikanyer. Talokookeng a Eli lu anyaritae Opini ka Pineas kesi araakasi ngimurok a Ekapolon Akuj alo Chilo.

⁴Akolongit cha daang na elemunea Elikana ngakipeyos, akoranakini ngesi Penina ka ngide keng ngatiaket ngapei-pei a ngakipeyos.

⁵Tani keyei eger lo aminar ngesi Ana noi, ainanakini atiaket apei bon kainyo[1] aenit Ekapolon Akuj akook keng pedoununi.

⁶Abu Penina na arai nakain keng tobeny ngesi kitilili kainyo amam Ana ngide ayakasi.

⁷Tosubas ngakiro nugu ngikaru daang na cha elooso kesi kai a Ekapolon Akuj. Etongoyeene Penina Ana lokojokon sodi kigor Ana towou akimuj.

⁸Alimonokini Elikana lo arai lokile keng ngesi tama, “Ana, nyo igoro iyong? Nyo peimuja iyong? Nyo ialolongio iyong jiik? Nyedwangit ayong ngide lusapa ngitomon anikon a?”

⁹Ani erumorete kesi akimuj alo Chilo, tonyou Ana. Ebooyi Eli lo arai emuron a Akuj alokidor ani palem ibooyeeneo.

¹⁰Ealolongi Ana noi ariaba. Kigor ngesi noi ilipit Akuj.

¹¹ Kikong Ana tama, “Ee Ekapolon Akuj, Namerikanyer, kingolikinae ayong akasuban etich kon! Taanyunga ngichan kang kitamu ayong! Wara kare ngakiro kang nyikimuriakis iyong! Ani kiinak ikoku nisapat, epotori ayong ngesi toliwor ika Ekapolon Akuj ngirwa daang lu eyarea ngesi. Nyetapi ebanyet akou keng.”[2]

¹²Ani erubakinit Ana akilipit, toloma Eli akisemere akituk keng.

¹³Elipit Ana alotau keng, atakanete ngipon keng atamar iruoro ngesi nakaneni peapupio etoil keng. Sodi tama Eli kori irakarit epurot Ana.

¹⁴Abu Eli kingit ngesi tama, “Kirakarit iyong emuna tanang ori? Kimiek emuna lokon lo!”

¹⁵Tatachu Ana tama, “Emam, ekaapaan, nyekerakarit ayong emuna kori epurot. Nyemata ayong emuna kori epurot. Arai ayong itwaan ni echana noi. Elipit ayong alimokinit Ekapolon Akuj ngichan kang daang.

¹⁶Nyiitama robo kori arai ayong akedalan kon aberu naaronon. Elipit ayong kona ani echanar noi.”

¹⁷Tolim Eli tama, “Kape akaalimon, kiinak Akuj na Ngisirael iyong ibore ni ilipit.”

¹⁸Tatachu Ana tama, “Tosubea akedalan kon niajokon jiik.” Tolot Ana sodi kimuj, nakaneni nyialolong ngesi nabo jik.

¹⁹Tonyout kesi nataparach nache kilipa Ekapolon Akuj. Ani erumor tobongosi Rama ni ayei awi kech. Topero Elikana ka Ana, sodi tatachu Ekapolon Akuj akilip a Ana.

²⁰Sodi topoti Ana, kidou ikoku nisapat. Tanyara ekiro keng Samuel[3] ebala, “Elipuni ayong ngesi ani a Ekapolon Akuj.”

²¹Tonyout Elikana ka Ngitunga a awi keng alosit Chilo akipeyokin Ekapolon Akuj ngakipeyos na ekaru kadaang ka ngakipeyos na ikongitoe alemun.

²²Abu Ana nyeelot akolongit ngina. Tolimok ngesi lokile keng tama, “Napei cha itapalikinere ikoku ngisikin, ayaari ayong ngesi kai Ekapolon Akuj kiboikin inaa jik.”

²³Tatachu Elikana tama, “Itemokino. Tosubak loger lo kijoikinit iyong. Kidong nawi, tanang akolongit na itapalikinea iyong ngesi akinak ngisikin. Kiyook Ekapolon Akuj akiroit na ichikak iyong[4] ngesi.” Sodi kidong Ana nawi tadak ikoku keng.

²⁴Ani itapalikini Ana idia akinak ngisikin, abu yaa ngesi Chilo. Yaa ngesi tani emong lo a ngikaru a nguuni,[5] ka ngakiloi ngatomon a ngakiria ta etuo lo eleleba emuna. Yaa ngesi Samuel eringa edit kai a Ekapolon Akuj alo Chilo.

²⁵Ani kear kesi emong kerumor, yaasi idia nia Eli.

²⁶Tolimok Ana Eli tama, “Abala ayong iyong ekaapaan a! Kitamunit iyong ayong a? Ayong aberu nakolong awei kanege alongaren kon elipit Ekapolon Akuj.

²⁷Elipit ayong ngesi ikoku en, nakaneni kainaki ngesi ayong ibore ni elipa.

²⁸Aloger kangolo, ainak ayong ngesi Ekapolon Akuj. Eliwor ngesi ika Ekapolon Akuj ngirwa lu eyarea ngesi daang.” Sodi kilipa kesi[6] Ekapolon Akuj kaina.