Read tyap Matyu 14 Bible Online

Matyu 14 - tyap bible

Matyu 14

¹Jen nang Hiridut Antibat[107] a̱ yet a̱gwam fam a̱byin Ga̱lili ku nfa̱k nkhang tazwa Yesu a̱ni,

²a̱ si̱ nyia̱ ma̱ng á̱niet nta̱m nggu ba, “Á ngyei a̱tyu wuni yet Yoona a̱tyu nyia̱ ba̱ptisman wa doot ma̱ng swuan ma̱ á̱niet ba̱ ka̱n kwi a̱ni! Huhwa mbyia̱ gu mbyia̱ chet nyian nkyang a̱ri̱bi̱di nani!”

³Mat a̱gwam Hiridut wa ku mi̱ ntyia̱ á̱ si̱ ta̱bat Yoona á̱ si̱ tyia̱ nggu mi̱ jaru ji, da̱nian gu ka tyia̱ a̱byii̱k nggu wu Hiridiyat, a̱ fa̱k nyinyang gu. (Hiridiya ku yet a̱byii̱k Filibut a̱na̱nyiuk a̱gwam Hiridut Antibat wa, a̱wot nang nggu Filibut ni̱ shya̱ a̱chet).

⁴Mat Yoona ku ya a̱son ma̱ng gba a̱gwam Hiridut nyia̱, “A tyat doka A̱gwaza ji,[108] nang a mbwuo a̱byii̱k Filibut a̱na̱nyiuk ang wu[109] a̱ni.”

⁵Mat a̱nia, a̱gwam Hiridut si̱ chat tyia̱ á̱ hyat Yoona. A̱wot a̱ si̱ fa̱k a̱wun jhya̱ nang á̱niet ba na nyia̱ a̱ni. Mat á̱niet ba ku nwuak a̱chuchuk nyia̱ Yoona yet a̱ta̱m a̱kwonu A̱gwaza wa.

⁶A̱wot nang mam tak a̱gwai mbyin a̱gwam Hiridut hu nkaat a̱ bai a̱ni, nggwon a̱nap Hiridiyat ka si̱ song song sang nsum a̱zaghyi á̱nietchen ba. A̱wot a̱gwam Hiridut si̱ fa̱k nyinyang za̱m.

⁷Mat a̱nia, a̱gwam Hiridut si̱ la̱p a̱ sak ma̱ng shyishyi nyia̱ a̱ na nwuak nkaa kuzang kyang nang ka̱ chat a̱ni.

⁸Mat nang Hiridiya a̱yang nggwon a̱nap wu nfuut ka a̱ni, ka̱ si̱ nyia̱ ma̱ng a̱gwam Hiridut a̱ni, “N chat a jong nung a̱pyia̱ Yoona a̱tyu nyia̱ ba̱ptisman ka ma̱ a̱ka̱gba ma̱ninika!”

⁹A̱jawa fwuo a̱gwam Hiridut hu si̱ byian di̱ kyang gu ka̱n da̱p a̱ sak a̱ni. A̱wot mat shyishyi nang gu ka̱n shyi a̱zaghyi á̱nietchen nggu ba a̱ni, a̱ si̱ tyia̱ á̱ nat á̱ tyap a̱pyia̱ Yoona ka á̱ ti̱n.

¹⁰Mat a̱nia, á̱ si̱ nat mi̱ jaru ji á̱ si̱si̱ tyap a̱pyia̱ Yoona ka á̱ ti̱n.

¹¹A̱wot á̱ si̱ bai ma̱ng a̱pyia̱ Yoona ka ma̱ a̱ka̱gba[110] wu, á̱ si̱ ba̱ jong nggwon neam ka. A̱wot ka̱ si̱ nwuak a̱yang nka wu.

¹²Á̱ si̱ labeang bah, mman ta̱m Yoona na si̱ bai á̱ ba̱ kyiak kpi̱t vam nggu hu, ba̱ si̱si̱ niat. Ba̱ si̱ nat á̱ si̱ tak ma̱ng Yesu kyang ku shya̱ Yoona a̱ni.

¹³Nang Yesu nfa̱k a̱nia a̱ni, a̱ si̱ doot a̱ nwuo kukwon a̱wak, a̱ si̱ wak a̱ nat da̱ a̱vwuo ka̱ sang a̱yin a̱ni. A̱wot nang á̱kpa á̱niet ka nfa̱k a̱vwuo gu naat a̱ni, ba̱ si̱ ghwut ma̱ a̱ka̱keang. Ba̱ si̱ chong a̱byin á̱ si̱ shya̱ nggu a̱ja.

¹⁴Nang Yesu nshya̱ di̱ ghwut mi̱ kukwon a̱wak hu a̱ni, a̱ si̱ li á̱kpa á̱niet ka. A̱wot a̱ si̱ fa̱k kunak ba, a̱ si̱ choot á̱niet nzwán ba ma̱ mba.

¹⁵Jenshyung a̱tuk a̱kya, mman ta̱m Yesu na si̱ bai á̱ ba̱ shya̱ gu, ba̱ si̱ nyia̱, “A̱vwuo kani sang a̱yin. Mam hwa hu a̱ naat a̱ kwa. Ma̱sa̱kut, ti̱n á̱kpa á̱niet ka ba̱ nkat ma̱ a̱ka̱keang ba̱ si̱ kwai á̱pyia̱ mba nkyayak a̱ja.”

¹⁶A̱wot Yesu si̱ nyia̱ ma̱ng a̱mba, “Si̱ nang á̱ ti̱n mba ba̱ si̱ nkat bah. Nyin bya na nang ba kyayak hu, ba̱ ya.”

¹⁷A̱wot mman ta̱m na si̱ nwuak Yesu shim nyia̱, “Zi̱ byia̱ burodi a̱fwuon wa ma̱ng fa̱n feang!”

¹⁸Yesu si̱ nyia̱, “Nyi bai ndyo a̱ji.”

¹⁹A̱ si̱ tyia̱ á̱niet ba si̱ swan a̱byin ma̱ á̱kwop ba. A̱ si̱ kyiak burodi a̱fwuon ma̱ng fa̱n feang hu, a̱ si̱ neap tswazwa, a̱ si̱ gwai A̱gwaza di̱ nkyayak na. A̱ si̱ kpa̱ra̱m burodi wu, a̱ si̱ nwuat mman ta̱m nggu na. A̱wot mba meang, ba̱ si̱ ka̱u á̱kpa á̱niet ka.

²⁰A̱mgba̱m mba konyan si̱ ya a̱ si̱ swa nang gu nchat a̱ni. A̱wot á̱kukum nkyayak ba ba̱ si̱ bwat a̱ni, mman ta̱m na si̱ tung á̱ hyaai a̱ka̱cheang swak ma̱ a̱feang.

²¹Á̱ ku tyan á̱kpa á̱tyok ba̱ ku ya kyayak hu a̱tuk a̱kya a̱ni. Ba̱ si̱ tat chyikwop tsuon, kang ma̱ng á̱nyiuk ma̱ng mman!

²²Nang si̱ a̱hwa nswak a̱ni, Yesu si̱ kin tyia̱ mman ta̱m nggu na ba̱ nwuo kukwon a̱wak hu kiki, ba̱ byia̱k á̱ nat a̱ma̱nyi a̱gba̱ndang jok ka, gu ka ti̱n á̱kpa á̱niet ka ba̱ nkat a̱mali.

²³Nang gu mbyiat á̱kpa á̱niet ka sak a̱ni, a̱ si̱ nyeak a̱ nat di̱ tsutsok gu ka naai A̱gwaza ma̱nyin gu a̱ja. A̱tyetuk si̱ khwat nang gu shya̱ a̱ja ma̱nyin gu.

²⁴Di̱n jen a̱ja nang mman ta̱m na shya̱ ma̱ gbang ma̱ng khwong a̱gba̱ndang jok hu, á̱ swuo a̱bung mi̱ kukwon a̱wak hu. Mat ywan a̱sa̱khwot hu ku ji̱m á̱ bwuot ma̱ng a̱mba lilyim, mat wun hu ku hyap mi̱ chet.

²⁵A̱wot nang jen ji yet tswam tsat mi̱ shong a̱tson, Yesu si̱ chong tazwa a̱sa̱khwot, a̱ nat da̱ a̱vwuo mba.

²⁶Nang mman ta̱m Yesu na ndi gu chong tazwa a̱sa̱khwot ka a̱ chobai da̱ a̱vwuo mba a̱ni, a̱wun si̱ ta̱bat baa! Ba̱ si̱ koot nkun mat a̱wun na, nyia̱, “Ki̱ka̱a̱u! A̱tyu shyit wa wu!”

²⁷Mi̱ di̱ yong a̱hwa, Yesu si̱ kin kaat ma̱ng a̱mba nyia̱, “Nyi yok fa̱k a̱wun bah, nyi gbang a̱lyia̱, nung gwa!”

²⁸Bitut si̱ nwuak gu shim nyia̱, “A̱tyoli, ka̱ a̱tsak a̱lyiat nang nwan wa, tyia̱ n chong tazwa a̱sa̱khwot ka, n bai da̱ a̱vwuo ang!”

²⁹Yesu si̱ nyia̱, “Ii, Bitut da̱ bai la!” A̱wot Bitut si̱ ghwut mi̱ kukwon a̱wak hu, a̱ si̱ chong tazwa a̱sa̱khwot ka a̱ naat da̱ a̱vwuo Yesu.

³⁰Nang Bitut ndi wun hu nhyap mi̱ chet ma̱ng ywan a̱sa̱khwot hu a̱ni, a̱ si̱ fa̱k a̱wun. A̱ si̱ nwuo ya̱lyi̱ri̱p ma̱ a̱sa̱khwot na. A̱ si̱ yorong ma̱ng a̱gba̱ndang a̱nwuat nyia̱, “A̱tyoli, san nung!”

³¹Mi̱ di̱ yong a̱hwa Yesu si̱ kin neap bwak, a̱ si̱ nta̱bat Bitut. A̱ si̱ nyia̱ ma̱ng a̱nggu, “A nwuak fwuo da̱ nung ma̱ a̱da̱dei. Yihwa mbyia̱ nang a mbut mi̱ fwuo?”

³²Nang Bitut mbwuok a̱ nwuo mi̱ kukwon a̱wak hu a̱ni, Yesu si̱ mun a̱ nwuo ma̱ng a̱nggu. Wun hu si̱ kin gyong.

³³A̱wot mman nta̱m na si̱ kyuak Yesu ntong. Ba̱ si̱ nyia̱, “A̱tsak a̱lyiat, a yet Nggwon A̱gwaza kya za̱m!”

³⁴Nang ba̱ mbyia̱k a̱gba̱ndang jok wu a̱ni, ba̱ si̱ chyok á̱ nwuo mi̱ fam a̱byin Ja̱ni̱sa̱ra̱t.

³⁵Jen nang á̱niet a̱keang ba nfi̱k nang Yesu wa a̱ni, nkhang bai nggu na si̱ kai a̱mgba̱m fam a̱byin a̱hwa ma a̱nggang. A̱wot di̱ banjen ma̱ a̱da̱dei, á̱ si̱ bai ma̱ng á̱niet nzwán da̱ a̱vwuo nggu, gu ka choot baa.

³⁶Ba̱ si̱ naai ngguu gu yok á̱niet nzwán ba ba̱ byiam guu, ku di̱ ma̱ a̱ta̱m a̱toot gu kikya. A̱wot a̱mgba̱m a̱tyu a̱ byiam gu a̱ni, a̱ si̱ choot.