Read turkana 1 Samuel 7 Bible Online

1 Samuel 7 - turkana bible

1 Samuel 7

¹Sodi tolemasi ngitunga a Kirias Yearim asaduku a Achamunet a Ekapolon Akuj, yaasi kai a itwaan anyaritae Aminadab, ani alomit lomukura. Kitaleut kesi lokookeng a Aminadab lo anyaritae Eleasar sodi toweik asaduku a Achamunet.

² Ebooyi asaduku a Achamunet a Ekapolon Akuj alo Kirias Yearim a ngikaru alukaalak, alu araakasi ngitomwon-arei. Ngirwa ngulu daang, egoronokinete Ngisirael Ekapolon Akuj.

³Tolimok Samuel Ngisirael tama, “Ani kibongokinete esi Ekapolon Akuj a ngitai kus kadaang, tachakasi ngakujo nagelayek ka ngakisikwaanet a akuj anaberu enyaritae Achitaros. Tolemunos toliworos ngika a Ekapolon Akuj dir, kilipa ngesi bon, sodi kitoyuu ngesi anapolou a Ngipilisti.”

⁴Tochakasi Ngisirael ngakujo kech nasubuna na a Baal ka Achitaros, sodi kilipa Ekapolon Akuj bon.

⁵Ani erumor Tolim Samuel tama, “Tochunakin Ngisirael daang Misipa, elip ayong Ekapolon Akuj kotere esi.”

⁶Sodi tochunakinos kesi Misipa. Tookut kesi ngakipi tobukosi erai akipeyos na alemikinitae Ekapolon Akuj sodi torono akimuj akolongit ngina daang. Tolimut kesi tamasi, “Kisechak sua Ekapolon Akuj.” (Atubeene Samuel ngikesio a Ngisirael alo Misipa.)

⁷Ani iirarete Ngipilisti atamar achunakin Ngisirael Misipa, apot ngikapolok lukan a Ngipilisti tonyout ka ngitunga kech alosit akitijwore Ngisirael. Tobul Ngisirael na eirareta ngakiro nguna.

⁸Tolimokis Ngisirael Samuel tamasi, “Torubak kare akilipit Ekapolon Akuj na erai Akuj yok kitoyuu ngoni ani eya Ngipilisti.”

⁹Taar Samuel imesek nisorokit tolemik Ekapolon Akuj erai akipeyos na inomio elemwaana. Ani erumor kilip Samuel Ekapolon Akuj esaki kingarak Ngisirael, sodi kiik Ekapolon Akuj akilip a Samuel.

¹⁰Ani eringa Samuel ipeyoe, kirudun Ngipilisti akitijikin Ngisirael. Nipei bore ngini, togirok Ekapolon Akuj anadis, tobelak Ngipilisti. Kibiler kesi lokojokon tamataros eemito.

¹¹Tonyout Ngisirael alo Misipa kiwapakis Ngipilisti tanang Besikar, taarete alorot.

¹²Ani erumor tolem Samuel amoru kitowo alokiding Misipa ka Chen, ebala, “Kingarak ngoni Ekapolon Akuj jik tanang tokona” sodi tanyara ngesi amoru ngina “Amoru a akingarakino.”

¹³Sodi kidwangae Ngipilisti. Kiratak Ekapolon Akuj kesi nyeeremo nabo akwap a Ngisirael ngirwa daang lu ayarea Samuel.

¹⁴Apon Ngisirael tobuakinae akwap daang. Tobuakinae tani ngirerea kech daang lukolong alemarito Ngipilisti napei alo Ekiron tanang Gas. Kisila Ngisirael tani ka Ngikanaan.

¹⁵Abu Samuel topolok Ngisirael ngirwa daang lu ayarea ngesi.

¹⁶Ekaru daang aloseene ngesi irimit ngirerea a Besel, ka Giligal, ta Misipa sodi totubonok ngitunga ngikesio alorerea kangulu.

¹⁷Ani erumor tobong nawi keng na ayei Rama. Atubeene ngikesio tani kaneni. Abu ngesi todukok ekeno a ngakipeyos Rama.