Read tyap Matyu 20 Bible Online

Matyu 20 - tyap bible

Matyu 20

¹“Tyok Ma A̱gwaza tswazwa hu li nang a̱tyu byia̱ a̱byin a̱na̱p wa mak a̱vwuo ma̱ a̱tsotson a̱tson, a̱ nat kyiak á̱niet nta̱m, ba̱ na nyia̱ gu ta̱m ma̱ a̱byin a̱na̱p ka a̱ni.

²Ba̱ si̱ nyia̱ za nta̱m ji á̱ sak di̱ kurum ta̱m kwa mam[151]. A̱ si̱ tyia̱ mba, ba̱ si̱ nat ta̱m hu.

³“A̱ si̱ bu ghwut nang tswam a̱kubunyiung a̱tsotson a̱ni, a̱ si̱ li á̱ghyang á̱niet ba̱ yong ma̱ tai a̱zanu tungga.

⁴A̱ si̱ nyia̱ ma̱ng a̱mba, ‘Nyin meang, n kyiak nyin ta̱m. Nyi nat nyi nyia̱ ta̱m hu ma̱ a̱byin a̱na̱p nung ka. N na ntan nyin kurum hu ku myim a̱ni jenshyung.’

⁵“Ba̱ si̱ nat ta̱m hu ma̱ a̱byin a̱na̱p ka. A̱tyu byia̱ a̱byin wu si̱ bu ghwut ma̱ a̱ka̱wa̱tyia̱ a̱ta̱mam ma̱ng tswam tsat. A̱ si̱ bu kwok á̱niet nta̱m á̱ghyang.

⁶Tswam tsuon a̱ta̱mam, a̱ si̱ bu ghwut a̱ si̱ shya̱ á̱ghyang á̱niet ba̱ yong, a̱ si̱ lyip ba, ‘Yihwa mbyia̱ nyi ngyong a̱ji ma̱ tai, nyi kwa mam nang nyi nyia̱ ta̱m bah?’

⁷“Ba̱ si̱ nwuak gu shim nyia̱, ‘Zi̱ shya̱ a̱tyu a̱ na kyiak zi̱t ta̱m a̱ni bah.’ “A̱tyu byia̱ a̱byin a̱na̱p wu si̱ nyia̱ ma̱ng a̱mba, ‘Ndei, nyin meang, nyi nat nyi nyia̱ ta̱m ma̱ a̱byin a̱na̱p nung ka.’

⁸“Nang jenshyung nnyia̱ a̱ni, a̱tyu a̱byin wu si̱ yorong a̱kwak a̱son á̱niet nta̱m wu, a̱ si̱ nyia̱, ‘Yei á̱niet nta̱m ba, ba̱ bai a teang ba kurum nta̱m mba hu; kyiak da̱ á̱niet ngaan ba si̱ nat da̱ á̱niet ba̱ yet a̱son ka a̱ni.’

⁹Á̱niet ba̱ ta̱bat ta̱m hu tswam tsuon a̱ta̱mam ka a̱ni, konyan si̱ shya̱ kurum kwa mam hwa cha̱chaat.

¹⁰Jen nang á̱niet ba á̱ ku tsa kyiak ba ta̱m hu mbai san kurum ta̱m mba hu a̱ni, ba̱ si̱ fa nyia̱, ku myim si̱ mba kurum hu ku swak si̱ á̱kum á̱niet nta̱m hu. A̱wot mba meang, ba̱ si̱ shya̱ mi̱ kurum kwa mam hwa.

¹¹“Nang ba̱ nsan kurum mba hu a̱ni, ba̱ si̱ nwuo kwop a̱dyii̱ng ma̱ng a̱tyu byia̱ a̱byin wu.

¹²Ba̱ si̱ nyia̱, ‘Á̱niet a kyiak ba ta̱m hu nngaan a̱ni, ba̱ nyia̱ mi̱ ta̱m awa a̱nyiung hwa. A̱wot a si̱ tan ba cha̱chaat ma̱ng a̱nzi̱t! Nzi̱t, zi̱ wa swuo a̱bung ma̱ng ta̱m neet a̱tsotson á̱ ba̱ nkai a̱jenjai mam wu a̱ni!’

¹³“A̱ si̱ nwuak a̱tyo nyiung ma̱ a̱mba shim nyia̱, ‘A̱kpa̱ndang nung, n shyok nyin bah! N gyei zi̱ ba̱ nyia̱ za ji á̱ sak di̱ kurum ta̱m kwa mam hwaa?

¹⁴San kurum ang hu a nkat. Da̱ a̱vwuo nung, n di ku myim n tan a̱tyu n kyiak nngaan a̱ni cha̱chaat ma̱ng a̱nwan a yet a̱son ka a̱ni.[152]

¹⁵“ ‘N byia̱ a̱wat n nyia̱ kyang n chat a̱ni ma̱ng kurum nung hu baa? Ke a fa̱k swam hwa di̱ shok nang n nyia̱ á̱kum á̱niet ka ndyo a̱ni?’

¹⁶“Ma a̱nia wa ku ndi; á̱niet ba̱ nngaan ma̱nini a̱ni, bibya na yet a̱son ka di̱n jen chobai ji. A̱wot á̱niet ba̱ yet a̱son ka[153] ma̱nini a̱ni, bibya na nngaan di̱n jen chobai ji.”

¹⁷Nang Yesu ndoot naat Urusha̱lima a̱ni, a̱ si̱ khwop mman ta̱m nggu na swak ma̱ a̱feang da̱ gbang a̱nyiung, a̱ si̱ nyia̱ ma̱ng a̱mba,

¹⁸“Nyi myiai a̱fufwuo, nyi fa̱k la! Zi̱ naat Urusha̱lima hwa hu. A̱ja wa á̱ na mbwuk ma̱ng Nggwon A̱tyubishyi, á̱ tyia̱ nka mbwak a̱cha̱chet a̱yaapris ma̱ng á̱niet tyiet doka A̱yahudawa. A̱wot ba̱ na faat ka shi̱ri̱ya a̱khwu.

¹⁹A̱jawa ba̱ bu na ntyia̱ nka mbwak A̱romawa[154], da̱nian ba̱ ka mai nkaa, ba̱ mang nka a̱lyem, ba̱ tsot ka ma̱ng a̱ya̱u a̱ byia̱ pyipyia̱ ntswam a̱ni, a̱wot á̱ kpang ka da̱ a̱team a̱khwu. A̱wot a̱tuk mam tat ka, á̱ na ta̱ngam kaa ma̱ng swuan ma̱ á̱niet ba̱ ka̱n kwi a̱ni!”

²⁰A̱wot a̱yang Yakubu ma̱ng Yoona ba̱ yet mman Za̱ba̱di a̱ni, si̱ neet á̱ bai da̱ a̱vwuo Yesu ma̱ng á̱fai nggu ba a̱feang. A̱ si̱ ta̱bwak a̱zaghyi Yesu, a̱ si̱ naai nggu, gu nyia̱ nggu shok.

²¹Yesu si̱ lyip gu, nyia̱ “Yihwa nang a chat n nyia̱ ang ndyo?” A̱yang wu si̱ nyia̱, “A̱tyoli, ma̱sa̱kut, n chat a shim á̱fai nung bani a̱feang, ba̱ swan ma̱ a̱cha̱chet chuchuk a̱kyenkyai shi Tyok ang wu; a̱tyo nyiung a swan a̱za yak ang ka, a̱wot a̱tyo nyiung a swan a̱za myian.”

²²Yesu si̱ nwuak mba shim nyia̱, “Nyi lyen kyang nang nyi naai a̱ni bah! Ka̱ doot nyi swuo ma̱ kashyi wu nang n na swuo a̱ni a?” Ba̱ si̱ nyia̱ ma̱ng a̱nggu, “Ii, zi̱ maai zi̱ swuo!”

²³Yesu si̱ tak ma̱ng a̱mba nyia̱, “Nyi maai nyi swuo ma̱ a̱kashyi swuo a̱bung nung wu za̱m. A̱mgba̱m ma̱ng a̱nia, nung gwa mbyia̱ a̱wat khai a̱tyu a̱ na swan a̱za yak ku a̱za myian nung ka a̱ni bah! Chuchuk tyok á̱ja, yet si̱ á̱niet nang A̱tyia̱ nung wu ka̱n jhyi a̱ sak mba ndyo wa a̱ni.”

²⁴Nang á̱kum mman ta̱m swak ka nfa̱k kyang nang Yakubu ma̱ng Yoona lyip a̱ni, ba̱ si̱ fa̱k a̱lyia̱ ya ma̱ng a̱mba.

²⁵Mat a̱nia, Yesu si̱ yorong a̱mgba̱m mman ta̱m na ndung, a̱ si̱ nyia̱ ma̱ng a̱mba, “Nyi lyen nang á̱gwam nnwap na̱ chi A̱gwaza a̱ni ni̱ nnyep á̱niet mba ba. A̱wot a̱cha̱chet á̱ghyang á̱niet meang si̱ shei á̱niet ba̱ khwi mba a̱ni, nang ba̱ ndan mba ma̱ng tyok.

²⁶“A̱wot mami nyin ku na vwuon. Da̱ a̱kwonu a̱kya, konyan wa chat a̱ yet a̱kwak a̱son ma̱ nyin, ku yet ta hwa gu yet a̱khwo nyin.

²⁷A̱wot konyan wa chat a̱ yet a̱son ma̱ nyin, ku yet ta hwa gu yet a̱khwo nyin.

²⁸Mat, ku Nggwon A̱tyubishyi ka ku bai á̱ nyia̱ nka khwo hwa bah. A̱wot ka̱ ku bai ka̱ ka nyia̱ á̱ghyang á̱niet bya khwo hu, ka̱ bu nwuak swuan nka ji, ji̱ yet zang da̱nian ka̱ ka nsan á̱niet ma̱ a̱di̱di̱t.”

²⁹Nang Yesu ma̱ng mman ta̱m nggu na nghwon Yeriko a̱ni, á̱kpa á̱niet ma̱ a̱di̱di̱t si̱ khwi nggu lilyim.

³⁰Á̱niet a̱fi̱fan a̱feang ku swan da̱ a̱beam vak ka nang gu kai a̱ni. Nang ba̱ nfa̱k Yesu wa sweap a̱ni, ba̱ si̱ ta̱ngam nwunwuat mba hu mi̱ chet nyia̱, “A̱tyoli, Nggwon Da̱wuda, fa̱k kunak zi̱t!”

³¹Á̱kpa á̱niet ka si̱ kam ba nyia̱, “Nyi tyia̱ nywang!” A̱mgba̱m ma̱ng a̱nia, ba̱ si̱ mbeang ta̱ngam nwunwuat mba hu nyia̱, “A̱tyoli, Nggwon Da̱wuda, fa̱k kunak zi̱t!”

³²Nang Yesu nfa̱k ba a̱ni, a̱ si̱ yong, a̱ si̱ yorong mbaa, ba̱ bai. A̱ si̱ lyip ba nyia̱, “Yihwa nyi chat n nyia̱ nyin ndyo?”

³³Ba̱ si̱ nyia̱, “A̱tyoli, zi̱ chat zi̱ shya̱ nwuan a̱vwuo!”

³⁴Yesu si̱ fa̱k kunak ba, a̱wot a̱ si̱ byiam á̱ghyi mba ba. Mi̱ di̱ yong a̱hwa, ba̱ si̱ kin nwuo nwuan a̱vwuo kiki! A̱jawa ba̱ si̱ khwi Yesu.