Read turkana 1 Samuel 31 Bible Online

1 Samuel 31 - turkana bible

1 Samuel 31

¹Apot Ngipilisti kitijikis Ngisirael alomoru a Giliboa Taarae Ngisirael lukaalak kaneni. Tamataros epewae kech, erukito ka Saul ka talokookeng.

²Nakaneni todolo Ngipilisti Saul ka talokookeng, sodi taara kesi talokookeng a Saul nguuni lu anyaritae Yonasan, ka Abinadab ta Malikichua.

³Torirau ejie alodiyete Saul, togumugumaasi ngesi ngimalea a ngimoe towana noi.

⁴Tolimok ngesi esorokit lo atingit ngiboro keng lujiet tama, “Tout ekileng kon kichumea ayong, nyeeponeta Ngipilisti, lu nyeyenete Akuj lugu kechuma ayong, sodi katokianatar.” Nakaneni toem esorokit ngolo asubakin ngakiro nguna. Sodi tolemu Saul ekileng keng a ilope kimasakin ngesi lokolong kichumi bon.

⁵Ani ingolikini esorokit ngolo atamar atoana Saul, kimasakin ngesi dang lokileng keng a ilope totoaka aapei ka Saul.

⁶Eger ngolo ngesi atoaketa Saul ka talokookeng luuni ta esorokit lo atingit ngiboro a Saul lujiet. Totoaka ngikiliok lu arukitotor Saul daang akolongit ngina.

⁷Ani iirarete Ngisirael lu ayakasi lowae loche a adipo a Yesireel ka lu ayakasi kide angolol a Yorudan atamar amatarosi ngasigerea a Ngisirael, nabo atoaka Saul ka talokookeng, apot kesi toisikis ngirerea kech tamataros. Sodi pot Ngipilisti toloma lorerea ngulu.

⁸Ani akolongit na atupit ngina, toloto Ngipilisti akibut ngiboro a ngitunga alu atoakito. Toriamut kesi ngawat a Saul ka talokookeng luuni eperete alomoru a Giliboa.

⁹Totubosi kesi akou a Saul nabo talachut ngiboro keng lujiet, sodi tomeasi ngitunga lowaitin daang a akwap a Ngipilisti alimokin ngitunga kech ka ngakujo ngakiro naajokak anikech nguna.

¹⁰Kiwaakis kesi ngiboro keng lujiet kai a akuj ana anyaritae Achitaros, sodi kibubukis akwaan keng nawas a ere a Betleem.

¹¹Ani iirarete ngitunga a ere a Yabech alo eyei Gilead ngakiro na asubeta Ngipilisti Saul,

¹²tonyout ngikiliok lukajwok toloto akwaar kiiya tananga Besichan. Totiyaut kesi ngawat a Saul ka talokookeng anawas tobuasi Yabech, kinoma kaina.

¹³Tolemut kesi ngakoyo tonukakis kwap epeduru lo ayei tooma ere. Apot kesi torono akimuj a ngirwa a ngikan-kaarei.