Read turkana 1 Samuel 16 Bible Online

1 Samuel 16 - turkana bible

1 Samuel 16

¹Tolimok Ekapolon Akuj Samuel tama, “Igoro iyong kotere Saul tanang ori, kitee iyong atamar anger ayong ngesi eliwor ekapolon a Ngisirael? Tolem akimiet adio tonyou tolot Betleem, nawi a itwaan enyaritae Yese kainyo aseu ayong lokookeng epei toliwor ekapolon.”

²Kingis Samuel tama, “Ekokini ayong alosi ai? Ani kiira Saul ngakiro nguna kaari ayong!” Tatachu Ekapolon Akuj tama, “Tolema itaok tolot tama, ‘Abu ayong akipeyokin Ekapolon Akuj.’

³Tanyarau Yese bu nakipeyos sodi kedodik ayong iyong ngakiro na isubakini. Idokakini iyong akimiet nakou a itwaan ani kalimokini ayong iyong toliwor ekapolon.”

⁴Tosubak Samuel ngakiro na alimokini Ekapolon Akuj ngesi, tolot Betleem. Pot ngikarikok a ere akisiriam ngesi emaranete tamasi, “Ibunit iyong akaalimon a?”

⁵Tatachu Samuel tama, “Abunit akaalimon. Abunit akipeyokin Ekapolon Akuj. Kitaleunos pot atoloto nikipeyoet.” Tolimok ngesi tani Yese ka talokookeng atamar kitaleunos, sodi tolimok atamar pot nikipeyoet.

⁶Ani epote kesi, kingolik Samuel lokookeng a Yese lo anyaritae Eliab, dio kitama bon tama, “Iteni dir lo aseu Ekapolon Akuj logo ewei alongaren keng.”

⁷Nakaneni tolimok Ekapolon Akuj ngesi tama, “Nyiimisik aoyau ka akibuseanu keng. Anger ayong ngesi, kainyo nyetee ayong loger lo iteeo itwaan. Itee itwaan akwaan nikalapatan nakaneni etee ayong etau.”

⁸Ani erumor tanyarau Yese Abinadab toriku nia Samuel. Tolim Samuel tama, “Mam. Nyeseuna Ekapolon Akuj tani logo.”

⁹Sodi toriku Yese Chama neni. Tolim Samuel tama, “Nyeseuna Ekapolon Akuj tani logo.”

¹⁰Toriku Yese talokookeng lukan-kaarei daang nia Samuel alorot alopei kangolo. Tolimok Samuel Yese tama, “Mam. Nyeseuna Ekapolon Akuj tani ipei kalu.”

¹¹Kingit Samuel Yese tama, “Eyakasi talokookon daang nege a?” Tatachu Yese tama, “Idongit loochi, nakaneni iyoki ngamesekin.” Tolimok Samuel Yese tama, “Tanyarau bu nege, kainyo nyikilemuni ngoni ngakipeyos eringa ngesi nyenanguna nege.”

¹²Abu Yese tomea itwaan anyaraun edia. Arai ngesi lokajokon a akwaan, lokebusean tojokak ngakonyen. Tolimok Ekapolon Akuj Samuel tama, “Tonyou kidokak akimiet nakou keng kainyo ngesi logo!”

¹³Tolem Samuel akimiet kidokak nakou a Daudi alongaren talokaatokeng. Abu etau a Ekapolon Akuj toloma nia Daudi atipei, kiruko ka ngesi akisiakin akolongit ngina jik. Ani erumor tobong Samuel Rama.

¹⁴Abu etau a Ekapolon Akuj toisik Saul, sodi tomeu Ekapolon Akuj etau loaronon toloma akichan ngesi.

¹⁵Tolimokis ngikasubak etich keng ngesi tamasi, “Kiyeni atamar abu etau loaronon ani a Akuj akichan iyong.

¹⁶Todungokinae tokona sua, ekapolon, atamar atasakutu itwaan ni eyeni akiram agita. Sodi toliwor nacha ebunio etau loaronon nikon, taram itwaan ngini agita, sodi tojoker iyong.”

¹⁷Sodi todungok Saul ngikasubak etich keng tama, “Tasakakinae ayong itwaan ni epedori akiram agita niajokon, kitorikokis.”

¹⁸Tolim epei a ngimeanara kaneni tama, “Eyei Yese loa ere a Betleem lokookeng lo eeono niajokon. Erai ngesi lokooson tarai lokebusean. Ejwono ngesi nabo eyeni ekiruor. Erukito Ekapolon Akuj ka ngesi.”

¹⁹Sodi tomea Saul ngitunga nia Yese ebala, “Nakinae ayong lokookon Daudi, lo iyoki ngamesekin.”

²⁰Tolem Yese esikiria iwokit ngamugati, ka etuo ileleba emuna, ta ikale, nak Daudi yaa nia Saul.

²¹Tolot Daudi nia Saul toloma lotich a Saul. Tominak Saul lokojokon, toseu toliwor ekatingan ngiboro keng lujiet.

²²Sodi tomea Saul ngitunga nia Yese ebala, “Kimiek Daudi kiboikin nege lotich kang, kainyo aminak ayong ngesi.”

²³Toliwor nacha ebunio etau loaronon ani Akuj, bu nia Saul, tolem Daudi agita keng taram. Sodi torotok etau loaronon ngolo, tojoker Saul nabo.