Read tyap Matyu 15 Bible Online

Matyu 15 - tyap bible

Matyu 15

¹Á̱ si̱ labeang bah, A̱fa̱risawa ma̱ng á̱niet tyiet doka A̱gwaza á̱ghyang si̱ bai neet Urusha̱lima, ba̱ si̱ ba̱ lyip Yesu nyia̱,

²“Yihwa mbyia̱ mman ta̱m ang na ndak khwi taada á̱niet khwop á̱niet nzi̱t ji? Mat ba̱ ni̱ kwi mbwak mba na, ba̱ sii ya kyayak bah.”

³Yesu si̱ nwuak ba shim ma̱ng lyip nyia̱, “A̱wot nyin, yihwa mbyia̱ nyi nchak doka A̱gwaza ji mat khwi taada nyin ji?

⁴Mat A̱gwaza nwuak doka nyia̱, ‘Nwuak a̱tyia̱ ma̱ng a̱yang ang wu shi.’[111] A̱wot ji̱ bu nyia̱, ‘Konyan wa lyiat a̱tyia̱ ma̱ng a̱yang nggu wu lihyat, ku yet ta hwa á̱ hyat gu.’

⁵“A̱wot nyi ni̱ nwuat ta̱fwat nyia̱, ku myim nggwon ka̱ nyia̱ ma̱ng á̱niet mbyin nka ba, ‘Ma̱sa̱kut nyi yok byian fwuo bah. N si̱ mi̱n beang nyin bah. Mat n wa ka̱n nyia̱ shyishyi nyia̱; n na nang A̱gwaza a̱mgba̱m kyang n khai sak zan n na nang nyin a̱ni.’

⁶Di̱ tangka̱i tyiet huni, nyi tak da̱nang ku ngyet ta hwa nggwon ka̱ nwuak á̱niet mbyin[112] nka shi bah. A̱nia wa nyi ntyia̱ A̱lyiat A̱gwaza na a̱buk kyang, da̱nian nyi ka khwi taada nyin ji.

⁷Nyin á̱bubuk á̱niet! A̱tsak a̱lyiat wa nang Ishaya a̱ta̱m a̱kwonu A̱gwaza gbangbang ku ntak á̱zanson tazwa nyin, ma̱nang gu ndyuut a̱ni nyia̱,

⁸‘Á̱niet bani dyep nung ma̱ng nunu hwa. A̱wot nfwuo mba na shya̱ ma̱ zan ma̱ng a̱nung.

⁹A̱wot ntong nang ba̱ kwok nung ndyo a̱ni, ku yet a̱buk nta̱m wa. Mat tyiet mba hu yet tyiet taada á̱nietbishyi ja ma̱nyin ji. A̱wot ba̱ si̱ tyiet á̱ghyang á̱niet jii nang tyiet ku neet da̱ a̱vwuo A̱gwaza a̱ni.’[113] ”

¹⁰Yesu si̱ yorong á̱kpa á̱niet ka, a̱ si̱ nyia̱ ma̱ng a̱mba, “Nyi myiai a̱fufwuo nyi fa̱a̱k, nyi bu fi̱k nung shansham!

¹¹Kyang ku nwuai a̱bwonu a̱yin a̱ni, huhwa tyei gu a̱na̱ndyung wu bah; si̱ a̱lyiat na̱ ghwut a̱bwonu nggu ka a̱ni, ni̱nia tyei gu a̱na̱ndyung wu.”

¹²A̱jawa mman ta̱m nggu na si̱ bai, á̱ ba nyia̱ ma̱ng a̱nggu a̱ni, “A lyen nang A̱fa̱risawa ba ndak fa̱k a̱lyiat ang naa?”

¹³Yesu si̱ nwuak ba shim nyia̱, “Kuzang a̱kwon da̱nang A̱tyia̱ nung wu a̱ shya̱ tswazwa kya a̱ni ti̱p ka bah, á̱ na ngat kaa.

¹⁴Mat a̱nia, nyi bwung baa. Ba̱ yet á̱niet a̱fi̱fan bya. A̱wot ba̱ kwak á̱niet a̱fi̱fan shán mameang. A̱wot ka̱ a̱tyu a̱fi̱fan kwak a̱tyu a̱fi̱fan shan, a̱mgba̱m ba a̱feang, ba̱ na kwa mi̱ bwong.”

¹⁵A̱wot Bitut si̱ nyia̱ ma̱ng Yesu, “Wa̱i nzi̱t a̱lyiat di̱ kidee nang a nyia̱ da̱ á̱niet si̱ mi̱n shya̱ a̱na̱ndyung di̱ kyayak nang ba̱ ya a̱ni bah.”

¹⁶Yesu si̱ lyip ba nyia̱, “Nyin meang, nyi ka̱n fi̱k baa?

¹⁷Nyi lyen nang kuzang kyayak a̱tyubishyi ya a̱ni, ku na swak a̱ nat a̱mafa. Ma a̱nia wa, ku bu na swak a̱ ghwut mi̱ vam nggu hu.

¹⁸A̱wot a̱lyiat na̱ ghwut a̱bwonu a̱yin a̱ni, na̱ ni̱ neet ma̱ a̱di̱dam mi̱ fwuo nggu wu wa. Ni̱nia ni̱ tyia̱ nggu a̱na̱ndyung wu.

¹⁹Mat mi̱ fwuo hwa nang a̱ka̱tuk a̱di̱dam wu nghwut; hyat a̱yin, katnaan, kuzang tangka̱i a̱shi̱shi̱k nyia̱, tsang, bwoi a̱ka̱laa, ma̱ng tyam á̱ghyang.

²⁰Nkyang nani na̱ ghwut mi̱ fwuo a̱ni, ni̱nia tyei a̱yin a̱na̱ndyung wu. A̱wot ya kyayak ma̱ng nwai kwi mbwak si̱ mi̱n tyia̱ a̱yin a̱na̱ndyung bah.”

²¹Jen nang Yesu nghwon Ga̱lili a̱ni, a̱ si̱ nyeak a̱ nat a̱za mi̱ fam a̱byin a̱ka̱keang Taya ma̱ng Sidon.

²²A̱nap a̱ghyang a̱ nwai yet A̱yahudawa a̱ni[114] ku shya̱ mi̱ fam a̱byin a̱hwa. A̱ si̱ kin neet a̱ bai da̱ a̱vwuo Yesu a̱ tyiet kun mi̱ chet, a̱ naai nggu nyia̱, “A̱tyoli, Nggwon Da̱wuda[115], ma̱sa̱kut, fa̱k kunak nung! Mat a̱ka̱tuk ntswa a̱ shya̱ mi̱ nggwon a̱nap nung ka a̱ni. A̱wot a̱ tyei nka swuo a̱bung ba̱t!”

²³A̱wot Yesu si̱ kaat ma̱ng a̱nggu bah. A̱jawa mman ta̱m Yesu na si̱ nyia̱ ma̱ng Yesu, “Ma̱sa̱kut A̱tyoli, tyia̱ a̱byii̱k wuni a̱ nkat! Mat a̱ ya a̱son ma̱ng tyei nkun a̱ shyui nzi̱t a̱fufwuo ma̱ng a̱nak nggu ka.”

²⁴A̱jawa Yesu si̱ nyia̱, “Á̱ ta̱m nung n beang zón seap A̱gwaza ji bwuk wa a̱ni ma̱nyin ji; bibya yet á̱niet Isi̱rela ba.”

²⁵A̱nap a̱wa si̱ neet a̱ ba̱ kpaat a̱khwukhwut, a̱ si̱ kyuak ntong a̱zaghyi Yesu. A̱ si̱ ya a̱son ma̱ng naai nggu nyia̱, “A̱tyoli, ma̱sa̱kut beang nung!”

²⁶Yesu si̱ nwuak gu shim di̱ kidee nyia̱, “Á̱ nyia̱, ku myim á̱ kyiak kyayak mman á̱ ta a̱ka̱bwu ndyo bah.”

²⁷A̱nap a̱wa si̱ nyia̱, “Ii, a̱tsak a̱lyiat wa, A̱tyoli. A̱mgba̱m ma̱ng a̱nia, á̱ ni̱ shim a̱ka̱bwu na̱ tang chunchong nkyayak ji, ji̱ kwa̱i tafa a̱tyii a̱tyoli mba ka a̱ni.”

²⁸Yesu si̱ nwuak gu shim hu nyia̱, “A̱ya, a̱yang a̱li, nwuak fwuo ang hu shi ba̱t! Kyang nang a chat a̱ni, n na nyia̱ ang dyo.” Mi̱ di̱ yong a̱hwa nggwon a̱nap nggu ka si̱ kin choot kiki!

²⁹Yesu ma̱ng mman ta̱m nggu na si̱ bwuok á̱ nat da̱ a̱beam a̱gba̱ndang jok Ga̱lili wu. A̱wot a̱ si̱si̱ nyeak tsok, a̱ si̱ nswan.

³⁰Á̱kpa á̱niet ma̱ a̱di̱di̱t si̱ bai ma̱ng a̱nggu á̱niet nang a̱ti̱tak ba ta̱luk a̱ni, á̱niet a̱fi̱fan, á̱niet ba̱ chong á̱ kyiat a̱ni, a̱yaama̱ma̱m, ma̱ng á̱niet nzwán ma̱ a̱di̱di̱t. Á̱ si̱ myiai mbaa a̱zaghyi Yesu, a̱ si̱ choot a̱mgba̱m ba.

³¹Mat a̱nia, nang á̱kpa á̱niet ka ndi á̱niet ba̱ yet a̱yaama̱ma̱m nnwuo a̱lyiat a̱ni, á̱ si̱ choot á̱niet ba nang a̱ti̱tak ba ta̱luk a̱ni, á̱niet ba̱ kyiat a̱ni si̱ nwuo a̱chyet, á̱niet a̱fi̱fan si̱ nwuo nwuan a̱vwuo; ba̱ si̱ fa̱k a̱ga̱de! A̱wot ba̱ si̱ dyep A̱gwaza Isi̱rela wu.

³²Yesu si̱ yorong mman ta̱m nggu na, a̱ si̱ nyia̱ ma̱ng a̱mba, “N fwuong kunak á̱niet bani. Ba̱ shya̱ a̱ji ma̱ng a̱nung mam tat nia na. A̱wot ba̱ byia̱ nkyayak nang ba̱ na ya a̱ni bah. N chat n ti̱n ba, ba̱ nkat zong bah. Kalak ba̱ chong á̱ feang di̱n vak.”

³³Mman ta̱m na si̱ nyia̱, “A̱ji wa zi̱ na shya̱ kyayak mi̱ tswa a̱yit jini, ku na maai á̱kpa á̱niet kani a̱ni?”

³⁴Yesu si̱ lyip ba, nyia̱ “Burodi a̱mang wa nang nyi byia̱?” Mman ta̱m na si̱ nwuak gu shim nyia̱, “Burodi a̱natat wa, ma̱ng a̱bachyuang fa̱n ma̱ a̱da̱dei.”

³⁵Huhwa Yesu si̱ nyia̱ ma̱ng á̱kpa á̱niet ka ba̱ swan a̱byin.

³⁶Nang gu nkyiak burodi a̱natat ma̱ng fa̱n hu a̱ni, a̱ si̱ gwai A̱gwaza da̱nian naa. A̱ si̱ kpa̱ra̱m a̱ si̱ nwuat mman ta̱m na. Ba̱ si̱ ka̱u á̱kpa á̱niet ka.

³⁷A̱mgba̱m á̱niet ba si̱ ya, ba̱ si̱ swa̱i nang ba̱ nchat a̱ni. A̱wot mman ta̱m na si̱ kwok á̱kum nkyayak ka̱ bwat a̱ni, na̱ si̱ hyaai a̱cha̱chet a̱ka̱cheang a̱natat.

³⁸Á̱ si̱ tyan á̱niet nang Yesu ku tsuung a̱tuk a̱kya a̱ni. Ba̱ si̱ tat á̱tyok chyikwop nyaai bya, kang ma̱ng á̱nyiuk ma̱ng mman.

³⁹Yesu si̱ ti̱n á̱kpa á̱niet ka ba̱ si̱ nkat a̱mali. A̱wot a̱ si̱ nwuo kukwon a̱wak, a̱ si̱ wak a̱ byia̱k a̱ nat fam a̱byin Ma̱ga̱dan[116].