Read turkana 1 Samuel 20 Bible Online

1 Samuel 20 - turkana bible

1 Samuel 20

¹Ani erumor todok Daudi alo Naios ani eyei Rama, nia Yonasan tolimok tama, “Anukiro asubit ayong? Nyooni asechakinit ayong apa kon esakea ngesi akiar ayong?”

²Tolim Yonasan tama, “Nyikote neni. Nyitoani iyong. Kalimonokini apakang ayong ngakiro daang na esubi ngesi, kepolok kori kemam. Ikokini apakang kedai ayong ngakiro nguna ai? Nyikote neni!”

³Nakaneni tatachu[27] Daudi tama, “Eyeni apakon atamar kimina iyong ayong, itami ngesi ebala, ‘Kimiekisi Yonasan nyeanyu ngakiro nugu nyiialolong.’ Nakaneni iteni, ekongi ayong alokiro a Ekapolon Akuj atamar aapiki ayong akitu!”

⁴ Tolim Yonasan tama, “Kasubea ayong iyong ngakiro nacha isaki iyong daang.”

⁵Tolimok Daudi Yonasan tama, “Eyei moi esukukuu lo eanyungarere elap, echamitae ayong kimuji ka ekapolon aapei. Nakaneni kimiekinae ayong atolot atoduk anamanat tanang ebong a akolongit ana ngauni.

⁶Ani keituni apakon ayong, tolimok ngesi kona, ‘Kemaimai Daudi ayong esaki akikirikiraar Betleem nawi kech, kainyo anang ngirwa lu ipeyoo awi kech daang ngakipeyos na a ekaru.’

⁷Ani ketama ngesi, ‘Itemokino,’ ejokearosi ngakiro alokasuban etich kon. Nakaneni ani kengo ngesi, toyen atamar asak asubakinea ayong naaronok.

⁸Kongina bocha, tosubere ayong naajokak, ani kolong kichamakinor ngoni alongaren Akuj. Nakaneni ani kasechit ayong, taarae iyong ilope! Nyo kirikoritor iyong ayong nika apakon kataar?”

⁹Tatachak Yonasan ngesi tama, “Tojongo alimit ngakiro nguna! Arai atoyeni ayong atamar esaki apakeng akiwan iyong, pekalimokinit ayong iyong a?”

¹⁰Sodi kingis Daudi tama, “Ngae kalimokini ayong erai kitachanak apakon iyong ngakiro engoit?”

¹¹Tolim Yonasan tama, “Bua apana atoloto namanat.” Sodi toloto kesi

¹²Tolimok Yonasan Daudi tama, “Kimiek Ekapolon Akuj na erai Akuj a Isirael toliwor akaanyunan yok! Esaa lo ikoni logo moi, kori akolongit nache engitanari ayong apakang ngakiro. Ani kengolik ayong ngesi peekadakinit ekiro kon, kalimokini ayong iyong.

¹³Ani kesaki ngesi akiwan iyong kimiekisi Ekapolon Akuj kataar ayong erai kawou ayong alimokin iyong, sodi kengarak iyong tobuchar. Irukete Ekapolon Akuj ka iyong loger lo erukioto ka apakang.

¹⁴Ani eringa ayong ayari, kirichak akichikakinet kon anikang, nabo kitosubea na iteni, nakaneni ani katoana[28] ayong,

¹⁵tosubea ngitunga a awi kang ngakiro na iteni nguna jik. Ani emunyari Ekapolon Akuj ngimoe kon daang jik,

¹⁶ kidong achamun nakichamakin ayong ka iyong na nyepalikinio. Ani kepalikin, kirirae iyong Ekapolon Akuj.”

¹⁷Abu Yonasan kisikong nabo Daudi atamar tominak ngesi, kainyo amina Yonasan Daudi loger lo aminar ngesi akwaan keng a ilope.

¹⁸Sodi tolimok ngesi Daudi tama, “Aloger eyakar moi esukukuu lo eanyungarere elap, kiitunio iyong anakimuj.

¹⁹Ani akolongit na a ngauni, kiitunio iyong noi. Kape bocha ni ngoon idukitor toduk kayaaye ngamoru na etukokina[29] neni.

²⁰Agumari ayong ngimalea nguuni namoru nguna, tosub kori ngamoru asaki akigum.

²¹Ani erumor alimokini ayong ekasuban etich kang atama, ‘Kape tolem ngimalea.’ Ani katama ayong ngesi, ‘Kingolik a, eyakasi ngimalea lowae lokalaalo iyong tolem,’ toyen atamar emam naaronok eyakasi, topud nikalapatan. Ekongi ayong alokiro a Ekapolon Akuj ana eyari atamar emam ngakiro naaronok ianyunotor iyong.

²²Nakaneni ani kalimok ayong edia ngolo atama, ‘Kingolik a, eyakasi yaaye kon,’ tonyou tolot kainyo ebala Ekapolon Akuj iyong kape.

²³Ani anakiro anakipupokin ngoni, kirukit ngoni ka Ekapolon Akuj kisirichakini ngoni ngakiro nguna jik.”

²⁴Sodi toduk Daudi anamanat. Ani enangi akolongit a esukukuu alo eanyungarere elap, bu ekapolon Saul nakimuj.

²⁵Kiboikin ngesi lokicholong lopalem keng lo egongakina losiep a akai. Kiboikin Abiner diyete keng, sodi kiboikin Yonasan lokicholong lo akienyikina ka lo a Saul.[30] Nakaneni amam itwaan ebooyi alokicholong a Daudi.

²⁶Emam ngakiro abu Saul tolim akolongit ngina kainyo etamit ngesi abala, “Eya ngakiro kesubakin ani a Daudi, nyitaleuno ngesi.”

²⁷Ani akolongit na atupit ngina, na arai akolongit na a ngaarei aanyungarere elap, aringa ekicholong a Daudi emam itwaan ibooyo. Sodi kingit Saul Yonasan tama, “Kotere nyo peabunio Daudi nakimuj been ka akolongit na?”

²⁸Tatachak Yonasan Saul tama, “Kemaimai Daudi ayong atamar emiek ngesi tolot Betleem.

²⁹Abala ngesi, ‘Kimiekinae kare ayong atolot kainyo ipeyoete ngitunga a awi kosi esukukuu lo a ngakipeyos alore. Adungu lokaatokang atamar atolot ayong inaa. Tokona bocha, ani kijoikinito iyong ngakiro kang, kimiekinae atolot ataanyu talokaatokang!’ Ngakiro nguna kesi emamakar Daudi anipalem ibooyo alomeesa kon.”

³⁰Sodi tongoik Saul Yonasan noi tolimok tama, “Iyong lokookeng a aberu anakaronon ana nyepupi ngakiro! Ayeni ayong atamar ibakito iyong ka Daudi yaunea ngileech nikon ka itiokon!

³¹Nyiyeni iyong atamar ani cha eringa Daudi eyari nyiliwor iyong ekapolon a akwap kana? Kape tokona toriku ngesi nege, kainyo ejoikinit ngesi etoani!”

³²Tatachak Yonasan apakeng tama, “Kotere nyo earere ngesi? Anukiro asubaki ngesi?”

³³Abu Saul toremo akwara keng nia Yonasan esaki akiar ngesi. Toyen Yonasan atamar iteni esaki Saul akiar Daudi.

³⁴Tonyou Yonasan alomeesa engoit ilileba. Nyimuja ngesi akolongit ngina na a ngaarei esukukuu, kainyo ealolongi ngesi kotere Daudi ani asubea Saul Daudi niaronon.

³⁵Ani iwalari ataparach, tolot Yonasan naroatin nisek echikakina akiriamun ka Daudi kirukosi ngesi ka edia losorokit.

³⁶Tolimok ngesi edia tama, “Tamatar kidepuunu ngimalea lu agumari ayong.” Kipungar edia, ani eringa edia ekeri, toguma Yonasan emal ngaren keng.

³⁷Ani enanguni edia ni ayei emal lo agumari Yonasan tanyara Yonasan ngesi tolimok tama, “Abe emal bo yege alongaren kon!”

³⁸Tolem edia emal tolosio nia ekapolon keng,

³⁹peeyeni eger a ngakiro ana asubasi. Yonasan ka Daudi make ayenete eger a ngakiro kanguna.

⁴⁰Nak Yonasan edia ngiboro keng lujiet tolimok tama, “Yaa ngiboro lugu lore.”

⁴¹Ani kerotoki edia kerumor, tonyou Daudi kayaaye ngamoru na asenokino[31] tadakakin kwap tatap ereet ngalup ngatapet ngauni. Tonuakinos ngesi ka Yonasan kikalout daang. Ealolongi Daudi noi akidwang Yonasan.

⁴²Sodi tolimok Yonasan Daudi tama, “Kape nikaalimon, kotere eger lo kikongio ngoni luarei a ekiro a ‘Ekapolon Akuj, kisirichakini ngoni Ekapolon Akuj achamunet nakajik ngina kikong ngoni, Isirichakini ngesi tani ngalesea yok jik.’ ”