Read turkana 1 Samuel 17 Bible Online

1 Samuel 17 - turkana bible

1 Samuel 17

¹Tochunakis Ngipilisti ngajorei kech alosit lojie. Tochunakis lore a Soko, alo Yuda. Toloma kesi kiding Soko ka Aseka, ni enyaritae Epes Damim.

²Tochunakin Saul ka Ngisirael nadipo a Ela, kibaka esakete akitijikin Ngipilisti.

³Torekin Ngipilisti lowae epei a emoru, torekin Ngisirael lowae loche, min adipo kiding kech.

⁴Abu ekajwon epei enyaritae Golias lo ere a Gas, topud anajore a Ngipilisti, esaki akitijikin Ngisirael. Arai aoyau keng ngamitae esibit ngauni.

⁵Anapit ngesi apukot na asubunitae anasuat ananyang, tobutakina nakwaan asuat nanyang na arai apotis keng ngakiloi esibit ngatomwon-kan ka ngakan-kaarei.

⁶Aburit ngakejen keng a asuat ananyang. Atingit ngesi amorok na asubunitae anasuat ananyang ariongit aloseget.

⁷Alangir akwara keng ekoni akitoe nalangir na etokere ngiworui. Arai apotis a akou a akwara kangina ngakiloi ngakan-kaarei. Alosi asiger na atingit aupwal keng engareni ngesi.

⁸Towo Golias kirema tolimok Ngisirael tama, “Nyo isubete esi kaina, meere ejie iponito esi a? Arai ayong epei a Ngipilisti, iraakasi esi ngikedalak a Saul! Toseutu ekile anikus, bu atojwoto ka ayong.

⁹Ani kedwang ngesi ayong kataar, kiliwor sua ngikedalak kus. Ani kedwang ayong ngesi ataar, iliworosi esi ngikedalak kosi.

¹⁰Angasi tokona ayong ajore a Ngisirael, toseutu pan itwaan atojwoto ka ayong!”

¹¹Ani iirarete Saul ka ngitunga keng ngakiro nguna, tobul kesi noi, kipirisaaros.

¹²Arai Daudi lokookeng a Yese. Abunit Yese alo Betleem alowae alo enyaritae Epirasa. Ayei neni nakwap a Yuda. Ayakasi Yese ngide lusapa ngikan-kauni. Ngirwa lu araakar Saul ekapolon, tomojongite Yese noi.

¹³Alosito talokookeng a Yese luapolok luuni ka Saul lojie. Anyaritae ekiro aloapolon Eliab, totupak Abinadab, totupak Chama.

¹⁴Daudi ngesi arai loochi, Arai nacha elooso talokaatokeng luuni nia Saul,

¹⁵tobongo Daudi Betleem akiyok ngamesekin a apakeng.

¹⁶Angaseene Golias Ngisirael ataparach ka atabong daang esaki ejie a ngirwa a ngitomwon-omwon.

¹⁷Akolongit apei, tolimok Yese lokookeng Daudi tama, “Tolema ngalemet na epeitoe ngakiloi ngatomon. Kikomakinea inaa talokaatokon anadakar.

¹⁸Tolem tani ngatiaket natomon a akidietet nugu inaa ekapolon a ajore kech. Taanyu atamar ikote talokaatokon ai, sodi yau ibore idio ni idodiuni atamar ianyu iyong kesi, nabo ibooyete emam ngache aronok.

¹⁹Eyakasi ekapolon Saul ka talokaatokon ta Ngisirael luche daang nadipo a Ela ejiete ka Ngipilisti.”

²⁰Ani iwalari, tonyou Daudi nataparach elilim, toisikinea itwaan iche ngamesekin, sodi tolot yaa akimuj loger losek alimokinitor Yese. Ani enanguni Daudi nadakar, kisiriamik Ngisirael ni enyounioto alosit lojie, eramito elii a ejie.

²¹Tonyout ngajorei a Ngipilisti ka Ngisirael torekinos ekienyikina, esakete ejie.

²²Toisik Daudi akimuj anitwaan ani etee ngiboro. Tamatar Daudi lojie tolot nika talokaatokeng, kingitu atamar ikote kesi aliwae.

²³Ani eringa ngesi isuruori kesi, tachadun nabo Golias anajore kiira ngakiro keng.

²⁴Ani ingolikinete Ngisirael Golias, tobul tamataros.

²⁵Tolimokinos tamasi, “Ingolikis esi itwaan ni achadun ngin a? Kiirasi ngakiro na engasea ngesi Ngisirael! Einakini ekapolon Saul itwaan ni eari ngesi ebachit lokaalan, nabo ipotokini nakookeng kiut sodi kimiek ngitunga a awi a apakeng nyeebuk echur[23] alo Isirael.”

²⁶Tolimok Daudi ngitunga lu awaasi alodiyete keng tama, “Nyooni esubakinere itwaan ni eari Epilistit logo, tolema ngileech lugu alo Isirael? Erai mono tokona Epilistit lo erai ebukut logela logo nyo, imenyea ajore a Akuj ana eyari?”

²⁷Apon tolimokinae ngesi ngakiro na esubakinere itwaan ni eari Golias.

²⁸Abu lokaatokeng a Daudi loapolon lobe Eliab kiira Daudi isuruori ngitunga. Tongoik ngesi Daudi noi, tolimok tama, “Nyo ibunit iyong akisub kane? Ngae iisikinitor iyong ngamesekin nadikidio eya nariet? Ayeni ayong erasi lokon ka achamanikin nakon! Ibunit iyong nege akitere ejie.”

²⁹Tatachu Daudi tama, “Anukiro tokona asubak ayong? Ikwa nyapedori ayong akingita tani akiroit a?”

³⁰Torei Daudi nabo ni ayei itwaan iche kingit akiroit napei ngina. Nacha ingisea ngesi itwaan, tatachakinae akiroit napei ngina.

³¹Ani iirario ngakiro na eruoro Daudi, apon tolimokinae Saul. Tomea Saul ngitunga anyarare Daudi.

³²Tolimok Daudi Saul tama, “Ekapolon, nyeem itwaan Epilistit logo! Alosi ayong ekasuban etich kon etiji ngesi.”

³³Tolimok Saul Daudi tama, “Nyipedori iyong akitijwore Epilistit logo, kainyo eringa iyong idit, tarai ngesi ekajwon anajorei napei kolong eringa edit!”

³⁴Tolimok Daudi Saul tama, “Ekapolon, eyokiyeene ayong ngamesekin a apakeng. Nacha ebunio engatuny, kori ebu tadaka imesek,

³⁵ewapanakini ayong atachak, sodi atoyuu imesek. Ani na ereeunor etiengit ngolo nikang, erum emosiring ebunga ataar.

³⁶Aar ayong ekasuban etich kon ngingatunyo ka ngibuin dang, nabo aari tani Epilistit lo erai abukut logela logo, ani imenyea ngajorei a Akuj ana eyari.

³⁷Kayuu Ekapolon Akuj ayong alongatunyo ka ngibuin, kayuuni tani Alopilistit kalo.” Tatachak Saul tama, “Kape robo, irukete Ekapolon Akuj ka iyong.”

³⁸Tolem Saul ngiboro keng lujiet kitanap Daudi. Arai apukot na asubunitae anasuat ananyang, tobutokinae nakou a Daudi, nabo kitanap eworu losuat anakwaan.

³⁹Toenik Daudi ekileng a Saul kidiama ngiboro lu ejie anapit. Kisilek ngesi arotokin tokuruwo kainyo peanaikinit sek anapit ngiboro ngulu. Sodi tolimok Daudi Saul tama, “Nyapedori ayong ajio ngiboro lugu. Nyanaikinit sek ayong kesi.” Sodi tobuto ngesi ngiboro ngulu daang.

⁴⁰Tolem Daudi akitoe keng nakiyokiyet tolot ningolol toseu ngakaleuleui ngakan kirepak lochue keng. Tolem ngesi auno nakibaariet ngamoru, tolosio akitijwore Golias.

⁴¹Taapuu Epilistit ngolo nia Daudi, kingareni ekatingan aupwal keng ngesi. Kirudun ngesi jik.

⁴²Ani ingolikini Daudi, kimenya kainyo arai Daudi edia loajokon lokebusean.

⁴³Tolimok ngesi Daudi tama, “Aliwor ayong iingok kitingakinit iyong akitoe a?” Kisiak Epilistit ngolo akilam Daudi elimit ngakujo keng.

⁴⁴Tolimok ngesi Daudi tama, “Bua lopae nikang, ainak akwaan kon ngataruk ka ngitieng a moding tanyama.”

⁴⁵Sodi tolimok Daudi Epilistit ngolo tama, “Ibunit iyong nikang itingit ekileng ka akwara ta amorok, nakanen abunit ayong nikon alokiro a Ekapolon Akuj ana Epol Noi ana erai Akuj a ngajorei a Ngisirael ana imenyarit iyong.

⁴⁶Kesidwangi Ekapolon Akuj ayong iyong akolongit naga. Kaari ayong sodi atotubo akou kon. Ainakini ayong ngawat a ngasigerea a Ngipilisti ngataruk ka ngitieng a moding. Toyena ngitunga daang a ngakwapea atamar eya Ngisirael Akuj.

⁴⁷Toyena ngitunga lu eyakasi nege daang atamar meere ngilengea ka ngakwaaras eyuunea Akuj ngitunga keng. Ekapolon Akuj erai ekedwangan alojie nabo kisidwangi ngesi sua esi daang.”

⁴⁸Ani ikomauni Golias nia Daudi, tamatar Daudi atipei ni ajienere kisiriamia ngesi kitiji.

⁴⁹Kirepak ngesi akan lochue keng tout amoru, kibaarik Golias. Kimas amoru ngesi ngaren ereet tobwang akulului a akou. Kimasakin Golias kwap todo aloreet.

⁵⁰Sodi kidwang Daudi Golias taar a auno ana ibaariyere ngamoru ka amoru!

⁵¹ Tamatar Daudi towo alokidiama Golias tout ekileng keng anamuny totubo akou keng taar. Ani ingolikinete Ngipilisti atamar atoana ekajwon kech, tamataros.

⁵²Tonyout ngitunga a Isirael ka Yuda kiwapakis kesi iremasi, kiritasi jik tanang Gas,[24] tanang lodorin a Ekiron. Tadakanar Ngipilisti towanas, tadakanakin erot neni daang napei alo Chaaraim, tanang Gas ka Ekiron.

⁵³Ani ebongunete Ngisirael anakirisit Ngipilisti, tangatasi ngiboro anadakar kech.

⁵⁴Yaa Daudi akou a Golias Yerusalem, nakaneni kiwaak ngiboro a Golias lujiet loeam keng.

⁵⁵Na engolikinea Saul Daudi elosi akitijwore Golias, abu kingit Abiner lo arai ekarikon a ngasigerea keng tama, “Abiner, lokookeng mono a ngae ngol?” Tatachu Abiner tama, “Nyayeni ayong ekapolon.”

⁵⁶Todungok Saul Abiner tama, “Kape tongichu atamar erai ngesi lokookeng a ngae.”

⁵⁷Ani ebonguni Daudi ani aarea Golias, toriko Abiner ngesi nia Saul. Aringa Daudi etingit akou a Golias.

⁵⁸Kingit Saul ngesi tama, “Lodia lo, lokookeng a ngae iyong?” Tatachu Daudi tama, “Arai ayong lokookeng a Yese alo a Betleem, alo erai ekasuban etich kon.”