Read turkana 1 Samuel 14 Bible Online

1 Samuel 14 - turkana bible

1 Samuel 14

¹Akolongit apei, tolimok esorokit lo atingakinit ngesi ngiboro lujiet tama, “Bua atotuboros lowae loche ye atoloto nadakar a Ngipilisti.” Nakaneni abu Yonasan nyeelimok apakeng ngakiro nguna.

²Alomit apakeng Migiron diyete Gibea, kwap elamae. Arukito ngesi ka ngitunga ngamiae ngakan-kapei. (

³Emuron lo anapit akaluwat ngesi Aija lokookeng a Aitub alo arai lokaatokeng a Ikabod. Arai Atub lokookeng a Pineas alo arai lokookeng a Eli, arai emuron a Ekapolon Akuj alo Chilo.) Peayenete ngitunga atamar arotoki Yonasan.

⁴Ayakasi ngatabab ngaarei naapolok tokwaka napak a Mikimach ni etori Yonasan tolomarea nadakar a Ngipilisti. Ayakasi ngatabab nguna lowaitin luarei a apak, anyaritae apei Boses tanyaritetei nache Sene.

⁵Awei ataaba apei alowae alokwap akienyikina ka Mikimach, towei nache alowae alo alokuju ekienyikina ka Geba.

⁶Tolimok Yonasan esorokit lorukitos keng ngolo tama, “Bua atotuboros nadakar a Ngipilisti alu eraakasi ngibukui lugelayek. Tokona ngon, kingarakini Ekapolon Akuj ngoni. Emam ibore iratakini ngesi ayuun ngoni tani kikidioko ngoni.”

⁷Tatachu esorokit ngolo tama, “Tosubak cha daang na isaki iyong akisub. Kirukit ayong ka iyong.”

⁸Tolim Yonasan tama, “Itemokino. Kitubor ngoni ekwakaye esingolikinos Ngipilisti.

⁹Ani ketamasi kesi ngoni, ‘Kidarutu apotu sua nikus,’ kiwei ngoni ani kiwaar, nyikilosi nikech.

¹⁰Nakaneni ani ketamasi kesi, ‘Potu nikosi,’ kilosi ngoni nikech kainyo idodiuni ibore ngini atamar achamu Akuj ngoni kidwangi kesi.”

¹¹Sodi kisingolikinos kesi Ngipilisti tamasi, “Kingolikisi a, alomut Ngieburaniae anapanya ana ngoon adukitotor!”

¹²Tanyarata kesi Yonasan ka esorokit lorukitos keng tamasi, “Potu nikosi eyei ibore kisaki sua akidodikin[18] esi!” Tolimok Yonasan esorokit ngolo tama, “Bua kiwapakinae ayong. Esidwang Ekapolon Akuj Ngisirael kesi.”

¹³Sodi todoka Yonasan apak a ngakan keng ka ngakungin, kiwapak esorokit ngolo ngesi.

¹⁴Alojie alo ekingaren kangolo, apot Yonasan ka esorokit ngolo taara ngitunga ngitomwon-arei ani arai atiaket apei anaomwon a ekitela.

¹⁵Toema Ngipilisti daang lu ayakasi moding Apot ngikaremok ka ngasigerea na ayakasi nadakar tobul tamaranikis. Tamaranik akwap, sodi min ebuloi loaronon noi.

¹⁶Apot ngitunga a Saul lu erereete alore a Gibea alo eyei nakwap a Benjamen, kingolikis Ngipilisti ekerete ama ka ama.

¹⁷Tolimok Saul ngitunga keng tama, “Kimarutu ngasigerea taanyut ngitunga lu emam kane.” Ani imarunio, toriamunae Yonasan ka ekatingan ngiboro keng lujiet emam.

¹⁸Tolimok Saul Aija tama, “Yau asaduku a Achamunet a Akuj nege.” (Akolongit ngina, adakit Aija ngesi alongaren Ngisirael.)

¹⁹Ani eringa Saul iruorosi ka emuron, abu ekurikur anadakar a Ngipilisti toroner noi, sodi tolimok Saul ngesi tama, “Emam esaa isuruorikinere Ekapolon Akuj!”

²⁰Tonyout Saul ka ngasigerea keng akitijwore Ngipilisti, lu apot tojwoto make ani ebileritor lokojokon noi.

²¹Apot Ngieburaniae ngiche lusek arukito ka Ngipilisti anadakar kech, kilocho ewae lo ibakitotor, sodi kibaka alowae a Saul ka Yonasan.

²²Luche dang, lusek adukito alomukur a Epiraim, apot kimorikin ka Ngisirael luche alojie na eirareta atamar amatarosi Ngipilisti.

²³Tojwoto jik kiporosi Betapan. Toyuu Ekapolon Akuj Ngisirael akolongit ngina.

²⁴Tanyam Ngisirael akoro tolilimiyosi akolongit ngina, kainyo abu Saul kikong edungunit tama, “Ilamam itwaan enyami akimuj akolongit naga eringa nyenanga ebong, sodi atatachakinea ngakiro naaronok alomoe kang.” Emam itwaan abu kiir akimuj akolongit ngina.

²⁵Pot ngitunga daang[19] ni alalaketa ngakito torukaut akimiet a ao epetakina wadaang.

²⁶Eleleba akimiet a ao nakito, nakaneni emam itwaan abu tanyam kainyo aemito kesi ngilam a Saul.

²⁷Nakaneni aringa Yonasan nyiirara apakeng ichikichiki ngitunga ilama. Sodi tolem ngesi akitoe na atingit kirepak kai a ao, sodi tanyam akimiet a ao. Atipei topwatun akwaan keng.

²⁸Tolimok itwaan iche ngesi tama, “Echikichiki apakon ngitunga ikongi tama, ‘Ilamam itwaan ni enyami akimuj akolongit naga’ ”. Tolilimiyosi ngitunga.

²⁹Sodi tolim Yonasan tama, “Ichanit apakang akwap. Kingolikisi tokona eger lo ekwarunea ayong ani anyamea akimiet a ao!

³⁰Kejokera arai tanyama ngitunga akimuj na alemunete kesi na edwangeta ngimoe akolongit naga. Kelalak tani Ngipilisti earitae!”

³¹Akolongit ngina, kidwanga kesi Ngipilisti, kitijwoto napei alo Mikimach tanang Aijalon. Esaa ngolo etililimiyorit akoro Ngisirael.

³²Tamatakinos kesi loboro lu aarunete alomoe. Tolemut ngamesekin ka ngaatuk tongola kaneni tanyama akiring na eyakasi ngaakot aapei.

³³Tolimokinae Saul kona, “Asechakis ngitunga Ekapolon Akuj, ani anyameta akiring eyakasi ngaakot.” Tolim Saul tama, “Imodeaka esi! Kikokoriutu amoru naapolon ni ayei ayong nege.”

³⁴ Sodi tolim nabo tama, “Kapesi lotunga tolimokis atamar yau itwaan daang aite keng kori emesek keng tongol kane tanyam. Nyiisechakis Ekapolon Akuj ani inyameta akiring na eyakasi ngaakot.” Abu itwaan daang akolongit ngina nakwaare toriku aite keng tongol kaneni.

³⁵Todukok Saul ekeno a ngakipeyos. Arai ekeno ngolo lo ekingaren adokini ngesi Ekapolon Akuj.

³⁶Tolim Saul tama, “Potu apana etijikisi Ngipilisti nakwaare, atodema ngiboro tanang iwalari, ataara kesi daang.” Tolimut ngitunga tamasi, “Tosubak ngakiro nacha kijoikinito iyong daang.” Nakaneni tolim emuron tama, “Potu mono engita Akuj.”

³⁷Sodi kingit Saul Akuj tama, “Alosi etijik Ngipilisti a? Kisidwangi iyong sua kesi a?” Nakaneni abu Akuj nyeetach ngakiro keng akolongit ngina.

³⁸Tolimok Saul ngikarikok a ngitunga tama, “Potu nege taanyut akisech na asubakin akolongit naga.

³⁹Ekongi ayong ani a Ekapolon Akuj ana eyari, ana eyuununi Ngisirael, atamar eario itwaan ni esechit daang tani kerai lokookang Yonasan!” Nakaneni abu itwaan daang kililing.

⁴⁰Sodi tolimok ngesi Ngisirael daang tama, “Towaa esi daang luche kaama, kiwei ayong ka lokookang Yonasan kane.” Tolimokis ngitunga Saul tamasi, “Tosubak ngakiro nacha kijoikinito iyong.”

⁴¹Kingit Saul Ekapolon Akuj tama, “Anukiro peitachea iyong ngakiro kang akolongit naga? Ekapolon Akuj na irai Akuj a Isirael, tatachu ngakiro kang a ngamoru ana italeunitoe. Ani kerai akisech aka Yonasan kori akang, kidodiu kotere Urim. Nakaneni ani kerai aka ngitunga Ngisirael, kidodiu kotere Sumim.”*g** Kidodiunae Yonasan ka Saul, tobuchun ngitunga.

⁴²Sodi tolim Saul tama, “Kidodiu tokona ani eyei lokookeng Yonasan ka ayong.” Kidodiunae Yonasan.

⁴³ Sodi kingit Saul Yonasan tama, “Anukiro isubit iyong?” Tatachu Yonasan tama, “Alemuni ayong akimiet a ao nadiochichi a akitoe ana atingit eir. Ayong logo acham akitu.”

⁴⁴Tolim Saul tama, “Kataar Akuj ayong erai pekiar iyong Yonasan!”

⁴⁵Nakaneni tolimokis ngitunga Saul tamasi, “Eario Yonasan lo ngoon arai ngesi ayuuni Ngisirael a? Mam! Kikong sua ani a Ekapolon Akuj ana eyari atamar nyechakar tani etimat epei anakou keng. Akuj engarakini ngesi anakiro ana asubio akolongit naga.” Apot ngitunga toyuut Yonasan nyear.

⁴⁶Ani erumor, tojongo Saul akiwapit Ngipilisti tobongosi Ngipilisti dang nakwap kech.

⁴⁷Ani eliwor Saul ekapolon a Ngisirael, kitiji ngimoe keng alowaitin kadaang. Abu kitiji ngitunga a Moab, ka Amon ta Edom. Kitiji ngikapolok a Soba ka Ngipilisti. Arai nacha itijikinio ngesi kesi, kidwang.[20]

⁴⁸Toji ngesi a ekileenu sodi kidwang tani Ngiamalek. Toyuu ngesi Ngisirael alojiesinei kadaang.

⁴⁹Talokookeng a Saul kesi Yonasan, ka Ichipi ta malikichua. Anyaritae nakookeng naapolon Merab, tanyaritetei naachi Mikal.

⁵⁰Aberu a Saul ngesi Ainoam na arai nakookeng a Aimaas, ekapolon a ngasigerea keng ngesi a Abiner lo arai lokookeng a apakeng a Saul aloochi alo anyaritae Ner.

⁵¹Kich lo arai apakeng a Saul, ka Ner lo arai apakeng a Abiner, araakasi talokookeng a Abiel.

⁵²Etijii Saul Ngipilisti lokojokon ngirwa daang lu ayarea ngesi. Arai nacha eriamunea ngesi ekile loa ngikilinga daang kori lokooson, abu kitiliwo asiger keng.