Read turkana 1 Samuel 21 Bible Online

1 Samuel 21 - turkana bible

1 Samuel 21

¹Tolot Daudi lore lo anyaritae Nob ni ayei Aimelek lo arai emuron a Akuj. Topud Aimelek bu akisiriam Daudi emarani, kingis tama, “Kotere nyo ibunitor iyong alopei?”

²Tatachak Daudi emuron tama, “Kameunit ekapolon ayong asubakin ngakiro ngache, katolimok ayong tama, ‘Wara itwaan nyeeyen ngakiro nakamearit ayong iyong akisub.’ Alimok ayong ngikiliok lurukitos kang atamar eriamar wache.

³Eyei tokona ibore itingit iyong a? Nakinae ayong ngamugati ngakan kori ibore cha daang ni itingit iyong.”

⁴Tatachak emuron Daudi tama, “Emam ngamugati ngache atingit ayong pearai ngamugati na italeunitoe. Ipedorete esi akinyam erai robo pekeringa ngirukitos kon nyepero ka ngaberu.”

⁵Tatachak Daudi emuron tama, “Iteni nyepero ngirukitos kanga ka ngaberu. Italeunosi ngirukitos kang tani palem eloose lotich losek esubeenete. Ani bo tokona na emenitere kona, italeuno kesi noi!”

⁶ Sodi tolem emuron ngamugati na etaleunitoe na alemanakinio Akuj. Alemunio ngamugati nguna alomeesa a Akuj italeuno kilunyokinae ngache na aringa emoka. (

⁷Akolongit ngina ayei itwaan neni ni arai ipei a ngikasubak etich a Saul. Eratakinitae ngesi kaneni kainyo aya ngakiro a Akuj na asakitae ngesi tosubak. Anyaritae ngesi Doeg. Abunit Doeg alo Edom. Arai ngesi ekapolon a ngikeyokok a Saul.)

⁸Tolimok Daudi Aimelek tama, “Emam akwara kori ekileng itingit iyong kane lo apedori alemar a? Nyeyauna ayong ekileng kang kori ngiboro lujiet kainyo ekirikirakin ayong kotere ngakiro a ekapolon.”

⁹ Tatachu Aimelek tama, “Eyei nege ekileng a Epilistit alo kolong iari iyong anadipo a Ela, alo enyaritae Golias. Eyei yaaye akaluwat, emukeikinitae nawaru. Ani kisaki iyong, tolema kainyo emam ekileng eche pearai ngolo bon.” Tolim Daudi tama “Nakinae emam ekileng eche ejok noi idwangit ngolo!”

¹⁰Tonyou Daudi akolongit ngina tamatar ani a Saul, tolot nia Akich alo arai ekapolon a Gas.

¹¹ Apot ngikasubak etich a Akich tolimokis Akich tamasi, “Meere logo Daudi lo erai ekapolon anakwap keng a? Ngesi lo kolong enyiakanareta ngaberu eeosi ebalasi, ‘Aar Saul ngabunge, nakaneni aar Daudi ngabunge nakaalak.’ ”

¹²Kitimo Daudi ngakiro nguna toem ngesi Akich.

¹³Sodi kiroko Daudi eboyor eche alongaren kech, kiyechak atamar kekerepikinit. Ani esakio akiratakin, tosub ngesi ngakiro a itwaan ani ekoporito ngikerep. Kigir ngidorin a ere, talakak akajoolat eleleari tanang najul a abokony.

¹⁴Sodi tolimok Akich ngikasubak etich keng tama, “Oitiakoi! Abe ekoporito bo ngikerep itwaan en! Nyo irikunitotor esi ngesi nikang?

¹⁵ Kangopikinito sek ayong ngitunga a ngikerep irikunitotor esi logo akisub abangaanut alongaren kang, tolomu tani kai kang a?”