Read turkana 1 Samuel 11 Bible Online

1 Samuel 11 - turkana bible

1 Samuel 11

¹Adaunet a elap a epei, abu ekapolon a Ngiamon lo anyaritae Naach toloto ka ngasigerea keng lore a Yabech anakwap a Gilead, sodi kiriama ere. Tolimokis ngitunga a Yabech Naach tamasi, “Bua atachamakin, sodi atachamutu sua iyong toliwor ekapolon kosi.”

²Tolim Naach tama, “Kichamakini ngoni erai kesubakin ibore ipei. Kichamakin erai kapuyonok ayong akongu a itwaan kadaang na aloteten, sodi pena ngileech nia Ngisirael kadaang.”

³Tolimokis ngikarikok a Yabech ngesi tamasi, “Tachamakinae sua ngirwa ngikan-kaarei lukimearea ngitunga nakwap a Isirael daang. Ani kemam itwaan kingarakini sua, kichamuni sua ngakiro kon.”

⁴Tanangut ngitunga lu amearitae Gibea ni ayei Saul. Ani elimorete kesi ngakiro nguna, apot ngitunga daang kigoro lokojokon.

⁵Abunit Saul anamanat emeat ngimongin keng. Kingis ngesi tama, “Ekoe, nyo anyam ngitunga igorotor daang?” Sodi tolimokis kesi ngesi ngakiro na ayaunete ngitunga a Yabech.

⁶Toloma etau a Akuj nia Saul napei eirarea ngesi ngakiro nguna, tongo kilelebun.

⁷Tolem ngesi ngimongin ngiarei totubutubu nak ngitunga akiring na atubunio alomongin kirimioto akwap a Isirael daang ichikichikasi ebalasi, “Itwaan cha daang ni nyiwapakini Saul ka Samuel alojie, esubere ngimongin keng kona!” Toema Ngisirael ngakiro na adikino Ekapolon Akuj esubakini, sodi tochunun daang, emam tani ipei abu kidong.

⁸Ani echunakini Saul kesi alo Besek, araakasi ngitunga lua Isirael 300,000, taraakas lua Yuda 30,000.

⁹Tolimokis kesi ngitunga lu ameunitae alo Yabech tamasi, “Tolimokisi ngitunga a Yabech kona, ‘Moi naparan lotingilan, kiyuunio esi!’ ” Ani eloose ngitunga ngulu kisisakis ngitunga a Yabech ngakiro nguna, apot kesi talakaros noi,

¹⁰sodi tolimokis Naach tamasi, “Moi, kichamuni sua ngakiro kon, kitosubea iyong sua ngakiro nacha isaki daang.”

¹¹Akolongit ngina nakwaare, abu Saul totiak ngitunga keng a ngalooso a ngauni. Ani ebayiari, toloto kesi nadakar a Ngiamon kitijikis Ngiamon. Aarito kesi Ngiamon na anangea naparan lotingilan. Ani lu apuunosi apot kiealaros tamataros a ngapei-pei.

¹²Sodi tolimokis Ngisirael Samuel tamasi, “Ngae mono ngoon abala nyikipolokini ngoni Saul? Torikutu ngitunga ngulu ataara!”

¹³Nakaneni tolim Saul tama, “Emam itwaan eario akolongit naga, kainyo akolongit naga ayuunea Ekapolon Akuj Ngisirael.”

¹⁴Ani erumor tolimok Samuel ngitunga tama, “Potu apana Giligal etiliwosi nabo Saul ekapolon yok.”

¹⁵Sodi toloto ngitunga Giligal kitiliwosi Saul kech alongaren Ekapolon Akuj. Kipeyokis kesi Ekapolon Akuj ngakipeyos a ekisil kaina. Talakaros Saul ka Ngisirael daang lokojokon alo Giligal.