Read turkana 1 Samuel 30 Bible Online

1 Samuel 30 - turkana bible

1 Samuel 30

¹Adaunet ngirwa a ngiarei, apot Daudi ka ngitunga keng tobongosi Sikilag. Keremito Ngiamalek ewae lo a Negeb, ani erumor kitijikis ngitunga a Sikilag. Kepot kesi kinoma ere,

²ani erumor toriko ngaberu ka ngitunga daang lu ayakasi lore, luapolok ka luuchik. Emam itwaan apot kesi taara, nakaneni apot toriko ngitunga daang na arotokinioto.

³Ani enangunete Daudi ka ngitunga keng lore, toriamut kesi ere kinom. Toriamut nabo ngaberu kech, ka talokookech ka tanakookech kerikor.

⁴Kigoro Daudi ka ngitunga keng tosutonokis nikooyen tolilimiyosi tani ngawat.

⁵ Aponi ngaberu a Daudi dang naarei, Ainoam ka Abigail, torikoroe.

⁶Min Daudi lochan luapolok noi kainyo angoito ngitunga keng daang anyunyurasi kotere ni arikere ngide kech, tasaka akimas ngesi a ngamoru, nakaneni abu Ekapolon Akuj na ngesi atitinyu.

⁷Tolimok Daudi Abiasar lokookeng a Aimelek, lo arai emuron a Akuj tama, “Inunae ayong akaluwat a emuron.” Inu Abiasar ngesi akaluwat.

⁸Kingit Daudi Ekapolon Akuj tama, “Ewapakini ngikaremok lugu a? Adoli ayong kesi a?” Tatachu Ekapolon Akuj tama, “Kiwapak. Idoli iyong kesi, toyuu ngirikon.”

⁹Apot Daudi ka ngitunga keng lu eraakasi ngamiae ngakan-kapei tonyout torotokis. Ani enangunete kesi ningolol a Besor, kidongo ngiche kech neni.

¹⁰Torotokis Daudi ka ngitunga ngamiae ngoomwon. Kidongo ngitunga ngamiae ngaarei kainyo aburunit kesi noi peadikino edokete ingolol.

¹¹Apot ngitunga lu arukito ka Daudi toriamut edia a akwap Misiri eyei nalongisat, sodi torikut ngesi nia Daudi, nakis ngesi akimuj ka ngakipi.

¹²Nakinae tani ngameyana na etoonitoe, ta asabut a ageor ana etoonito. Ani imuji ngesi erumor, topwatun etau keng kainyo aronit sek akimuj na ibore nimatat a ngirwa a nguuni.

¹³Kingit Daudi ngesi tama, “Ika ai iyong? Aliwae ibunitor iyong?” Tatachu edia tama, “Arai ayong eka akwap a Misiri. Arai ayong ekedalan a itwaan a akwap a Amalek. Kaisikini ekapolon kang ayong ngirwa nguuni lu ngoon adaunosi, kainyo adeaka ayong.

¹⁴Kingaarit sua atoremo akwap a Ngikeres, ka Negeb na Yuda, ta akwap a ngitunga a emachar a Kaleb, sodi enoma ere a Sikilag.”

¹⁵Tolimok Daudi ngesi tama, “Kirikori iyong ayong lokaremok ngulu a?” Tatachu edia tama, “Karikori ayong iyong irai kikongi iyong ilimit ekiro a Akuj atamar nyikiari iyong ayong kori nyikipotokini iyong ayong kitobua nia ekapolon kang.”

¹⁶Abu ngesi toriko Daudi nikech. Apetakina ngikaremok ngulu neni daang imujete, tamaase, kidongaate kotere alalau a ngiboro alu angatarito kesi anakwap a Ngipilisti ka akwap a Yuda.

¹⁷Ani ebayiari akolongit na atupit ngina, kitijik Daudi kesi, sodi tojwoto tanang ebong. Emam itwaan abu topuun alomoe pearai ngisorok ngamiae ngoomwon lu achunarete ngikaala tolooso.

¹⁸Tobuu Daudi ngiboro daang lusek alemarito Ngiamalek, tobuu tani ngaberu keng naarei ka ngitunga luche daang.

¹⁹Amam ibore eituno, kepolot kori kedit, alode alusapa kori alupesur, aloboro alu angataritae kori anibore cha kadaang ani kolong alemaritae. Abu Daudi tobuu daang.

²⁰Abu Daudi tobuu tani ngamesekin daang ka ngaatuk. Torujasi ngitunga keng ngibaren daang kingarenikis kesi ebalasi, “Eraakasi lugu ngika Daudi!”

²¹Ani erumor tobongu Daudi ni ayakasi ngitunga ngamiae ngaarei lusek edongito ningolol a Besor, ani amamakatar ngikilinga elooso ngaren. Toloto kesi akisiriamiar Daudi ka ngitunga lu arukitotor. Taapia Daudi diyete kech kimala niajokon.

²²Nakaneni apot ngitunga daang luaronok ka lukechanak arukito ka Daudi tolimut tamasi, “Nyikiinakini ngoni kesi ngiboro lu kingatarit kainyo nyeloto ngoon kesi ka ngoni. Kimiekisi kesi torikosi ngaberu kech ka ngide toloto.”

²³Nakaneni tatachu Daudi tama, “Ngikaitotoi kang, nyiikokis neni kotere ngiboro lukiinak Ekapolon Akuj ngoni! Kainyo kiyok ngesi ngoni, nabo kisidwang ngikaremok ngulu.

²⁴Emam itwaan echamuni ngakiro nakus nguna! Etiakio daang ngiboro eriyan. Itwaan daang ni edongit loboro, eriamuni ibore ni eriyan ka nia itwaan ani alosit lojie.”

²⁵Kitiliwo Daudi ngakiro nguna etal lo ewap alo Isirael tanang akolongit naga.

²⁶Ani ebonguni Daudi Sikilag, kipoto ngiboro lu angatari ngesi naarae talopaekeng lu araakasi ngikarikok a Yuda, tolim tama, “Ainakinet kon naga aloboro alu kingatari sua alomoe a Ekapolon Akuj.”

²⁷Ainari ngesi ngiboro ngulu ngitunga lu ayakasi Besel, ka lua Rama alo Negeb ta lu ayakasi lorerea a lorerea a Yatir,

²⁸ka Aroer, ka Sipimos, ka Echitemoa,

²⁹ka Rakal. Inaa tani ngitunga a ngirerea a emachar a Yerameel, ka lua ngirerea a Ngikenis,

³⁰ta ngitunga lu ayakasi lorerea a Orima, ka Borachan, ka Asak,

³¹ta Eburon. Yaa ngesi ngiboro ngulu lorerea daang lu kolong sek erimito ngesi ka ngitunga keng.