Read tyap Matyu 10 Bible Online

Matyu 10 - tyap bible

Matyu 10

¹Yesu si̱ yorong mman ta̱m nggu na swak ma̱ a̱feang, a̱ si̱ nwuak ba tyok ba̱ khai á̱ka̱tuk ntswá ba̱ ghwut ma̱ á̱niet, ba̱ bu choot kuzang tangka̱i nzwan ma̱ á̱niet ba̱ nyia̱ ma̱ng zwán a̱ni.

²Di lyulyoot a̱yaata̱m swak ma̱ a̱feang[70] huhwa hu: Di̱ tsa hu, Siman nang á̱ bu ngyei Bitut a̱ni, ma̱ng Anda̱rawut a̱na̱nyiuk nggu wu, Yakubu a̱fai Za̱ba̱di ma̱ng Yoona a̱na̱nyiuk nggu wu.

³Filibut, Ba̱tolomi, Toma, Matyu, a̱tyu saai kurum ga̱ndu. Yakubu a̱fai A̱lfayat, ma̱ng Tadiyut[71].

⁴Siman (nang á̱ ngyei Za̱loti[72] a̱ni), ma̱ng Yahuda Iska̱riyoti, (A̱tyu a̱ ku[73] lyap Yesu a̱ni).

⁵Yesu si̱ ta̱m a̱yaata̱m swak ma̱ a̱feang bani, a̱ si̱ tak ma̱ng a̱mba nyia̱, “Nyi yok nat da̱ a̱vwuo Nnwap na̱ nwai yet A̱yahudawa ku a̱ka̱keang A̱sa̱mariyawa bah.

⁶Da̱ a̱kwonu a̱kya, nyi nat da̱ a̱vwuo á̱niet Isi̱rela, ba̱ yet zón seap A̱gwaza ji̱ bwuk a̱ni.

⁷Nyi nat nyi shei mba nyia̱, ‘Tyok Ma A̱gwaza tswazwa hu bai kpa̱mkpaan!’

⁸Nyi choot á̱niet nzwán ba. Nyi shyi̱ri̱p á̱niet ba ba̱ ka̱n kwi a̱ni ma̱ng swuan. Nyi choot á̱niet gbap ba. Nyi bu khai á̱ka̱tuk ntswá ba̱ ghwut ma̱ á̱niet ba. Ma̱nang á̱ nang nyin a̱ni, nyin meang, nyi ma nang a̱nia di̱ mi̱n san zang.

⁹“Nyi yok ba̱ng kuzang tangka̱i kurum mi̱ gumaat nyin ji bah,

¹⁰mat a̱tyu nta̱m myim á̱ tan gu zang nggu ji. Mat a̱nia, ma̱ a̱chyet nyin ka, a̱yin gu yok kyiak gumaat bah, ku a̱yaatoot ma̱ng á̱kwatak che sweang nang gu na shai a̱ni, ku shan a̱chyet.

¹¹“A̱wot kuzang jen nang nyi nnwuo a̱gba̱ndang a̱keang ku a̱bada̱dei a̱keang a̱ni, nyi chat a̱tyu a̱ byia̱ fwuo a̱ na san nyin a̱gbang nggu ka mbwak nfeang a̱ni. Nyi swan a̱gbang nggu ka, si̱ nat jen nang nyi bye ndoot a̱ni.

¹²Ki̱ nyi nwuo a̱mali ka, nyi tyia̱ nka a̱li̱ba̱rka.

¹³Ka̱ á̱niet a̱mali a̱bya san nyin, a̱li̱ba̱rka nyin wu a̱ swan. Ma a̱nia wa, ka̱ ba̱ lak san nyin hu, a̱li̱ba̱rka nyin wu a̱ khwi nyin.

¹⁴“A̱wot ka̱ á̱ mbyia̱ a̱li ku a̱keang ka̱ lak san nyin ku a̱lyiat nyin na a̱ni, mi̱ di̱ ghwut nyin hu a̱mali ka ku a̱keang a̱kya, nyi gbaat mbwuk a̱ti̱tak[74] nyin na di̱n jen nang nyi na nghwut a̱mali ku a̱keang a̱kya a̱ni.

¹⁵N tak nyin a̱tsak a̱lyiat, a̱tuk mam shi̱ri̱ya A̱gwaza ka, a̱bung nang á̱niet ma̱ a̱keang a̱bya na swuo a̱ni, na swak a̱bung nang a̱ka̱tuk a̱ka̱keang Sodom ma̱ng Goma̱ra ku swuo a̱ni za̱m.”

¹⁶“Nyi fa̱k, n ta̱m nyin nang zón seap a̱ni da̱ a̱vwuo a̱ka̱bwu a̱yit[75]. Mat a̱nia, si̱ nyi swan cham nang zwák a̱ni. A̱wot nyi sang a̱ka̱kpa̱t nang a̱yaabwa a̱ni.

¹⁷Si̱ nyi ta̱bam ma̱ng á̱nietbishyi ba! Ba̱ na tyia̱ nyin mbwak a̱cha̱chet á̱niet shi̱ri̱ya. A̱wot ba̱ bu tsot nyin ma̱ng a̱ya̱u a̱ byia̱ pyipyia̱ ntswam a̱ni ma̱ á̱tutu a̱tung A̱yahudawa ba.

¹⁸Á̱ na kwak nyin á̱ nat ndyo a̱zaghyi a̱yaagwomna ma̱ng á̱gwam, mat nang nyi ngyet á̱niet khwi nung a̱ni. A̱wot si̱ huni na nwuak nyin jen nang nyi na ntak ma̱ng mba, ma̱ng A̱yahudawa, ma̱ng Nnwap nwai yet A̱yahudawa a̱ni, nkhang tazwa nung.

¹⁹“Jen ji nang á̱ ntyia̱ nyin mbwak mba a̱ni, nyi yok dam si̱sak ji nyi na nnwuak shim ku a̱lyiat nang nyi na hyia̱ a̱ni bah. Mat A̱gwaza na nwuak nyin swáng á̱lyiat ji, ji̱ myim nyi hyia̱ a̱ni, da̱ a̱cha̱chaat njen a̱wa.

²⁰Nyin bya na lyiat bah. A̱za̱za̱rak Ntswa A̱tyia̱ nyin wu wa na lyiat nyin dyo.

²¹“A̱na̱nyiuk na nwuak a̱na̱nyiuk gu á̱ hyat. Ma a̱nia wa a̱tyia̱ na nnwuak nggwon guu. Mman na tyia̱ a̱yaatyia̱ ma̱ng a̱yaayang mba zat. A̱wot ba̱ tyia̱ á̱ hyaai a̱yaatyia̱ ma̱ng a̱yaayang mba ba.

²²Konyan na lak li nyin mat nang nyi ngyet á̱niet khwi nung a̱ni. A̱wot konyan wa gbang a̱lyia̱, a̱ si̱ yong mi̱ chet di̱n jen ya̱shuk si̱ nat sangba̱p swuan nggu ji a̱ni, nggu wa na shya̱ san hu.

²³A̱wot ka̱ á̱ ta̱shuk nyin ma̱ a̱keang a̱ghyang, nyi tyong nat ma̱ a̱keang a̱ghyang a̱zanson. N tak nyin a̱tsak a̱lyiat, neet nang nyi ka̱n tyak nwuai a̱mgba̱m a̱ka̱keang Isi̱rela na bah, Nggwon A̱tyubishyi[76] na bwuok a̱ bai.

²⁴“Nggwon ta̱m si̱ mi̱n swak a̱tyu tyiet nka wu ma̱ng shi bah. Ma a̱nia wa a̱khwo si̱ mi̱n swak a̱tyoli nggu wu ma̱ng shi bah.

²⁵Nggwon ta̱m myim ka̱ tai a̱tyu tyiet nka wu. Ma a̱nia wa, a̱khwo wu meang, a̱ myim a̱ tai a̱tyoli nggu wu. A̱wot ka̱ nung, a̱tyoli nyin wu, á̱ yei nung ‘A̱gwam á̱ka̱tuk ntswá,’ ma a̱nia wa nyin, nyi yet kyang bwak nung hu a̱ni, á̱ na tyei nyin á̱ka̱tuk lyulyoot ku swak a̱nia a̱ni za̱m!

²⁶“Mat a̱nia, nyi yok fa̱k a̱wun á̱niet ba̱ tyei nyin a̱wun a̱ni bah. Mat, jen chobai nang kuzang nkyang nang á̱ kup a̱ni, á̱ na tyai nhu kpa̱sai. A̱wot kuzang kyang ku shya̱ di̱ niat a̱ni, á̱ na tyia̱ konyan a̱ lyen nhu.

²⁷Tyiet hu nang n tyiet nyin ma̱nini ma̱nyin nyin a̱ni, nyi tyiet á̱ghyang á̱niet hu kpa̱sai. A̱wot a̱lyiat nang n chyuang nyin ndyo ma̱ a̱fufwuo nyin ba a̱ni, nyi nyeak yong tazwa nyuo, nyi shei na kpa̱sai mat konyan a̱ fa̱a̱k!

²⁸“Nyi yok fa̱k a̱wun á̱niet ba̱ chat hyat vam nyin hu a̱ni bah. Mat á̱niet a̱bya si̱ mi̱n hyat swuan nyin ji bah. Da̱ a̱kwonu a̱kya, nyi fa̱k a̱wun A̱gwaza nia ma̱nyin gu. Nggu wa maai a̱ hyat vam hu ma̱ng swuan ji a̱mali a̱nga̱ngak ndong sang sangba̱p ka.

²⁹“Yihwa yet zang a̱bachyuang a̱ka̱man a̱feang ji; a̱byi kurum kya ma̱ a̱da̱dei baa? A̱wot a̱bada̱dei a̱man a̱nyiung si̱ mi̱n khwu di̱ mi̱ lyen A̱tyia̱ nyin wu bah.

³⁰A̱wot a̱mgba̱m tityin pyia̱ nyin hu, A̱gwaza fang a̱ si̱ lyen hu.

³¹Mat a̱nia, nyi yok fa̱k a̱wun bah. Nyi swak sot a̱bachyuang a̱ka̱man na mi̱ yet hu da̱ a̱vwuo A̱gwaza!

³²Mat a̱nia, konyan wa shim a̱ si̱ tak ma̱ng á̱ghyang á̱niet kpa̱sai nang gu ngyet a̱tyu khwi nung wa, nung meang, n na shim n tak kpa̱sai nang nggu ngyet a̱si̱ nung wa a̱zaghyi A̱tyia̱ nung ka a̱ shya̱ tswazwa ka a̱ni.

³³A̱wot konyan wa fwuo nyia̱, da̱ a̱ yet a̱tyu khwi nung mi̱ swanta hu a̱ni bah, nung meang, n na fwuo nyia̱, da̱ a̱ yet a̱tyu khwi nung bah a̱zaghyi A̱tyia̱ nung wu a̱ shya̱ tswazwa ka a̱ni.”

³⁴“Nyi yok fa nyia̱ n bai ma̱ng swat nyinyang hwa mi̱ swanta hu bah! Kaai, n bai ma̱ng swat nyinyang hwa bah. N bai ma̱ng tswat[77] ghai á̱niet ja!

³⁵N bai n tyia̱ nggwon a̱sam na̱nvan ma̱ng a̱tyia̱ nka. Nggwon a̱nap meang ka̱ nyia̱ jhya̱ ma̱ng a̱yang nka wu. A̱wot a̱nyeang meang, a̱ nyia̱ jhya̱ ma̱ng a̱ya̱kwop nggu wu.

³⁶Á̱niet lak li nyin ba na yet á̱niet a̱mali nyin bya!

³⁷Ka̱ a̱yin chat a̱tyia̱ ku a̱yang gu a̱ swak nung, a̱tyu a̱wa maai a̱ khwi nung bah. Ku ka̱ a̱nyuu chat nggwon a̱sam, ku nggwon a̱nap nggu ka a̱ swak nung, a̱ maai a̱ yet a̱si̱ nung bah.

³⁸Ka̱ nyi lak kyiak a̱team a̱khwu nyin wu nyi si̱ faat, a̱wot nyi si̱ khwi nung, nyi maai nyi yet á̱si̱ nung bah.

³⁹Ka̱ nyi nwai swuán nyin ji, nyi na nwai ji. A̱wot ka̱ nyi nwai swuán nyin ji da̱nian nung, nyi na shya̱ swuán sang sangba̱p ji.

⁴⁰Konyan wa san nyin mbwak nfeang, nung gwa nang gu san. A̱wot konyan wa san nung mbwak nfeang, a̱ san A̱tyia̱ nung wu a̱ ta̱m nung wa a̱ni oo!

⁴¹Konyan wa san a̱ta̱m a̱kwonu A̱gwaza mbwak nfeang nang a̱tyu a̱ lyiat da̱ a̱kwonu A̱gwaza a̱ni, á̱ na nwuak gu záng ma̱nang a̱ta̱m a̱kwonu A̱gwaza a̱ni. A̱wot konyan wa san a̱tsotswat a̱yin mbwak nfeang mat nyia̱ tsotswat nggu hu, á̱ na nwuak gu záng ma̱nang si̱ a̱tsotswat a̱yin ji a̱ni.

⁴²A̱wot ka̱ a̱yin nang a̱tyu a̱ yet a̱tsak a̱da̱dei mi̱ mman ta̱m nung na a̱ni, ku a̱kashyi a̱sa̱khwot swuo na̱ shi̱ri̱m a̱ni, mat a̱ yet nggwon nta̱m nung kya, a̱tsak a̱lyiat á̱ na nang gu zang nggu ji.”