Read turkana 1 Samuel 4 Bible Online

1 Samuel 4 - turkana bible

1 Samuel 4

¹Ngirwa ngulu, tochunakin Ngipilisti alosit ejie ka Ngisirael, sodi tonyout Ngisirael akitijwore kesi. Toloma Ngisirael nadakar na anyaritae Ebeneser, sodi toloma Ngipilisti nadakar na enyaritae Apek.

²Tonyoikis Ngipilisti Ngisirael kitijikis nikaronon. Kidwangae Ngisirael taarae luko esibit ngabunge ngoomwon alojie.

³Ani ebongunete lu apuunosi nadakar, tolimut ngikarikok a Ngisirael tamasi, “Kotere nyo emiekinea Ekapolon Akuj Ngipilisti kidwangete ngoni akolongit naga? Potu apana Chilo ayautu asaduku a Achamunet a Ekapolon Akuj, ayautu nege sodi erukoreta ngoni ka ngesi kitoyuu alomoe.”

⁴ Sodi tomeasi kesi ngitunga Chilo yaut asaduku a Achamunet a Ekapolon Akuj Namerikanyer ana ibooyi alokidiama ngiborei lua ngabeben.*g** Apot Opuni ka Pineas lu araakasi talokookeng a Eli, kirukut ka asaduku a Achamunet a Akuj.

⁵Ani eyaunio asaduku a Achamunet a Ekapolon Akuj nadakar, apot Ngisirael daang kiremasi lokojokon imariteteete, kikamasi tani ngalup.

⁶Ani iirarete Ngipilisti echale ka akimaritetet, tolimut tamasi, “Ekoe, nyeka inyo echale eyei nadakar a Ngieburaniae logo?” Ani iirarete Ngipilisti atamar asaduku a Achamunet a Ekapolon Akuj ngesi ayaun nadakar,

⁷apot toema, sodi tolimut tamasi, “Abu akuj nadakar kech! Oitiakoi! Abe kimunyar lu erai ngoni! Nyesubakina na ikote nugu aniyok a ache!

⁸Oitiakoi! Abe kimunyar lu erai ngoni! Ngae kiyuuni ngoni anakujo anakaagongok kanguna? Ngakujo nguna kolong aarete Ngimisiri anariet.

⁹Totitinyeketo Ngipilisti! Tonyout tojwoto loger a ngikiliok. Ani kemam, kiliwor ngoni ngikedalak a Ngieburaniae loger lo ngoon araakatar kesi ngikedalak yok. Tonyoutu robo, tojwoto loger a ngikiliok!”

¹⁰Tojwoto Ngipilisti niationon kidwanga Ngisirael. Tamataros Ngisirael nawiyei kech. Taarae ngitunga lukaalak. Taarae ngasigerea a Ngisirael ngabunge ngatomwon-uni.

¹¹Tolemarae asaduku a Achamunet a Akuj. Taarae talokookeng a Eli luarei anyaritae Opuni ka Pineas.

¹²Tamatar itwaan a ekitela a Benjamen alojie tanang Chilo akolongit napei ngina. Achilichilaarit ngesi ngiworui kiwasak ngalup nakou ani egoror.

¹³Eboi Eli alokicholong keng alokwaas a erukudi itee, kainyo amarani etau keng kotere asaduku a Achamunet a Akuj. Ani edoluni itwaan ngini, tokeik ngakiro lore daang, sodi kisiakis ngitunga akigoro, ebulit.

¹⁴Ani iirari Eli echale lo egorore, kingis tama, “Eka inyo echale loti lo?” Kikomak itwaan nia Eli alimokin ngakiro nguna. (

¹⁵Amojongit Eli noi araakasi ngikaru keng ngitomwon-koomwon ka ngikan-kauni. Peeteete ngakonyen keng akwap lokojokon.)

¹⁶Tolimok itwaan ngini Eli tama, “Apuun ayong alojie, atomotun jik atanangu nege akolongit naga.” Kingit Eli ngesi tama, “Anukiro asubakinosi lokoku?”

¹⁷Tolim itwaan ngini tama, “Amatarosi Ngisirael ani a Ngipilisti, nabo aar ngitunga lukaalak noi alotunga yok. Ani eya daang, aar talokookon luarei Opuni ka Pineas, nabo alemar asaduku a Achamunet a Akuj!”

¹⁸Ani elemuni itwaan ngini asaduku a Achamunet a Akuj, tadakar Eli akamaluwot alokicholong keng, alo ebooyo ngesi alo diyete ekidor. Tobil emosiring keng, totoan ngesi, kainyo arai ngesi itwaan nimojong nabo alangir. Apolokinit ngesi Ngisirael a ngikaru a ngitomwon-omwon.

¹⁹Aberu a lokookeng a Eli alo anyaritae Pineas, apoti adolit. Ani iirari ngesi atamar alemar asaduku a Achamunet a Akuj, kiira nabo atamar atoaka lokile keng ka apakeng a lokile keng, abu ngesi toriabakin atipei kidou.

²⁰Ani eringa ngesi iroga, apot ngaberu nakesidounok ngesi tolimokis tamasi, “Nyiem, kainyo idou iyong ikoku nisapat.” Nakaneni abu ngesi nyeemisik nabo nyetachuna ngakiro nguna.

²¹Tolimok ngesi idia ekiro be Ikabod[7] ebala “Aisiki apolou a Akuj Isirael!” Alimuni ngesi kongina kotere ni alemarere asaduku a Achamunet a Akuj ka ni atoanea lokile keng, ta nabo ni atoanea apakeng a lokile keng.

²²Tolim ngesi tama, “Aisiki apolou a Akuj Isirael kainyo alemar asaduku a Achamunet a Akuj.”