Read turkana 1 Samuel 27 Bible Online

1 Samuel 27 - turkana bible

1 Samuel 27

¹Tolim Daudi alotau tama, “Kaari Saul ayong jik akolongit apei. Emam ibore iche ejoikinit ayong asubi pearai adokin atolot nakwap a Ngipilisti, sodi tojongo Saul akisak ayong alo Isirael, ebooyi ayong akaalimon.”

²Apot Daudi ka ngitunga keng lu araakasi ngamiae ngakan-kapei tonyout atipei toloto nia Akich alo arai lokookeng a Maok. Arai Akich ekapolon a Gas.

³Apot Daudi ka ngitunga keng erukito ka ngitunga a ngawiyei kech toloma Gas. Arukito Daudi ka ngaberu keng naarei na anyaritae Ainoam na abunit alo Yesireel, ka Abigail na abunit alo Karimel, na arai apuserut a Nabal.

⁴Ani iirari Saul atamar adoki Daudi alot nakwap na Gas, abu ngesi tojongo akisak Daudi.

⁵Tolimok Daudi Akich tama, “Ani kirai iyong lopae kang nakinae ayong ere loochi epei atolom. Nyejoikinit ayong, ekapolon, kilomit ka iyong lore loapolon.”

⁶Abu Akich akolongit ngina nak Daudi ere a Sikilag. Kotere ngakiro nguna, aliwor ere a Sikilag eka ngikapolok a Yuda tani tokona.

⁷Tolom Daudi nakwap a Ngipilisti a ekaru a epei a ngilapio nguomwon.

⁸Ngirwa ngulu, aloseenete Daudi ka ngitunga keng kitijwoto ngitunga a Gechur, ka Giris ta Amalek lusek alomito nakwap ngina nikooyen. Angaanari ngesi ajore akwap kech tanang Chur, toloto kwap tanang Misiri.

⁹Aareene Daudi ngikiliok daang ka ngaberu, sodi toruja ngamesekin, ka ngaatuk, ka ngisikiria, ka ngikaala, tolema tani ngiworui dang, ani erumor tobongu ngesi nia Akich.

¹⁰Ani ingisi Akich ngesi etamari, “Aliwae ingaarit iyong ejie akolongit naga?” Tatachak Daudi ngesi tama, “Alosit ayong Negeb ka Yuda,” kori “Alosit ayong nakwap a Yerameel,” kori “Alosit ayong nakwap a Ngikenis.”

¹¹Aareene Daudi ngitunga daang lukiliok ka luberu tongopea itwaan ebongi Gas akisisare ngakiro na asubete Daudi ka ngitunga keng. Ngakiro nguna asubi Daudi ngirwa daang lu ayakar nakwap a Ngipilisti.

¹²Nakaneni amuno Akich Daudi etami ebala, “Aremokinosi ngitunga keng ngesi noi. Eliwor tokona ngesi ekasuban etich kang jiik.”