Read turkana 1 Samuel 23 Bible Online

1 Samuel 23 - turkana bible

1 Samuel 23

¹Apon Daudi tolimokinae kona, “Ayoro, etijikis Ngipilisti ngitunga a ere a Keila, nabo akokoyasi ngalemet nakitet.”

²Sodi kingit Daudi Ekapolon Akuj tama, “Alosi etijik Ngipilisti lugu a?” Tama Ekapolon Akuj, “Ee, kape kitijik Ngipilisti toyuu ngitunga a ere a Keila.”

³Nakaneni tolimokis ngitunga a Daudi ngesi tamasi, “Eger lo tokona kiemitor ngoni kane alo Yuda, nyikiemi ngoni noi erai kilot Keila akitijwore ngasigerea a Ngipilisti a?”

⁴Sodi kingis Daudi nabo ani a Ekapolon Akuj. Tatachak Ekapolon Akuj ngesi tama, “Tonyou tolot Keila kainyo kesidwangi ayong iyong Ngipilisti.”

⁵Sodi tonyout Daudi ka ngitunga keng toloto Keila kitijikis Ngipilisti. Taara kesi Ngipilisti lukaalak sodi tolemasi ngibaren kech. Eger ngolo ngesi ayuunea Daudi ngitunga a ere a Keila.

⁶Ngirwa lu asia Abiasar lokookeng a Aimelek, tolot akiruk ka Daudi alo Keila, abu ngesi toting akaluwat napalem a emuron a Akuj.

⁷Tolimokinae Saul atamar alot Daudi Keila. Tolim Saul tama, “Ariku Akuj ngesi nakan kang sodi edwang, echiak ngesi bon eloit ani alomarea lore lo edukokinitae awas togolitetei.”

⁸Abu Saul tanyarau ngajorei keng lojie alosit akirem ngitunga a Keila, sodi tapaka ngajorei kiriama Daudi ka ngitunga keng.

⁹Ani iirari Daudi atamar esaki Saul akitijikin ngesi, abu tolimok Abiasar lo arai emuron a Akuj tama, “Yau akaluwat ngina nege.”

¹⁰Sodi tolim Daudi tama, “Ee Ekapolon Akuj na irai Akuj a Ngisirael, eira ayong atamar esaki Saul abunere Keila akinyasun ere kotere ayong lo arai ekasuban etich kon.

¹¹Kepotorete ngitunga a Keila ayong kepotokis Saul a? Ebuni Saul nege loger lo eirarea ayong a? Ee Ekapolon Akuj na irai Akuj a Isirael, kemaimai atamar tolimokinae kare!” Tatachu Ekapolon Akuj tama, “Ebuni Saul.”

¹²Sodi kingit Daudi tama, “Kepotorete ngitunga a Keila ayong ka ngitunga kang kepotokis Saul a?” Tatachu Ekapolon Akuj tama, “Kipotorete.”

¹³Sodi tonyout Daudi ka ngitunga keng lu asibit ngamiae ngakan-kapei, torotokis alo Keila atipei, toloto wadaang nicha apedorete kesi alosit. Ani iirari Saul atamar asii Daudi alo Keila, abu Saul tasalu alosit Keila.

¹⁴Toduk Daudi anakwap ana ngimukur anariet ana eyei diyete Sip. Aripi Saul ngirwa daang erot lo eanyunea ngesi, nakaneni abu Akuj kimik ngesi Daudi.

¹⁵Toyen Daudi atamar esaki Saul akiar ngesi. Ayei Daudi Orech ni ayei diyete ariet a Sip.

¹⁶Tonyou Yonasan lokookeng a Saul tolot nia Daudi alo Orech sodi kitititiny Daudi tolimok eger lo epedorea Akuj akiyok.

¹⁷Tolimok Yonasan Daudi tama, “Nyiiem, nyepedori apakang akiwan iyong. Eyeni Saul dang atamar iliwor iyong ekapolon a Isirael, katotupak ayong iyong anapolou.”

¹⁸ Kichikakinos kesi luarei alongaren Ekapolon Akuj atamar kiliwor ngipaalon. Kidong Daudi Orech, tobong Yonasan nawi.

¹⁹Toloto ngitunga a Sip nia Saul alo Gibea tamasi, “Edukit Daudi anakwap kosi ani enyaritae Orech, alomoru a Akila, alokuju ariet na Yudea.

²⁰Aloger isakitor iyong lokojokon akirumun ngesi, bua tokona ekapolon, sodi epotosi sua ngesi kirum iyong.”

²¹Tolim Saul tama, “Kitopia Ekapolon Akuj esi ani idodiuneta esi ngisien anikang!

²²Toloto nabo tongichitu nidira eyei ngesi ka itwaan ni engolik ngesi, kainyo kalimokin ayong atamar emodeana ngesi noi.

²³Tongichitu lokojokon ni edukeenea ngesi, tobongut nikang kiinut ngakiro na iteni. Sodi erukosi ayong ka esi, ani keringa ngesi eyei nakwap ngina, atasak ayong ngesi nakwap daang a Yuda.”

²⁴Apot kesi tonyout tobongo Sip, kingarenikis Saul. Ayakasi Daudi ka ngitunga keng nariet a Maon, ayakasi kesi nadipo naasilon eyei kuju ariet na a Yudea.

²⁵Toloto Saul ka ngitunga keng akisak Daudi. Ani iirari Daudi atamar kasakio ngesi, abu tolot nimukura nia ngatabab ni eyei nariet toduk kaneni. Ani iirari Saul atamar alot Daudi inaa, abu kiwapak.

²⁶Tolot Saul lowae epei a emukura, toyakas Daudi ka ngitunga keng lowae loche a emukura. Ekirikirasi Daudi ka ngitunga keng esakete akilany Saul ka ngitunga keng kainyo apot Saul ka ngitunga keng todolo Daudi ka ngitunga keng esakete akirumun.

²⁷Ani anipei, todolu itwaan nia Saul tama, “Tobongu atipei! Aremo Ngipilisti akwap!”

²⁸Sodi kimiek Saul akiwapit Daudi tobongo akitijwore Ngipilisti. Ngakiro nguna ngesi enyaritere neni Ataaba nasiet.[34]

²⁹Tolot Daudi nakwap a Engedi toduk kaina.