Read turkana 1 Samuel 3 Bible Online

1 Samuel 3 - turkana bible

1 Samuel 3

¹Asubi idia ni anyaritae Samuel etich a Ekapolon Akuj eweikinit Eli. Peasojunit akiroit a Ekapolon Akuj ngirwa ngulu. Peasojunito tani ngakisingolikinet a Ekapolon Akuj.

²Tojongoto ngakonyen a Eli akitere akwap lokojokon. Akolongit apei nakwaare, aperi ngesi anamaniyat keng,

³toperi Samuel alotooma akai a Ekapolon Akuj, ni ayei asaduku a Achamunet a Akuj. Ani eringa nyebaiara, eringa ataa enoki,

⁴tanyara Ekapolon Akuj Samuel tama, “Samuel! Samuel!” Kiki Samuel tama, “Ayong lo ekapolon!”

⁵Tamatar ngesi nia Eli tama, “Ayong lo, be kinyarit bo iyong ayong.” Tatachu Eli tama, “Nyenyara ayong iyong, tobongo toper.” Tobongo Samuel toper.

⁶Sodi Tanyara Ekapolon Akuj nabo tama, “Samuel!” Tonyou Samuel tolot nia Eli tama, “Ayong lo, be kinyarit bo iyong ayong.” Nakaneni tolim Eli tama, “Nyenyara ayong iyong lokoku, tobongo toper.”

⁷Aringa Samuel nyeyena Ekapolon Akuj, nabo aringa Ekapolon Akuj nyisuruoro ngesi a ache.

⁸Tanyara Ekapolon Akuj Samuel nabo na a ngauni. Tonyou Samuel tolot nia Eli tolimok tama, “Ayong lo, be kinyarit bo iyong ayong.”

⁹Sodi toyen Eli atamar Ekapolon Akuj ngesi anyarit idia. Tolimok Eli Samuel tama, “Kape toper. Ani kinyarae ngesi iyong nabo, tolim tama, ‘Kiruorik Ekapolon Akuj, kainyo epupokinit ekasuban etich kon.’ ”

¹⁰Bu Ekapolon Akuj towo kaneni sodi tanyara loger a nganyaraet a nache, tama, “Samuel!” Tatachu Samuel tama, “Kiruorik kainyo epupokinit ekasuban etich kon.”

¹¹Tolimok Ekapolon Akuj Samuel tama, “Topupok a, aapuu ayong asubakin ngakiro naaronok noi alo Isirael. Itamaranikinete ngakiro nguna itwaan cha daang ni iirari.

¹²Akolongit ngina, asubakini ayong ngakiro daang nakolong abala ayong asubakinea awi a Eli napei anakisiakinet tanang losal.

¹³Alimok ayong ngesi atamar erirae ayong ngitunga a awi keng nakajik kainyo keruorotor talokookeng ayong ngakiro naaronok. Ayeni Eli atamar esubete kesi kongina nakaneni abu nyiiratak.

¹⁴Ekong tokona ayong kotere ngitunga a awi a Eli atamar emam akipeyos kori alemunet na epedori alemar ngakiro na eyauni akisech naaronon ngina.”

¹⁵Toper Samuel tanang nataparach. Ani enyouni, tangaa ngidorin a akai a Ekapolon Akuj. Toem ngesi alimokin Eli ngakiro a akisingolikinet kangina.

¹⁶Nakaneni tanyara Eli ngesi tama, “Samuel! Ikakoku!” Kiki Samuel tama, “Ayong lo!”

¹⁷Kingit Eli ngesi tama, “Anukiro kilimokini Ekapolon Akuj iyong? Nyikidaa ayong ngakiro nguna. Kirirae Akuj iyong lokojokon erai kiwou iyong alimokin ayong ngakiro na alimuni ngesi daang.”

¹⁸Sodi tolimok Samuel ngesi ngakiro daang. Emam akiroit abu kidaa. Tolim Eli tama, “Erai ngesi Ekapolon Akuj, esubakini ibore nicha ejoikini ngesi.”

¹⁹Ani na apolounio Samuel, arukito ka Ekapolon Akuj, nabo abu Ekapolon Akuj kiyook ngakiro na eruorono Samuel.

²⁰Toyena Ngisirael daang napei alo Dan tanang Beer-cheba atamar erai Samuel dir ekadwaran a Akuj.

²¹Torubak Ekapolon Akuj idodiunun alo Chilo, ani kolong etaanyunor Samuel kiruoro. Toliwor na iruorikinea Samuel, topupokis Ngisirael daang.