Read turkana 1 Samuel 24 Bible Online

1 Samuel 24 - turkana bible

1 Samuel 24

¹Ani ebonguni Saul ani etijio Ngipilisti, apon tolimokinae kona, “Eyei Daudi nariet na eyei diyete Engedi.”

²Sodi toriko Saul ngasigerea nakajwok alo Isirael ngabunge ngauni. Toloto ngesi ka ngitunga keng akisak Daudi alo kide ni enyaritae ngatabab a Atirikiki.

³Tanangu ngesi naburibur ache ni ayakasi nganokin a ngamesekin alodiyete erukudi. Tolot Saul kinga akingarakin kaneni. Naburibur napei ngina ngesi adukitotor Daudi ka ngitunga keng anagule a ache alotooma noi.

⁴Tolimokis ngitunga a Daudi ngesi tamasi, “Akolongit naga ngesi nakolong kilimokinit iyong Ekapolon Akuj ebala, ‘Ewaakini ayong emoit kon nakan kon, tosubea ngesi ngakiro cha daang na kijoikinete iyong.’ ” Toliaa Daudi sodi totub echilet a eworu a Saul peeyeni ilope.

⁵Nakaneni abu Daudi kichanakin alotau keng ani atubunio eworu a Saul.

⁶Tolimok Daudi ngitunga keng tama, “Kimiekisi Ekapolon Akuj keratak ayong nyaawan ekapolon lokolong aseuni Ekapolon Akuj! Nyejoikinit ayong awani ngesi tani wadiochichi, kainyo erai ngesi ekapolon lo aseuni Ekapolon Akuj!”

⁷ Sodi kimaima Daudi ngitunga atamar nyiitijikis Saul. Tonyou Saul topudo anaburibur, torotok.

⁸Ani erumor kiwapak Daudi ngesi tanyara tama, “Ekapolon!” Toreeun Saul kaku. Abu Daudi kijuuru tatap ereet ngalup, idodiunit arimatoi.

⁹Tolimok Daudi Saul tama, “Nyo ipupio iyong ngakiro a ngitunga alu ebalasi asaki ayong akiwan iyong?

¹⁰Nakaneni ingolik tani iyong elope atamar tokona anaburibur abu Ekapolon Akuj kiwaak iyong nakan kang. Apot ngitunga ngiche katolimokis ayong atamar taar iyong, nakaneni abu ayong pena ngisien anikon, atama ayong nyakawani iyong tani wadiochichi kainyo iyong kolong kiseuni Ekapolon Akuj toliwor ekapolon.

¹¹Apa, kingolik echilet a eworu kon logo anakan kang! Adikino ayong kaari iyong, nakaneni atotub ayong echilet a eworu bon. Ejoikinit ngakiro na asubak ayong kitunupete iyong atamar nyasaki ayong akinger iyong akiwan iyong. Kirisit iyong ayong isaki akiar, tarai bo tani emam ngakiro naaronok kasechakinit ayong iyong.

¹²Kimiekisi Ekapolon Akuj totiaku atamar ngae anikon ka ayong esechit. Kimiek ngesi kirira iyong kotere ngakiro nakisubea iyong ayong, kainyo nyakawani ayong iyong tani wadiochichi.

¹³Iyeni iyong ngakamatak nangorok ebeyo, ‘Ngitunga luaronok kesi esubete ngakiro naaronok.’ Aloger kangolo, nyakawani ayong iyong.

¹⁴Iwapit ekapolon a Isirael ngae? Etia ibore irisit iyong ai? Iwapit iyong iingok nikatoan! Eechut!

¹⁵ Etiakuni Ekapolon Akuj itwaan ni esechit aniyok. Kimiek ngesi kingolik ngakiro nugu, katoik ayong, katoyuu ani iyei iyong.”

¹⁶Ani erumori Daudi akisuruor Saul ngakiro nguna, tolimu Saul tama, “Daudi, iyong dir itwaan lokoku a?” Kisiak Saul akigoro.

¹⁷Sodi tolimok Saul Daudi tama, “Nyisechit iyong, asechit ayong. Kisubea iyong ayong ngakiro naajokak, tarai kasubea ayong iyong iyong naaronok!

¹⁸Idodiu iyong akolongit naga atamar ijok iyong anikang, kainyo ibu iyong nyikear ayong, tani nakewaakinea ayong Ekapolon Akuj nakan kon.

¹⁹Kainyo itwaan ani irumuni emoit keng, tajalu kimiek elosi akaalimon? Kitopia Ekapolon Akuj iyong kotere nakisubea iyong ayong akolongit naga!

²⁰Ayen tokona ayong dir atamar iliwor iyong ekapolon a Isirael, nabo erubakini apolou ngina anakan kon.

²¹Kikong tokona anikang alokiro a Ekapolon Akuj atamar imiekini iyong ngalesea kang toyara nyeengopiarea ekiro kang ka lo a ngiyenet kang.”

²²Kikong Daudi ani a Saul atamar asubakini nguna. Ani erumor tobongo Saul nawi. Tobongosi Daudi ka ngitunga keng ni adukitotor.