Read turkana 1 Samuel 19 Bible Online

1 Samuel 19 - turkana bible

1 Samuel 19

¹Tolimok Saul lokookeng Yonasan ka ngikasubak etich keng daang atamar asaki lokojokon akiar[25] Daudi.

²Sodi tolimok Yonasan Daudi tama, “Esaki apakang akiar iyong. Tochoikin robo moi nataparach, tolot toduk awache kiboikin inaa.

³Alosi ayong atowo alodiyete apakeng anamanat ani idukitor iyong, esuruor ngesi ngakiro kon. Ani keya ngakiro aanyuni ayong, ketaanyuni ayong iyong.”

⁴Kipuruu Yonasan Daudi ani a Saul tama, “Ekapolon, wara kare nyiisubea ekasuban etich kon Daudi naaronok, kainyo emam naaronok kisubakinea ngesi iyong, pearai ngakiro na asubaki ngesi daang nakingarakis iyong.

⁵Ajali ngesi akiyar keng akolongit na aarea Golias, sodi kisidwang ekapolon Akuj Ngisirael ngimoe kech. Ani ingolikini iyong ngakiro nguna, talakar. Nyo tokona isakea iyong asubea naaronok itwaan ni emam ibore esechit taar pas?”

⁶Kiira Saul ngakiro a Yonasan, sodi kikong tama, “Ekong jik tani Ekapolon Akuj, nyaari ayong Daudi.”

⁷Tanyarau Yonasan Daudi tolimok ngakiro nguna daang. Toriko ngesi Daudi nia Saul tosub etich a ekapolon loger lo kolong sek a ekingaren.

⁸Tojwoto nabo Ngisirael ka Ngipilisti. Kitijik Daudi kesi kidwang lokojokon, tamatarosi.

⁹Sodi bu etau loaronon ani a Ekapolon Akuj toloma nia Saul. Ebooyi ngesi alokai keng etingit akwara a akan, toyei Daudi dang neni taramite agita.

¹⁰Tasak Saul akibubukin Daudi losiep a akai a akwara, nakaneni tamatar Daudi tobuchar.

¹¹Akolongit ngina nakwaare, tomea Saul ngitunga akitere akai a Daudi, sodi taarere ngesi iwalari ataparach. Abu Mikal na arai aberu a Daudi kichikichik Daudi tama, “Ani pekisii iyong akolongit naga nakwaare, kiario iyong moi.”

¹² Sodi kiyooliu Mikal Daudi alopuke a akai, tamatar tosii.

¹³Tolem Mikal akuj nasubuna na ayei kai sodi kiperik lokitanda. Tolem ibore ni icholongi ni asubunitae a ngajul a ngaanei kiwaak nakou, sodi kimuk a ngiworui.

¹⁴Ani emeuni Saul ngitunga arikor Daudi, tolim Mikal tama, “Edeak ngesi.”

¹⁵Nakaneni tobua nabo Saul ngitunga aanyun Daudi ebala, “Kilepuleputu ngesi alokitanda, yaut nege sodi ataarea.”

¹⁶Ani epote ngitunga, toriamut akuj nasubuna ngina alokitanda, eyei ekicholong a ngaanei nakou.

¹⁷Kingit Saul Mikal tama, “Nyo kingalaa iyong ayong kona, kimiek emoit kang elosi tosii?” Tatachu Mikal tama, “Kalimokini ngesi ayong tama, kaari ayong iyong erai pekingarak iyong atosii.”

¹⁸Tobuchar Daudi tolot Rama ni ayei Samuel, sodi tolimok ngesi ngakiro daang na asubea Saul. Kirukosi ngesi ka Samuel toloto akiboi alo Naios.

¹⁹Tolimokinae Saul kona, “Eyei Daudi Naios alo Rama.”

²⁰Sodi tomea Saul ngitunga akirumun Daudi. Ani ingolikinete kesi[26] ngikadwarak a Akuj edwarete, erai Samuel ekarikon kech, toloma etau a Akuj lotunga a Saul, todwara tani kesi.

²¹Ani iirari Saul ngakiro nguna, abu nabo tomea ngitunga ngiche. Todwara tani ngulu. Tomea nabo Saul ngitunga na a ngauni, todwara tani ngulu.

²²Sodi tonyou ngesi elope alosit Rama. Ani enanguni nakuja na eyei Seku, kingis tama, “Aliwae eyakasi Samuel ka Daudi?” Tatachu itwaan ipei tama, “Eyakasi Naios alo Rama.”

²³Ani enyouni ngesi kaneni, toloma etau a Akuj nikeng, todwar ngesi erot neni daang tanang enanguni Naios.

²⁴ Tobuto ngesi ngiworui keng, todwar alongaren Samuel. Toper ngesi akolongit ngina emuner, akwaar ka apaaran. (Neni kolong etorunete ngalimuununet na ebeyo, “Aliwor Saul dang ekadwaran a?”)