Read turkana 1 Samuel 10 Bible Online

1 Samuel 10 - turkana bible

1 Samuel 10

¹Ani erumor tolem Samuel echupa lo ayei akimiet tobukok nakou a Saul, sodi tonuak ngesi tama, “Kiseu iyong Ekapolon Akuj toliwor ekapolon a Ngisirael alu eraakasi ngitunga keng. Ipolokini iyong ngitunga a Ekapolon Akuj toyuu kesi alomoe kech alu iriamito kesi. Ibore en idodiuni atamar kiseu Ekapolon Akuj iyong toliwor ekapolon a ngitunga keng.

²Ani irotokini iyong akolongit naga anikang, iriamunosi iyong ka ngikiliok ngiarei analiel a Rael alo Selisa ani eyei nakwap a Benjamen. Kilimokinete kesi iyong atamar aanyun ngisikiria lu ngoon isakete esi. Ajongo tokona apakon akachit ngakiro a ngisikiria, aliwor iyong kiitunit. Ingita ngesi ebala, ‘Ekokini ayong ngakiro a lokookang ai?’

³Ani erumor torotok kaneni tanang lochoke lo italeunitoe lo eyei Tabor. Iriamuni ngikiliok nguuni eloose akipeyonokin Akuj alo Besel, edakit epei ngikaalei nguuni, todakite loche ngamugati ngauni, totingite loche etuo loa emuna.

⁴Kimalaate kesi sodi kiinakis ngamugati ngaarei. Kidiau ngamugati nguna.

⁵Ani erumor tolot lomukura a Akuj lo eyei Gibea, ni eyei adakar a Ngipilisti. Ani ilomari lore, iriamunosi ka ajore a ngikadwarak etiyauna alokeno a ngakipeyos alokidiama emukura, ideese ngagitae ka ngiburin, tokusete ngibunei, tobolias ngagitae, todwarete.

⁶Emini Etau a Akuj nikon atipei todwara iyong ka kesi, tosub itwaan iche nigela.

⁷Ani esubakinosi ngakiro nugu anikon, tosubak ngakiro daang nacha kidodikini iyong Akuj atamar tosubak.

⁸Kingarenikini iyong ayong tolot Giligal. Kariamuni ayong iyong kaneni, abu atolemik Akuj ngakipeyos na inomio ka na ekisil. Kidarunae ayong kaina a ngirwa a ngikan-kaarei tanang ni abunio ayong katolimok na isubakini.”

⁹Ani erea Saul erotokini ani a Samuel, kibele Akuj eboyor a Saul. Akolongit ngina, tosubakin anikeng ngakiro daang nasek alimokinit Samuel ngesi.

¹⁰Ani enangunete Saul ka ekasuban etich keng Gibea, abu ajore a ngikadwarak kisiriamu ngesi. Min etau a Akuj nia Saul atipei sodi kimorikin ngesi ka kesi idongaate ka akirema.

¹¹Ani ingolikinete ngitunga lusek ayenete ngesi eger lo adwareta ngesi ka ngikadwarak, apot kingitanaros make tamasi, “Nyooni abu ni eyei lokookeng a Kich? Aliwor Saul dang ekadwaran a?”

¹²Tatachu itwaan ipei ni alomit neni tama, “Ani bo luche ngul, ngae apakech?” Eger ngolo kolong esiakineta ngakitadapet be, “Aliwor Saul dang ekadwaran a?”

¹³ Ani erumori Saul akidongare ka akirema, tolot ngesi lokeno a ngakipeyos lo ayei kidiama emukura.

¹⁴Abu apakeng a Saul loochi taanyunga ngesi ka ekasuban etich kingit tama, “Aliwae ilosito esi?” Tatachu Saul tama, “Asakar ngisikiria. Ani kingopikinete, atoloto nia Samuel.”

¹⁵Tolim nabo apakeng loochi ngolo tama, “Tama ngesi esi ai?”

¹⁶Tatachak Saul apakeng loochi ngolo tama, “Kitolimok ngesi sua atamar aanyun Ngisikiria.” Nakaneni abu Saul nyeelimok ngesi ngakiro na abalar Samuel eliwor ngesi ekapolon.

¹⁷Tanyara Samuel ngitunga tochunak Misipa, lokiriam a Ekapolon Akuj.

¹⁸Tolimok ngesi Ngisirael tama, “Alimu Ekapolon Akuj na erai Akuj a Isirael ebala, ‘Kepuduni kolong ayong esi alo Misiri, katoyuu esi Alomisiri, katoyuu tani alotunga aluche kadaang kiboliatar esi.

¹⁹Nakaneni kingero esi ayong Akuj kus akolongit naga. Ayong nakengaranakini esi alochan kus kadaang ka ngakiro naationok. Ilimut esi atamar tosekinae ekapolon. Aloger kangolo, tochinakinos tokona ngaren Ekapolon Akuj a ngitela kus ka ngimacharin kus.’ ”

²⁰Ani erumor toriku Samuel ngitela a Isirael daang diyete, sodi toseu Ekapolon Akuj ekitela a Benjamen.

²¹Toriku ngesi ekitela a Benjamen diyete a ngawiyei kech, sodi toseu Ekapolon Akuj awi a Matiri. Ani erumor toriku ngesi ngikiliok a awi a Matiri a ngapei-pei, sodi toseu Ekapolon Akuj Saul lokookeng a Kich. Tasakae ngesi tongop.

²²Sodi kingita kesi Ekapolon Akuj tamasi, “Eyei itwaan iche eringa nyebuno a?” Tatachu Ekapolon Akuj tama, “Saul ye kaama, edukit ani eyei eegos.”

²³Tamataros kesi torikut Saul lotunga. Ani ewei ngesi alokiding ngitunga tooyaar noi kipor akou keng na a ngitunga kadaang.

²⁴Tolimok Samuel ngitunga daang tama, “Ingolikis esi itwaan ni aseu Ekapolon Akuj a? Emam itwaan ikwaanatar ngesi alotunga kadaang!” Kiremasi ngitunga daang tamasi, “Kipuruunoe ekapolon!”

²⁵Ani erumor tolimok Samuel ngitunga ngakiro a eboyor a ekapolon ka etich keng. Ani erumor kigir nakitab kiwaak akitab ngina ni italeunitoe. Sodi tolimok Samuel ngitunga atamar toloto nawiyei kech.

²⁶Tobongo Saul dang nawi keng alo Gibea. Apot ngitunga ngiche lu ayenikinitae,[13] lu alomarit Akuj lotai kech, kirukosi ka Saul.

²⁷Apot ngitunga ngiche lupasiek tamasi, “Ikokini itwaan en kiyuuni sua ai?” Apot kesi kimenyasi Saul. Emam ngainakinet apot kesi inut Saul. Nakaneni nyemisikina Saul ngakiro kech.