Read turkana 1 Samuel 29 Bible Online

1 Samuel 29 - turkana bible

1 Samuel 29

¹Tochunakis Ngipilisti ngajorei kech Apek, tochunakina Ngisirael lolelea lo eyei nadipo a Yesireel.

²Torotokis ngikapolok lukan a Ngipilisti ka ngajorei kech a ngalooso ana araakasi ngamiae ka ngabunge. Ayakasi Daudi ka ngitunga keng naabor erukito ka ekapolon Akich.

³Ani eanyungarete ngikapolok a ngajorei a Ngipilisti kesi, kingitas tamasi, “Nyo esubete Ngieburaniae lugu kane?” Tatachu Akich tama, “Daudi logo, ekasuban etich Saul alo erai ekapolon a Isirael. Kiruk ka ayong nikooyen tokona. Emam ngakiro naaronok engolik ayong anikeng napei kolong jik ebuni nikang.”

⁴Nakaneni tongoikis ngikapolok lua ngasigerea a Ngipilisti Akich tolimokis tamasi, “Tolimok itwaan ngini tobongo lore lokolong iinakini iyong ngesi. Nyikirukori ngoni ka ngesi lojie, nyeebu kitobilakin ngoni alojie. Kainyo erot ali eche italakarea ngesi ekapolon keng? Erai mati kear ngitunga yok!

⁵ Ani ikoni dang, abe erai bo logo Daudi lokolong aeonokinete ngaberu inyiakanarete ebalasi, ‘aar Saul ngabunge, nakaneni aar Daudi ngabunge nakaalak.’ ”

⁶Sodi tanyarau Akich Daudi tolimok tama, “Ekongi ayong ani Akuj a Isirael ana eyari atamar iwapit iyong ngakiro kang nabo kajoikinit ayong akirukor ka iyong lojie logo. Emam ngakiro naaronok aanyu ayong anikon napei kolong ibunio iyong nikang. Nakaneni nyikisakete iyong ngikapolok luche.

⁷Tobongo robo nawi akaalimon wara nyiisubak ngakiro na itongoyete kesi.”

⁸Kingit Daudi Akich tama, “Anukiro asech ayong ekapolon? Ani keringa iyong nyeanyuna ngakiro naaronok anikang napei kolong abuni ayong nikon loger lo ibalar iyong, nyo bo pekirukorea ayong ka iyong, ekapolon kang, etiji ngimoe kon?”

⁹Tatachu Akich tama, “Iteni ayeni ayong atamar ipupi iyong ngakiro noi loger a emalaikat a Akuj. Nakaneni alimut ngikapolok luche atamar nyikirukori ngoni lojie.

¹⁰Kanguna bocha Daudi, tonyoutu moi nataparach elilim, ka ngitunga luche daang lukolong irukunete ka iyong, torotokis jik napei iwalarea.”

¹¹Sodi kisiokakis Daudi ka ngitunga keng nataparach elilim, tobongosi Pilistia, toloto Ngipilisti Yesireel.