Read turkana 1 Samuel 2 Bible Online

1 Samuel 2 - turkana bible

1 Samuel 2

¹Kilip Ana tama, “Elakara etau kang noi ani a Ekapolon Akuj. Alakara ayong kotere na asubaki ngesi! Akianar ayong ngimoe kang. Alakara ayong ani kengarakinea Akuj!

²“Emam iche italeuno loger a Ekapolon Akuj, emam iche ikwaanatar ngesi, emam ataaba ikwaan ka Akuj yok.

³Tojongo akinisa iruoro, Kimiek ekiwog lokon, Kainyo eos Ekapolon Akuj, itemeene ngakiro na esubete ngitunga daang.

⁴Abilibilaar ngakawa a ngasigerea anakajwok, nakaneni agogongioto lupalag.

⁵Ngitunga lukolong emwokito, asaka tokona ngitichisio lu eanyuneta akimuj, nakaneni lukolong anyamit akoro, ajongo akoro anyamit. Edou aberu nakolup ngide ngikan-kaarei, Nakaneni edong aberu nakaalan a ngide emam tani ipei.

⁶Ekapolon Akuj ngesi eari ka akiteyar, ngesi eyaanari ngitunga lokatoak, dio nabo akiteyarun.

⁷Ekapolon Akuj itiliwonori ngitunga ngiche ngikebootok, dio kitabar ngiche. Itiliwonori ngitunga ngiche lu nyeyenikinitae, kitiliwo ngiche lu eyenikinitae.

⁸Ikeununi lukebootok anapua, kitonyou alokuron ni ibat ngakan ilipanar, kisiboik kesi ka ngikapolok wapei nia arimatoi. Ngapirio na ewaar akwap ngaka Ekapolon Akuj. Iyoki ngesi akwap alokidiama kech.

⁹“Iyoki ngesi elote alu emunosi ngesi, nakaneni engopikinete luaronok naribu, kainyo nyidwangi itwaan a agogongu keng a ilope.

¹⁰ Emunyario ngimoe a Ekapolon Akuj. Ebuni agiro keng anadis, bu kidiama kech. Irirae Ekapolon Akuj ngakwapea daang, Einakini ngesi ekapolon keng agogongu. Itiliwor ngesi ekapolon keng loseuna ekedwangan.”

¹¹Ani erumor tobongo Elikana nawi keng na ayei Rama. Nakaneni kidong Samuel ni anyaritae Chilo tosub etich a Ekapolon Akuj ani eyei Eli lo arai emuron a Akuj.

¹²Araakasi talokookeng a Eli ngitunga luaronok. Peakerito kesi Ekapolon Akuj,

¹³kori peewapito kesi etal a ibore ani alemanari emuron alotunga. Pearai abu toliwor nacha elosio itwaan akipeyore, bu ekasuban etich a emuron etingit akaloboch na a ngikel a nguuni. Ani eringa akiring ekulae,

¹⁴kirepak ngesi akaloboch namot, ani ibore daang ni cha ichumuni akaloboch, toliwor ika emuron. Ngakiro nguna kesi asubeenere Ngisirael daang lu aponeenete Chilo akipeyore.

¹⁵Aapei kanguna, arai ani eringa nikatoronon nyinoma, abuneene ekasuban etich a emuron nitwaan ni ipeyoe tama, “Nakinae akiring na epeyi emuron, kainyo nyechamuni ngesi akiring na itukulat iyong, esaki na ejon bon.”

¹⁶Ani ketachu itwaan tama, “Kimiek enoma mono nikatoronon, ani erumor tolema akiring etiae lo cha isaki iyong.” Tolim ekasuban etich a emuron tama, “Emam! Ejoikinit iyong kiinakini ayong tokona! Ani kemam, katodema!”

¹⁷Arono akisech na asubete talokookeng a Eli naga noi alongaren Ekapolon Akuj, kainyo pearimasi kesi ngalemunet a Ekapolon Akuj.

¹⁸Asubi Samuel etich a Ekapolon Akuj, enapit akaluwat nawaru.

¹⁹Asubanakini itiokeng ngesi iwaru nikooyen, sodi inaa ngesi na cha elooso ka lokile keng akipeyore ekaru daang.

²⁰Arai na erumoror topia Eli Elikana ka aberu keng tama, “Kiinak Ekapolon Akuj iyong ngide anaberu kana kilunyokinos nados a idia ani iinakis esi Ekapolon Akuj.” Ani erumor tobongosi kesi nawi.

²¹Topia Ekapolon Akuj Ana sodi ngide lusapa ngiche nguuni ka lupesur ngiarei. Topolou Samuel esubi etich a Ekapolon Akuj.

²²Abu Eli tomojong lokojokon. Topup ngesi ngakiro daang na asubeta talokookeng Ngisirael. Kiira tani atamar etepereenete kesi ngaberu na asubete etich anakituk a eam a Ekapolon Akuj.

²³Kingit ngesi kesi tama, “Nyo isubeta esi ngakiro na ikote ne? Eira ayong alotunga kadaang ngakiro naaronok isubete esi.

²⁴Kimiekisi nguna, talokoku! Eroko ngakiro na apupi ayong ngitunga a Ekapolon Akuj iruorosi.

²⁵Ani kesechaki itwaan niche, eyuuni Akuj ngesi, nakaneni ani kesechaki itwaan Ekapolon Akuj, ngae eyuuni itwaan ngini?” Nakaneni apot kesi nyiirasi ngakiro a apakech, kainyo atiakunit Akuj atamar aari kesi.

²⁶ Abu Samuel topolou, sodi tominak Ekapolon Akuj ngesi. Apot tani ngitunga tominakis ngesi.

²⁷Bu ekadwaran a Akuj nia Eli tolimok tama, “Ebala Ekapolon Akuj kona, ‘Edodiun kolong ayong ani Aron alo erai apaakon nakolong araakatar ngesi ka ngitunga a awi keng ngikedalak ekapolon a Misiri.

²⁸Atoseu ayong ngitunga a awi keng alotela a Ngisirael kadaang, atoseu toliworos ngimurok kang, tosuba etich alokeno alo kepeyonokinere ayong. Toliworos inomete emitina, ka akinap akaluwat*g** alongaren kang. Ainak ayong kesi ngakipeyos na inomio, nakalemanakinete ayong Ngisirael.

²⁹Nyo tokona itororokanitor iyong akook anakipeyos ka ngalemunet na elemuununete ngitunga kang? Eli, nyo mono irimar iyong talokookon akidwang ayong, kimiek etumakinete lonerin luajokak a ngakipeyos kang kadaang ana kepeyonokinete ngitunga kang?

³⁰Alimuni kolong ayong Ekapolon Akuj na arai Akuj a Ngisirael atamar, ngitunga a awi kon ka lu emachar kon, esubete etich kang eraakasi ngimurok jiik, nakaneni alimu tokona ayong atamar nyeringa nabo kesi eliworosi ngimurok! Arima ayong lu karimasi ayong, sodi emenya lu kemenyarito ayong.

³¹Topupok, enangi ngirwa lu aarea ayong ngikiliok lusorok alotunga a awi kon, ka lu a emachar kon, sodi tongop ekile a awi kon lo etoani emojongit.

³²Ichanakin iyong sodi kiraka etereku kotere apiaro na epiarere Ngisirael luche, nakaneni emam nabo jik itwaan a awi kon ni etoani emojongit.

³³Nakaneni emiekini ayong epei a ngalesea kon toyar toliwor emuron kang. Emudukani ngesi sodi tajal ngakiro daang, nakaneni eario ngalesea nache daang.

³⁴Ngakiro nugu kidodikinete iyong atamar iyookinosi ngakiro na eruoro ayong. Etoakete Opini ka Pineas akolongit apei.

³⁵Aseuni ayong emuron kang lo eliwor kamuno ayong ka akisub ngakiro daang na asaki ayong ngesi tosub. Ainakini ayong ngesi ngalesea na esubete etich alongaren ekapolon kang loseuna.

³⁶ Ngalesea kon na idongete eyarete, eloose lomuron ngolo kilipa ngesi ngaropiyae ka akimuj. Kilipas nabo atamar arai kimiekin atosuba etich a ngimurok a Akuj, ataanyuneta ibore ninyamat.’ ”