Read tyap Matyu 18 Bible Online

Matyu 18 - tyap bible

Matyu 18

¹Nang si̱ a̱hwa nswak a̱ni, mman ta̱m Yesu na si̱ bai da̱ a̱vwuo gu. Ba̱ si̱ lyip nyia̱, “A̱tyoli, a̱nyan wa swak ma̱ng shi hu mi̱ Tyok Ma A̱gwaza tswazwa hu?”

²Yesu si̱ yorong a̱bada̱dei nggwon a̱ sak ma̱ a̱ka̱wa̱tyia̱ mba.

³A̱ si̱ nyia̱, “N tak nyin a̱tsak a̱lyiat, si̱ nang nyi ghwon a̱ka̱tuk nyia̱ nyin wu, nyi si̱ bu kyiak pyipyia̱ nyin nang a̱banggwon kani a̱ni, kalak nyi na nwuo mi̱ Tyok Ma A̱gwaza tswazwa hu bah.

⁴A̱tyu a̱ kyiak a̱pyia̱ nggu nang a̱banggwon kani a̱ni, nggu wa swak ma̱ng shi hu mi̱ Tyok Ma A̱gwaza tswazwa hu.

⁵“A̱wot konyan wa san a̱da̱dei nggwon nang a̱si̱ kani a̱ni da̱nian nung, ku li á ngyei nung gwa gu san.

⁶A̱wot konyan wa tyia̱ a̱tyo nyiung ma̱ a̱chyuang mman ba̱ nwuak fwuo da̱ nung a̱ni, si̱ nyia̱ a̱ka̱tuk, ku na lan á̱ lya̱u a̱nyuu naan kwang a̱ma̱nfwuo, á̱ ta nggu ma̱ a̱gba̱ndang a̱tsuung kyai a̱sa̱khwot!

⁷“Ku swan á̱niet mi̱ swanta ba, da̱nian ba̱ yet á̱ghyang á̱niet jat nang ba̱ na nnyia̱ a̱ka̱tuk nyia̱ a̱ni! Shimba mak ku bai, a̱wot ku swan a̱tyu a̱ na yet jat nang mak hu na mbai a̱ni!

⁸“Mat a̱nia, ka̱ bwak ang ku tak ang na yet ang jat a nyia̱ a̱ka̱tuk nyia̱, tyap hu a tyat ji̱p! Ku na lan a shya̱ swuan sang sangba̱p ji ma̱ng á̱kum bwak ku tak nyiung, nang á̱ na nta ang mi̱ a̱nga̱ngak ndong sang sangba̱p hu ma̱ng a̱jhyem mbwak nfeang, ku a̱jhyem a̱ti̱tak a̱feang a̱ni.

⁹Ma a̱nia wa, ka̱ tswa a̱li ang ja ma ngyet ang jat nyia̱ a̱ka̱tuk nyia̱, a ti̱n ji ji̱p! Ku na lan a shya̱ swuan sang sangba̱p ji ma̱ng tswa a̱li jhyung, nang á̱ na nta ang mi̱ a̱nga̱ngak ndong sang sangba̱p hu ma̱ng a̱mgba̱m tswá á̱ghyi sweang ang ji a̱ni.”

¹⁰“Nyi ta̱bam, nyi yok jhyuai a̱tyo nyiung ma̱ a̱chyuang mman wuni bah! Mat n tak ma̱ng a̱nyin, nang a̱yaata̱m tswá mba ba nwuai a̱zaghyi A̱tyia̱ nung ka a̱ shya̱ tswazwa ka a̱ni da̱nian mba kuzang jen.[132]

¹²“Yihwa nyi dam? Ka̱ a̱yin byia̱ zón seap chyi, a̱wot jhyung si̱ bwuk, a̱ na ghwon á̱kum zón seap nswak a̱kubunyiung ma̱ a̱kubunyiung da̱ a̱tyin a̱fan, gu nat chat si̱ ji bwuk a̱ni baa?

¹³A̱wot ka̱ a̱ shya̱ nji, n tak nyin a̱tsatsak a̱lyiat, a̱ na gwai da̱ nji a̱ swak á̱kum nswak a̱kubunyiung ma̱ a̱kubunyiung ji̱ nwai bwuk hu a̱ni.

¹⁴Ma a̱nia wa, A̱tyia̱ nyin wu a̱ shya̱ tswazwa ka a̱ni, a̱ chat nggwon a̱nyiung mi̱ mman nani ka̱ bwuk bah.

¹⁵“Ka̱ a̱tyu khwi a̱ghyang bwuo ang a̱bun, nat a si̱ shya̱ nggu ma̱nyin nggu. A tak ma̱ng a̱nggu kyang hu gu nyia̱ ang dyo a̱ni. Ka̱ a̱ si̱ fa̱k ang a̱ si̱ shim, a chi nggu ndyo. Nyi jhyi swat nyin huhwa a̱hwa.

¹⁶A̱wot ka̱ a̱ si̱ lak fa̱k a̱lyiat ang na, nat ndung ma̱ng a̱tyo nyiung ku á̱niet a̱feang ma̱ á̱niet khwi ba ma̱ng a̱nwan, nyi bu bwuok nat nyi si̱ shya̱ nggu. Mat A̱lyiat A̱gwaza na nyia̱, ‘Kuzang kyang nang á̱niet a̱feang ku a̱tat shim nang ku ngyet a̱tsak a̱lyiat, ba̱ si̱ nnwuak sheda a̱ni, ku yong a̱nia.’[134]

¹⁷Ka̱ a̱tyu a̱wa ma ndak fa̱k á̱niet a̱bya, nat ma̱ng a̱lyiat na a̱zaghyi á̱niet khwi. Ka̱ a̱ bu lak fa̱k á̱niet khwi ba, nyi kyiak gu nang a̱tyu nwap a̱ chyi A̱gwaza a̱ni, ku a̱tyu saai kurum ga̱ndu[135] nang á̱ vwuong gu ma̱ á̱niet mat shyuo á̱niet a̱ni.”

¹⁸“N tak nyin a̱tsak a̱lyiat, kuzang nkyang nang nyi shim á̱ nyia̱ mi̱ swanta hu, á̱ na shim á̱ nyia̱ nhu Ma A̱gwaza tswazwa ka. A̱wot kuzang kyang nyi lak á̱ nyia̱ mi̱ swanta hu, á̱ ma na lak á̱ nyia̱ nhu Ma A̱gwaza tswazwa ka.

¹⁹“N bu ntak nyin a̱tsak a̱lyiat, ka̱ á̱niet a̱feang mami nyin á̱niet khwi mi̱ swanta ba shim tazwa kuzang kyang nang nyi naai a̱ni, A̱tyia̱ nung wu a̱ shya̱ tswazwa ka a̱ni, na nang nyin huu.

²⁰Mat tyan nang á̱niet a̱feang ku á̱niet a̱tat ntung nang á̱niet khwi nung a̱ni[136], n shya̱ dundung ma̱ng a̱mba a̱ja.”

²¹Bitut si̱ bai da̱ a̱vwuo Yesu a̱ si̱ lyip gu, nyia̱, “A̱tyoli, a̱ka̱mang kya a̱kpa̱ndang swat nung na mbwuo nung a̱bun, n chi ngguu ku maai? A̱ka̱natat kya kee?”

²²Yesu si̱ nwuak gu shim di̱ kidee nyia̱, “Kaai, a̱ka̱natat ka maai bah. A̱wot kuzang jen[137] nang gu mbwuo a̱bun, a chi nggu ndyo.

²³“Mat a̱nia, á̱ na tyan Tyok Ma A̱gwaza tswazwa hu ma̱ng a̱gwam a̱ chat zop kurum nang á̱khwo nggu ba khwap da̱ a̱vwuo nggu a̱ni.

²⁴Nang a̱gwam wu nnwuo zop kurum hu a̱ni, a̱ si̱ ta̱m á̱ bai ma̱ng a̱nggu a̱khwo nang nggu khwi gu ta kurum, ku swuo chet gu tan mi̱ swat nggu hu a̱ni[138].

²⁵Nang kurum hu nkaat a̱khwo wu tan hu a̱ni, a̱gwam wu si̱ tyia̱ á̱ lyap gu ma̱ng a̱byii̱k nggu wu, mbeang mman mba na, ma̱ng a̱mgba̱m kyang nang ba̱ byia̱ a̱ni, á̱ ntan ta hu.

²⁶“A̱khwo a̱wa si̱ ta̱bwak a̱byin a̱zaghyi a̱gwam ka. A̱ si̱ naai gu nyia̱, ‘A̱gwam, ma̱sa̱kut fwuo ang ku shyim, nyap fwuo hu, n na ntan ang kurum ang hu.’

²⁷A̱jawa a̱gwam wu si̱ fa̱k kunak a̱khwo wu ba̱t, a̱ si̱ chi nggu ta hu. A̱wot a̱ si̱ yok gu, a̱ si̱ nkat.

²⁸“Nang a̱khwo a̱wa nghwut da̱ a̱vwuo a̱gwam ka a̱ni, a̱ si̱ myim ma̱ng a̱khwo a̱ghyang mameang nang gu khwi nggu a̱byi ta kurum[139] a̱ni. A̱ si̱ ta̱bat gu di̱ za̱nwuat, a̱ si̱ shyuk fwuo hu! A̱ si̱ nyia̱, ‘Ma̱ninika, tan nung ta kurum nang n khwi ang a̱ni!’

²⁹“A̱khwo wu a̱ ba̱ng ta kurum hu a̱ni, si̱ naai gu nyia̱, ‘Ma̱sa̱kut, nyap fwuo hu! Nang nung a̱banjen ma̱ a̱da̱dei, n na ntan ang ta kurum ang hu!’

³⁰A̱wot a̱khwo wu a̱ khwi ta hu a̱ni si̱ lak. A̱ si̱ tyia̱ á̱ si̱ ta̱bat a̱khwo a̱ ba̱ng ta hu a̱ni. Á̱ si̱ nyim gu mi̱ jaru, si̱ nang gu ntan ta kurum hu a̱ tyak.

³¹“Nang á̱khwo á̱ghyang ndi a̱nia a̱ni, nfwuo mba na si̱ byian ba̱t! Ba̱ si̱ nat, á̱ si̱ tak ma̱ng a̱gwam mba wu kuzang kyang nang á̱ nyia̱ a̱ni.

³²Huhwa a̱gwam wu si̱ yei a̱khwo nang nggu ka̱n chi nggu a̱gba̱ndang ta kurum wu a̱ni, a̱ si̱ nyia̱ ma̱ng a̱nggu, ‘Nwan a̱ka̱tuk a̱khwo! N chi ang a̱gba̱ndang ta kurum nang n khwi ang a̱ni, da̱nian a naai nung.

³³“ ‘Nwan meang, ku myim a fa̱k kunak a̱kpa̱ndang ta̱m ang wu, a chi nggu a̱byi ta kurum ka, ma̱nang n nfa̱k kunak ang a̱ni baa?’

³⁴A̱gwam wu si̱ fa̱k a̱lyia̱ ya ba̱t, a̱ si̱ nwuak doka á̱ tyia̱ gu mi̱ jaru, á̱ nyiak guu, si̱ nang gu ntan a̱mgba̱m ta kurum nang a̱gwam wu khwi nggu a̱ni.

³⁵“Ma a̱nia wa, ka̱ mami nfwuo nyin na nang nyi lak chi a̱bun nang á̱kpa̱ndang swat nyin ba bwuo nyin dyo a̱ni, A̱tyia̱ nung wu a̱ shya̱ tswazwa ka a̱ni, ma na lak chi a̱ka̱tuk nyia̱ nyin wu.”