Read turkana 1 Samuel 5 Bible Online

1 Samuel 5 - turkana bible

1 Samuel 5

¹Ani elemarete Ngipilisti asaduku a Achamunet, apot tadakasi alo Ebeneser tanang Achidod lo arai ere kech.

²Yaasi kesi asaduku a Achamunet a Akuj kirepakis tooma kai a akuj kech ana anyaritae Dagon, sodi kisibaka ka Dagon.

³Ani enyounete ngitunga a Achidod nataparach elilim, toriamut Dagon edakakina kwap edot aloreet, alongaren asaduku a Achamunet a Ekapolon Akuj. Sodi kikeut kesi Dagon kitowaa anipalem keng.

⁴Ani enyounete nataparach nache elilim, toriamut Dagon kedakakin nabo ngaren asaduku a Achamunet. Toriamut akou ka ngakan daang ketuborosi eperete alokidor. Akwaan bon ngesi edongit. (

⁵Ngakiro nguna kesi eraakar tani tokona, ngimurok a Dagon ka ngitunga lu elomanarete kai keng akilip ngesi alo Achidod, ekalameenete neni, peechiakeenete.)

⁶Kirira Ekapolon Akuj ngitunga a Achidod lokojokon, kitubul kesi. Erirae ngesi kesi ka ngikidunyet kech a ngidekesinei aluaronok noi.

⁷Ani ingolikinete ngakiro na asubakinosi, tolimut tamasi, “Nyejoikinit asaduku a Achamunet a Akuj a Isirael imiekinio kanege nabo, kainyo kirira ngesi ngoni aapei ka akuj yok Dagon.”

⁸Sodi tomeasi kesi ngitunga tanyarata ngikapolok lukan a Ngipilisti daang tochunakin. Kingita ngitunga kesi tamasi, “Kikokini ngoni asaduku a Achamunet a Akuj a Isirael ai?” Tatachut kesi tamasi, “Yaasi lore a Gas.” Sodi yaasi ngitunga asaduku ngina lore a Gas lo arai ere eche a Ngipilisti.

⁹Ani eyaunio asaduku neni, kirira Ekapolon Akuj ngitunga a ere kangolo dang, kitubul kesi noi. Kirira kesi a ngidekesinei aluaronok noi alu atingete ngitunga daang, lusorok ka lumojong ekwaan.

¹⁰Apot kesi yaasi asaduku a Achamunet a Akuj lore a Ekiron. Ani eyaunio lore ngolo, kikalout ngitunga a Ekiron tamasi, “Ayaut kesi asaduku a Achamunet a Akuj a Isirael nege kitaareta ngoni daang!”

¹¹Apot kesi nabo tanyarata ngikapolok a Ngipilisti daang tolimokis tamasi, “Tobuasi asaduku a Achamunet a Akuj a Ngisirael nipalem eyei, nyikiarea asaduku ngina sua ka ngitunga kosi.” Tobua ngitunga a ere daang kainyo erirae Akuj kesi lokojokon.

¹²Tani ngitunga lu apot nyeetoaka, todeakakinos edeke loaronon noi. Kigoronokis kesi ngakujo kech esakete akingarakino.