Read turkana 1 Samuel 28 Bible Online

1 Samuel 28 - turkana bible

1 Samuel 28

¹Ngirwa ngulu, apot Ngipilisti tochunakis ngajorei kech esakete akitijwore Ngisirael. Tolimok Akich Daudi tama, “Toyen atamar inyounete iyong ka ngitunga kon ebaka ka ayong alojie.”

²Tatachak Daudi Akich tama, “Nyenguna. Ingolikini iyong etich lo apedori ayong ekasuban etich kon asubakin.” Tolim Akich tama, “Ejok. Ketiliwori ayong iyong asiger na kiyoki ayong jik.”

³ Adaunet a akitu a Samuel, apot Ngisirael kigoro tosutonokis kotere akitu keng, sodi tonukakis ngesi nawi keng alo Rama. Etwarakinit sek Saul ngikekeriak daang ka ngimurok a ngipean alo Isirael.

⁴Tochunakin ngajorei a Ngipilisti, tolom adakar kech diyete ere a Chunem. Tochunak Saul ngajorei a Ngisirael toloma moru a Giliboa.

⁵Ani ingolikini Saul ngasigerea a Ngipilisti, tobul tamaran.

⁶Abu Saul tanyara Ekapolon Akuj esaki akiyen ngakiro na esubakin. Nakaneni towou Ekapolon Akuj atachakin ngesi anakirujare kori ani a Urim ka Sumim kori alokadwarak.

⁷ Sodi todungok Saul ngikasubak etich keng tama, “Tasakakinae ayong amuron a ngipean adio, atolot engit ngesi.” Tatachut kesi tamasi, “Eyei apei Endor.”

⁸Sodi kipasakin Saul tanap ngiworui ngiche, ani eribokini, kirukosi ka ngitunga ngiarei aanyun aberu ngina. Tolimok Saul aberu tama, “Kingitakinae ngikaram ngakiro na esubakinosi. Tanyara ngikaram a itwaan ani alimuni ayong ekiro keng.”

⁹Tolimok aberu ngesi tama, “Iteni iyeni iyong ngakiro na asubaki ekapolon Saul, eger lo etwarakinea ngesi ngikekeriak ka ngimurok a ngipean alo Isirael. Nyo tokona kiroitotor esi ayong isaketa kataar?”

¹⁰Sodi kikong Saul alokiro a Ekapolon Akuj tama, “Ekongi ayong alokiro a Ekapolon Akuj ana eyari atamar emam itwaan kirirae iyong kotere ngakiro nugu.”

¹¹Tolim aberu tama, “Kanyarakini ngae?” Tatachu Saul tama, “Samuel.”

¹²Ani ingolikini aberu Samuel, kirema kikalou tolimok Saul tama, “Kotere nyo kingalaa iyong ayong? Irai iyong Saul.”

¹³Tolimok ekapolon ngesi tama, “Nyiiem. Nyo itee iyong?” Tatachu aberu tama, “Engolik ayong ekaramit elomuni analup.”

¹⁴Kingis Saul tama, “Ikwaan ngesi ka nyo?” Tatachu aberu tama, “Erai ekasukout elomunit, enapit eworu lokooyen.” Abu Saul toyen atamar erai itwaan ngini Samuel. Sodi kijuuru ngesi tatap ereet ngalup idodiunit arimatoi.

¹⁵Tolimok Samuel Saul tama, “Nyo kichanea iyong ayong kibuunea?” Tatachu Saul tama, “Ayei ayong lochan! Anyout Ngipilisti ejie ka ayong, nakaneni kanger ayong Akuj. Awou ngesi atachun ngakiro kang alokadwarak kori anakirujare. Kanyaraunit robo ayong iyong kitolimok ngakiro na asubakini.”

¹⁶Tolim Samuel tama, “Ani nyo bo kinyaritor iyong ayong na kingerio Ekapolon Akuj, aliworor emoit kon?

¹⁷Kisubakinea Ekapolon Akuj iyong ngakiro nakolong alimuni ngesi kisitoru nikang, kainyo alema Ekapolon Akuj apolou anikon, ainaki Daudi.

¹⁸Iwouni kolong iyong akiwap ngakiro a Ekapolon Akuj nakidungokinitor iyong atamar tomunya Ngiamalek ka ngiboro kech daang. Ngakiro nguna kesi kisubakinea Ekapolon Akuj iyong ngakiro nugu akolongit naga.

¹⁹ Kipotori Ekapolon Akuj iyong ka Ngisirael kidwanga Ngipilisti. Ipote iyong ka talokookon moi ni ayei ayong. Ipotori Ekapolon Akuj tani ngasigerea a Ngisirael kidwanga Ngipilisti.”

²⁰Atipei, abu Saul kibusokin kwap kitenar analup, tobul kotere ngakiro na alimuni Samuel. Tolilimiyo akwaan keng kainyo peemujit ngesi apaaran juui ka akwaar kiiya kiwala.

²¹Tolot aberu ngina nia Saul, ani ingolikini atamar ebulit ngesi, tolimok tama, “Ekapolon, ajali tete ayong akiyar kang ani asubea ngakiro na isaki iyong atosub.

²²Kemaimai tokona iyong atamar tosubak iyong dang ngakiro na kengisi ayong iyong. Kimiek kedorok akimuj adio. Ejoikinit iyong imuji taanyunea ngikilinga lu ibongorea.”

²³Tonger Saul tolim tama, “Nyemuji ayong.” Nakaneni apot tani ngikapolok keng luuchik kimaimaa ngesi esakete kimuj. Abu ngesi tacham tonyou analup kiboikin lokitanda.

²⁴Atipei, abu aberu ngina tongol itaok nisek etutumit ngesi. Ani erumor tolem ngakiria tosubak, sodi kidorok ngamugati na emam ekitoe lo itubui.

²⁵Nak ngesi Saul ka ngikasubak etich keng luuchik akimuj, kimuja. Torotokis kesi akolongit napei ngina nakwaare.