Read turkana 1 Samuel 26 Bible Online

1 Samuel 26 - turkana bible

1 Samuel 26

¹Apote ngitunga ngiche a ere a Sip, pot nia Saul alo Gibea tolimokis Saul tamasi, “Edukit Daudi alomoru a Akila, alokeli a ariet a Yudea.”

²Tonyou Saul atipei tolot kwap nariet a Sip, kirukosi ka ngasigerea nakajwok alo Isirael ngabunge ngauni, toloto asakar Daudi.

³Tolom adakar a Saul lokwaas a erukudi, alomoru enyaritae Akila. Aringa Daudi eyei nariet, ani iirari ngesi atamar ebunit Saul akisak ngesi,

⁴tomea ngesi ngirototin aanyun atamar eyei Saul neni dir.

⁵ Tonyou Daudi atipei tolot nia Saul. Taanyu ngesi ni aperioto Saul ka Abiner lokookeng a Ner, lo arai ekarikon a Ngasigerea a Saul. Aperi Saul alotooma adakar, kiriamito ngasigerea keng ngesi.

⁶Ani erumor kingit Daudi Aimelek lo arai eka ekitela a Ngiiti ka Abichai lo arai lokaatokeng a Yoab (itiokech ngesi Seruya), tama, “Ngae anikus kirukori ka ayong nadakar a Saul?” Tatachu Abichai tama, “Kirukori ayong ka iyong.”

⁷Apot Daudi ka Abichai tolomasi akolongit ngina nadakar a Saul, toriamut Saul ejotoe alokiding adakar, edupakina akwara keng nalup diyete akou keng.

⁸Tolimok Abichai Daudi tama, “Kisidwang Ekapolon Akuj iyong emoit kon akolongit naga. Kimiekinae tokona atolem akwara napei keng echumea atorubokinea ngesi nalup arubokinet apei. Nyenyiagaari ayong na ngaarei!”

⁹Nakaneni tolimok Daudi ngesi tama, “Wara nyiiwan ngesi! Irirae dir Ekapolon Akuj itwaan cha daang ni ewani ekapolon lo aseu ngesi.

¹⁰A ekiro a Ekapolon Akuj ana eyari, ayeni ayong atamar eari Ekapolon Akuj alope Saul, na enangea akolongit keng a akitu, kori kelot lojie taarae.

¹¹Kimiekisi Ekapolon Akuj keratak ayong nyaawan ngolo aseu ngesi aliwor ekapolon! Kimiek atolemasi akwara keng ka akurum keng na ngakipi sodi atoloto.”

¹² Sodi tolema Daudi akwara ka akurum na ngakipi alodiyete akou a Saul torotokis kesi. Emam itwaan abu kingolik kori toyen ngakiro na asubasi. Emam itwaan tani abu tokienyu. Anakakinito kesi daang ngaju kainyo ainakinit Ekapolon Akuj kesi ngaju nakatoak.

¹³Ani erumor todoka Daudi ekwakaye adipo, todoka nimukura ni achadakina.

¹⁴Kirema Daudi enyarit ngasigerea a Saul ka Abiner ebala, “Abiner, kipupi iyong ayong a?” Tatachu Abiner tama, “Ngae ngini echala esaki akitekienyun ekapolon?”

¹⁵Tolimok Daudi Abiner tama, “Meere iyong ekile a? Ngae iche eyenikinitae loger kon alo Isirael? Nyo bo peiyokiyo iyong ekapolon kon Saul? Kainyo alomunit tokona itwaan iche nadakar esaki akiar ekapolon kon.

¹⁶Ichwangak iyong alotich kon Abiner. Ekongi ayong ani a Ekapolon Akuj ana eyari atamar ejoikinit esi daang kiario kainyo nyiyoko esi ekapolon kus lokolong aseuni Ekapolon Akuj. Kingolikisi a! Aliwae tokona eyei akwara a ekapolon? Aliwae eyei akurum keng na ngakipi nata asipo alodiyete akou keng?”

¹⁷Toyen Saul etoil a Daudi, sodi kingit tama, “Daudi, iyong itwaan ngini lokoku a?” Tatachu Daudi tama, “Ayong itwaan ekapolon kang.”

¹⁸Tolim nabo Daudi tama, “Kotere nyo ekapolon kiwapitor iyong ayong, ekasuban etich kon? Nyooni asechit ayong?

¹⁹Ekapolon kang, kiirarae tokona ayong, ekasuban etich kon. Ani kerai Ekapolon Akuj kichuchiunit iyong nikang, epedori ngesi akiloch ngitamen keng erai kelemikin akipeyos. Ani keraakasi ngitunga kichucchiunito, epete ngilam a Ekapolon Akuj nikech, kainyo keritasi kesi ayong anakwap a Ekapolon Akuj ebalasi, ‘Kape kilip ngakujo nagelayek.’

²⁰Tokona bocha, nyikimiek ayong kaarakinio nalup nagelayek, nikalonan ani a Ekapolon Akuj. Kotere nyo abunitor ekapolon a Isirael akiar ayong, lo ekoni eechut? Nyo kirikaa iyong ayong loger a ikeny a moding?”

²¹Sodi tolim Saul tama, “Asech ayong. Daudi lokookang, tobongu nyakawani ayong iyong nabo kainyo kijaluni iyong ayong akolongit naga. Aliwor ayong ekabangabangat! Asech ayong lokojokon!”

²²Tatachu Daudi tama, “Akwara kon naga, ekapolon! Tomeu ipei a ngitunga alukon kangulu bu omu.

²³Einanakini Ekapolon Akuj lu emunoi ka lu etenooko ebachit. Akolongit naga, kiwaakinit iyong Ekapolon Akuj nakan kang, nakaneni nyewana ayong iyong, lokolong kiseuni Ekapolon Akuj.

²⁴Loger lo kajalunea ayong iyong akolongit naga, kimiek Ekapolon Akuj katajalu ayong katoyuu alochan kadaang!”

²⁵Tolimok Saul Daudi tama, “Kitopia Ekapolon Akuj iyong lokoku! Ejokearosi ngakiro na isubi iyong daang!” Sodi torotok Daudi, tobongo Saul nawi.