Read turkana 1 Samuel 8 Bible Online

1 Samuel 8 - turkana bible

1 Samuel 8

¹Ani emojongi Samuel, kitiliwo talokookeng ngikatubok ngikesio alo Isirael.

²Anyaritae ekiro a lokookeng aloapolon Yoel, tanyaritetei lo aloochi Abija. Araakasi kesi ngikatubok ngikesio alo Beer-cheba.

³ Nakaneni apot kesi nyiiwapa elote a apakech. Toliworos kesi ngitunga lu esakete ngaropiyae. Kidiaunut kesi ngaropiyae na ediakitere kesi nyeetubeeneto ngikesio eriyan.

⁴Sodi tochunakin ngikarikok a Ngisirael daang toloto nia Samuel alo Rama,

⁵tolimokis tamasi, “Topupok a, imojong iyong tarai nyiwapito talokookon elote kon. Aloger kangolo, tosekinae sua ekapolon lo kipolokini loger a ngakwapea anache.”

⁶Apot ngakiro na abalasi kesi “Nakinae sua ekapolon lo kipolokini,” nyeejoikis Samuel. Sodi kilip Samuel Ekapolon Akuj.

⁷Tolimok Ekapolon Akuj ngesi tama, “Topup ngakiro daang nakisuruorete ngitunga iyong. Meere iyong kingerito ngitunga. Ayong kangerito kesi aliwor ekapolon kech.

⁸Napei kolong epudunio ayong kesi alo Misiri, areasi kesi anikang elipa ngakujo ngache. Ngakiro napei nguna kesi tokona kisubeta ngitunga iyong.

⁹Tokona bocha, topupok ngakiro kech, nakaneni kichikichik kesi lokojokon tolimok ngakiro na esubeeneta ngikapolok kech kesi.”

¹⁰Abu Samuel tolimok ngitunga lu asakete ekapolon ngakiro daang na eruoro Ekapolon Akuj.

¹¹Tolim Samuel tama, “Ngakiro nugu ejoikinit ekapolon kus esubi. Itiliwori ngesi talokookus ngasigerea keng. Elomarete ngiche lotich lo a ngaurukukui keng ana a ejie, elomarete ngiche amere ngangolei keng, tokera ngiche kingareno ngaurukukui keng.

¹²Eseuni ngesi ngiche toweikis ngitunga abunget apei, toseu ngiche toweikis ngitunga ngitomwon-kan. Itaate talokookus ngiche ngamanat keng, tolema ngiche ngalemet keng, tosubakis ngiche ngiboro keng lujiet ka ngiboro a ngaurukukui ana irito ngangolei.

¹³Tanakookus kesi esubete akimiet keng nakaakunyon ka akipore akimuj keng ta akimare ngamugati keng a akim.

¹⁴Elemari ngesi ngamanat kus naajokak ka ngamanat na a ngimusabib ta ngikito kus a akimiet sodi nak ngikasubak etich keng.

¹⁵Elemari ngesi alemunet apei anatomon a ngikinyam kus ka ngamusabib kus nak ngitunga lu etubete ngikesio ka ngikasubak etich keng luche.

¹⁶Elemari ngesi ngikasubak etich kus, lukiliok ka luberu, ka ngaatuk[8] kus naajokak, ta ngisikiria kus sodi toliworos ngika etich keng.

¹⁷Elemari ngesi alemunet apei anatomon a ngibaren kus, sodi toliworos esi ngikedalak keng.

¹⁸Ngirwa ngulu, ikalounete esi lokojokon kotere ekapolon lo iseunete esi nakaneni nyiirari Ekapolon Akuj akigoro kus.”

¹⁹Nakaneni apot ngitunga nyiirasi ngakiro a Samuel. Tolimut kesi tamasi, “Mam! Kisaki sua ekapolon lo kipolokini sua,

²⁰ekokisi sua dang ngitunga a ngakwapea anache, min ekapolon kosi lo kiriki alojie sodi tojii.”

²¹Topupok Samuel ngakiro daang na alimunete ngitunga sodi tolot tolimok Ekapolon Akuj.

²²Tolimok Ekapolon Akuj Samuel tama, “Kiira ngakiro kech, sodi tolemik kesi ekapolon.” Ani erumor tolimok Samuel Ngisirael tama, “Tobong itwaan daang lore keng.”