Read tyap Matyu 17 Bible Online

Matyu 17 - tyap bible

Matyu 17

¹Nang mam a̱taa nswak a̱ni, Yesu si̱ doot ma̱ng Bitut ma̱ng mman Za̱ba̱di na a̱feang, Yakubu ma̱ng Yoona. Ba̱ si̱ nyeak á̱ nat tazwa a̱ga̱nga̱ng a̱fan, mba ma̱nyin mba a̱ja.

²Nang ba̱ shya̱ di̱ nwuan a̱ni, á̱ si̱ shyak li Yesu hu a̱zaghyi mba. A̱ghyi nggu ba si̱ sai nang mam a̱ni. A̱wot a̱yaatoot nggu ba si̱ bwuak sai, a̱ ya á̱ghyi ma̱ mya̱myat a̱myat.

³A̱wot Musa ma̱ng Iliya si̱ kin tyia̱ pwut a̱ ghwut kpa̱sai! Ba̱ si̱ nwuo lyiat ma̱ng Yesu.

⁴Huhwa Bitut si̱ kaat ma̱ng Yesu nyia̱, “A̱tyoli, ku yet a̱sham nang zi̱ nshya̱ ji a̱ni! Ka a shim, n na ntat a̱suswak a̱tat a̱ji di̱ lyulyoot nyin; nyiung da̱nian ang, nyiung da̱nian Musa, a̱wot nyiung ku yet si̱ Iliya!”

⁵Neet nang Bitut ni̱ shya̱ da̱ a̱lyiat na, a̱kyenkyai á̱ni̱nian a̱ghyang si̱ kin neet ma̱ vwuu, a̱ ba̱ kup baa! A̱wot a̱nwuat si̱ kin ghwut a̱ neet ma̱ á̱ni̱nian ba nyia̱, “Nggwon nung kya ka nang nfa̱k da̱ nka ba̱t a̱ni! Kikya nyi na myiai a̱fufwuo, nyi fwuong!”

⁶Nang mman ta̱m na nfa̱k a̱nwuat ka a̱ni, a̱wun si̱ ta̱bat ba ba̱t. Ba̱ si̱ shyot á̱ kwa̱i á̱ ta̱gurup a̱ghyi ba a̱byin.

⁷A̱wot Yesu si̱ bai a̱ ba̱ shyup baa, a̱ si̱ nyia̱, “Nyi ta̱ngam, nyi yok fa̱k a̱wun bah.”

⁸Nang ba̱ nta̱ngam á̱ghyi mba ba, ba̱ si̱ nwuan a̱ni. Ba̱ si̱ bu li Musa ma̱ng Iliya bah, si̱ mi̱ Yesu wa ma̱nyin gu.

⁹Nang ba̱ nchorop á̱ neet da̱ a̱fan ka a̱ni, Yesu si̱ gba mba nyia̱, “Nyi yok tak ma̱ng a̱yin kyang nang A̱gwaza tyai nyin ndyo nyi si̱ li a̱ni bah, si̱ nang á̱ ba̱ ta̱ngam Nggwon A̱tyubishyi[125] ma̱ng swuan ma̱ á̱niet ba̱ ka̱n kwi a̱ni.”

¹⁰Huhwa mman ta̱m na si̱ lyip Yesu nyia̱, “Yihwa mbyia̱ nang a̱cha̱chet á̱niet tyiet doka Musa ba nnyia̱, ku yet ta hwa Iliya wa a̱ yet a̱son bai ka, Kristi a̱ sii bai?”[126]

¹¹Yesu si̱ nwuak ba shim nyia̱, “A̱nia wa za̱m! Iliya wa na yet a̱son bai ka, da̱nian gu ka jhyi kuzang kyang a̱ sak.

¹²A̱wot n tak ma̱ng a̱nyin, a̱tyu a̱ yet kidee Iliya a̱ni, a̱ wa ka̱n bai. A̱wot á̱niet ba si̱ fi̱k gu bah. Ba̱ si̱ nyia̱ gu a̱ka̱kpa̱t, a̱wot ba̱ si̱ hyat gu. Ma a̱nia wa, Nggwon A̱tyubishyi ka bu na swuo a̱bung mbwak ba.”

¹³A̱jawa mman ta̱m na si̱ nfi̱k nang Yesu ntyan Yoona a̱tyu nyia̱ ba̱ptisman ma̱ng Iliya wa.

¹⁴Nang ba̱ ntat a̱tyin a̱fan ka a̱ni, ba̱ si̱ shya̱ nang á̱kpa á̱niet tung á̱ fwuong baa. A̱tyok a̱ghyang si̱ neet a̱ ba kpaat a̱khwukhwut a̱zaghyi Yesu. A̱ si̱ naai nggu nyia̱,

¹⁵“A̱tyoli, ma̱sa̱kut fa̱k kunak nggwon nung ka! Ka̱ kwi long chen, ka̱ ni̱ swuo a̱bung ba̱t. Ka̱ ni̱ shyot a̱ kwa̱i mi̱ ndong ma̱ng a̱sa̱khwot kuzang jen.

¹⁶N ka̱n bai ma̱ng nka da̱ a̱vwuo mman ta̱m ang na, ba̱ ka choot kaa. A̱wot ku si̱ khat baa.”

¹⁷Yesu si̱ nyia̱, “Ka̱t, che lak fwuong ma̱ng nwai nwuak a̱chuchuk! N na nswan ma̱ng a̱nyin si̱ nat zang jen ja? Zang jen ja n na ngya a̱son mi̱ nyap fwuo ma̱ng a̱nyin? Nyi bai ma̱ng a̱nung nggwon seam ka a̱ji!”

¹⁸Yesu si̱ kam a̱ka̱tuk ntswa wu a̱ shya̱ mi̱ nggwon seam ka a̱ni, a̱ si̱ ghwut. Mi̱ di̱ yong a̱hwa, nggwon seam ka si̱ kin choot.

¹⁹Nang si̱ a̱hwa nswak a̱ni, mman ta̱m Yesu na si̱ bai, á̱ ba̱ shya̱ nggu ma̱nyin gu. Ba̱ si̱ lyip gu nyia̱, “Yihwa mbyia̱ nang zi̱ nwai nkam a̱ka̱tuk ntswa, a̱ si̱ ghwut ma̱ a̱nggu?”

²⁰Yesu si̱ nyia̱ ma̱ng a̱mba, “Nyi si̱ mi̱n kam a̱ka̱tuk ntswa wu a̱ ghwut ma̱ a̱nggu bah, mat nyi nwuak a̱chuchuk ma̱ a̱da̱dei. A̱tsak a̱lyiat n tak nyin, ka̱ nyi wa nwuak fwuo da̱ nung ma̱ a̱da̱dei nang a̱bada̱dei ntswa mustat a̱ni; ka̱ nyi nyia̱ ma̱ng a̱fan kani, ‘Shyei a̱ji a nat a̱jaau!’ Si̱ nyi li ka shyei! A̱wot á̱ mbyia̱ kyang ku na kaat nyin a̱ni bah.”

²²Nang a̱mgba̱m mman nta̱m na bu ntung ndung ma̱ng Yesu ma̱ a̱byin Ga̱lili ka a̱ni, Yesu si̱ nyia̱ ma̱ng a̱mba, “Á̱ na labeang bah, á̱ na tyia̱ Nggwon A̱tyubishyi ka mbwak á̱niet ba̱ lak li nka a̱ni.

²³Ba̱ na hyat ka. A̱wot a̱tuk mam tat ka, á̱ na ta̱ngam ka ma̱ng swuan ma̱ á̱niet ba̱ ka̱n kwi a̱ni.” Nfwuo mman ta̱m na si̱ byian ba̱t.

²⁴Nang Yesu ma̱ng mman ta̱m nggu na mbai a̱keang Ka̱fanahum a̱ni, á̱niet saai kurum ta̱m[128] A̱mali Nwuat Za̱nang A̱gwaza ba, si̱ bai á̱ ba̱ lyip Bitut nyia̱, “A̱tyu tyiet nyin wu ni̱ tan kurum ta̱m A̱mali Nwuat Za̱nang A̱gwaza ka baa?”[129]

²⁵Bitut si̱ nwuak ba shim nyia̱, “Ii, a̱ ni̱ tan.” A̱ si̱ bwuok a̱ nwuo mali ka. Neet nang Bitut ka̱n nwuo a̱lyiat na bah, Yesu si̱ lyip gu nyia̱, “Bitut[130], a li ni? Á̱gwam swanta ba ni̱ saai kurum ga̱ndu hu mbwak a̱nyanyan kya? Mbwak á̱niet mba kya kee, mbwak á̱khwo mba kya?”

²⁶Bitut si̱ nwuak shim nyia̱, “Ba̱ ni̱ saai nhu mbwak á̱khwo mba kya.” Yesu si̱ nyia̱ ma̱ng a̱nggu, “Ka̱ a̱nia wa, mman a̱byin na myim ba̱ tan bah.

²⁷A̱wot zi̱ chat zi̱ byian mba nfwuo bah. Nat ma̱ a̱gba̱ndang jok a si̱ koot tsop a̱ja. A̱fa̱n nang a tsa ta̱bat hu a̱ni, a khwuk a̱nu ka. A na ndi a̱gba̱ndang a̱ka̱mbi̱ri̱ng tswa kurum[131], a̱ maai ntan kurum ta̱m nzi̱t hu A̱mali Nwuat Za̱nang A̱gwaza ka a̱ni.”