Read turkana 1 Samuel 6 Bible Online

1 Samuel 6 - turkana bible

1 Samuel 6

¹Ani kemin asaduku a Achamunet a Ekapolon Akuj nakwap a Ngipilisti a ngilapio a ngikan-kaarei,

²tanyaraut Ngipilisti ngimurok ka ngikekeriak kingita tamasi, “Kikokini sua asaduku a Achamunet a Ekapolon Akuj ai? Nyo kiturukoori sua ka asaduku atobuareta nipalem eyei?”

³Tatachut kesi tamasi, “Ani kibuarete esi asaduku a Achamunete a Akuj a Isirael, nyiibuasi pas. Ejoikinit eyaario aapei ka ainakinet na etachi akisech kus. Eger ngolo ngesi ingalekinioto esi toyena ngakiro nakiriraa esi Akuj.”

⁴Kingitas ngitunga tamasi, “Nyo ainakinet kiyaari sua nikeng?” Tatachut kesi tamasi, “Ngakisikwaanet ngakan a ngidekesinei aluaronok noi, na esubunitae a egolit, ka ngakisikwaanet a ngirunyei na esubunitae a egolit, itemem ka ekimar a ngikapolok a Ngipilisti. Ngakiro napei aronok nguna kesi ayaunitae nikus ka ngikapolok lukan.

⁵Ejoikinit esi isubakinete ngakisikwaanet na ngidekesinei ka ngirunyei, na enyasut akwap kus ngina, sodi kipuruut Akuj a Isirael. Ejongoe tokona ngon akirirare esi, ka ngakujo kus, ta akwap kus.

⁶Nyo iraakatar esi lukechanak loger lokolong a Parao ka Ngimisiri? Toyena atamar abu Akuj kitabangaan kesi ani ekisidi talakakis kesi Ngisirael erotokinete alo Misiri.

⁷Tolemutu tokona aurukuk na iritae ka ngaatuk namanang ngaarei na nyeena aapei a akitoe anaapotion a ache. Toenikis ngaatuk naurukuk sodi tobuasi ngitak nawi.

⁸Tolemutu asaduku a Achamunet a Ekapolon Akuj kidokokis naurukuk, sodi tolemut asaduku ache kiwaakis ngakisikwaanet a egolit na iyaarito esi nikeng erai ainakinet natachet akisech. Kiwaakisi asaduku ngina diyete na a Achamunet. Kitorotokisi aurukuk na iritae ngina kimiekis tolot bon.

⁹Ani erumor kiteosi elosi. Ani kelot lore a Bes Chemech lo erai akwap keng, toyena atamar Akuj a Isirael ngesi eyaunit eriras loaronon logo niyok. Nakaneni ani pekelot inaa, toyena atamar meere ngesi ayauni ngidekesinei luaronok lugu. Erai cha ekeny aronon.”

¹⁰Apot kesi tosubakis ngakiro na alimokinio. Tolemut ngaatuk namanang ngaarei toenikis naurukuk, sodi togolokis ngitak kech nawi.

¹¹Kidokokis kesi asaduku a Achamunet a Ekapolon Akuj naurukuk. Kidokokis tani asaduku na aya ngakisikwaanet a ngirunyei ka ngidekesinei, na asubunitae a egolit.

¹²Torotokis ngaatuk kiwapakis erukudi lo eteni Bes Chemech, kidirasi inaa nyiitosi alorukudi. Arwosi kesi eloose. Kiwapakis ngikapolok lukan a Ngipilisti ngaatuk nguna tanang lokukuoru a Bes Chemech.

¹³Esaa ngolo alemete ngitunga a Bes Chemech ngakanoi anadipo. Ani napei ekeuneta ngakies kech, kingolikis asaduku a Achamunet a Ekapolon Akuj. Talakaros kesi lokojokon.

¹⁴Bu aurukuk ngina tanangu mana a itwaan anyaritae Yochua, ani alomit Bes Chemech, towo kaneni alodiyete ataaba natiapolon. Toyepa ngitunga ngakito na asubunitere aurukuk ngina, sodi taara ngaatuk tolemikis Ekapolon Akuj erai akipeyos na inomio.

¹⁵Totiyaut Ngilawi asaduku a Achamunet a Ekapolon Akuj ka asaduku na ayakasi ngakisikwaanet na egolit, sodi kidokokis kesi kidiama ataaba naapolon. Ani erumor tolemikis ngitunga a Bes Chemech Ekapolon Akuj ngakipeyos na inomio ka ngakipeyos nache akolongit ngina.

¹⁶Ani ingolikinete ngikapolok lukan a Ngipilisti ngakiro nguna, tobongosi lore a Ekiron akolongit ngina.

¹⁷Ngakisikwaanet nakan a ngidekesinei aluaronok asubunitae a egolit, apot Ngisirael yaasi nia Ekapolon Akuj erai ainakinet natachet akisech kech. Alemunitae ainakinet apei kotere ere epei alorerea kalu, Achidod, ka Gasa, ka Achikelon, ka Gas, ta Ekiron.

¹⁸Alemunitae ngakisikwaanet a ngirunyei dang na asubunitae a egolit, itemitoe ka ekimar a ngirerea a ngikapolok a Ngipilisti alukan, ngirerea lu adukito ngawasea ka ngadakarin napeadukitoe ngawasea. Ataaba naapolon na eyei mana a Yochua alo elomit Bes Chemech, nakolong edokokinio asaduku a Achamunet a Ekapolon Akuj, eringa eyei neni erai ngesi eyenere nakolong asubakin.

¹⁹Aari Ekapolon Akuj ngitunga a Bes Chemech ngitomwon-kaarei kainyo aripakinete kesi asaduku a Achamunet. Kigoro ngitunga tosutonokis kainyo abu Ekapolon Akuj taar ngitunga lukaalak alokiding kech.

²⁰Sodi tolimut ngitunga a Bes Chemech tamasi, “Ngae epedori towo alongaren Ekapolon Akuj, na erai Akuj na italeuno? Nia ngae tokona elosi Akuj tachadaror aniyok?”

²¹Tomeasi kesi ngitunga ni eya ngitunga a Kirias Yearim ebalasi, “Abuut Ngipilisti asaduku a Achamunet a Ekapolon Akuj. Potu tolemasi.”