Read tyap Matyu 22 Bible Online

Matyu 22 - tyap bible

Matyu 22

¹Yesu si̱ bu lyiat ma̱ng a̱mba di kidee nyia̱,

²“Á̱ na tyan Tyok Ma A̱gwaza tswazwa hu ma̱ng nkhang a̱gwam a̱ghyang, a̱ chat nyia̱ a̱fai nggu a̱gba̱ndang song nyeang a̱ni.

³Jen nang á̱ nda̱p kuzang kyang á̱ sak a̱ni, a̱ si̱ ta̱m á̱khwo nggu ba, ba̱ si̱ yei á̱niet ba, á̱ shei mba nyeang hu a̱ni. A̱wot a̱mgba̱m á̱niet ba si̱ lak bai hu!

⁴“A̱ si̱ bu ta̱m á̱khwo á̱ghyang nyia̱, ‘Nyi tak ma̱ng á̱niet ba á̱ shei ba nyeang hu a̱ni. Song nyeang ji tyia̱, á̱ wa ka̱n fa̱k a̱cha̱chet a̱yaami̱jimi, ma̱ng a̱yaayang nyák ba̱ byia̱ nvam a̱ni. A̱wot á̱ si̱ jhyi kuzang kyang á̱ tyak. Nyi bai song nyeang ji!’

⁵“A̱wot á̱nietchen ba nang a̱gwam wu yei a̱ni, si̱ lak bai nyeang hu. A̱wot konyan si̱ nkat vak gu! A̱ghyang a̱niet si̱ nkat khap, a̱ghyang a̱niet si̱ nkat a̱bwuang.

⁶Á̱ghyang á̱niet nang á̱ shei mba nyeang hu a̱ni, si̱ ya̱baat a̱yaata̱m ba. Ba̱ si̱ nyia̱ mba lihyat, a̱wot ba̱ si̱ hyaai mba.

⁷“A̱gwam wu si̱ fa̱k a̱lyia̱ ya ba̱t. A̱ si̱ ta̱m á̱niet nzwang nggu ba, ba̱ nat ba̱ hyaai á̱niet ba̱ hyaai á̱khwo nggu ba a̱ni. A̱wot ba̱ fwui a̱keang mba ka.

⁸A̱gwam wu si̱ nyia̱ ma̱ng á̱khwo nggu ba, ‘Á̱ jhyi nkyayak song nyeang na á̱ tyak. A̱wot á̱nietchen ba nang á̱ shei mba nyeang hu a̱ni, ba̱ ntai ba̱ bai nyeang hu bah.

⁹Ma̱ninika, nyi kai a̱yaaga̱sat nvak ba. Konyan wa nang nyi shya̱, nyi tak ma̱ng a̱nggu gu bai song nyeang ji.’

¹⁰“Mat a̱nia, á̱khwo a̱bya si̱ kai nvak na ba̱ si̱ tung á̱niet nang ba̱ shya̱ a̱ni, a̱tan ma̱ng á̱ka̱tuk. A̱wot gaat song nyeang ji si̱ nhyat ma̱ng á̱nietchen ba.

¹¹“A̱wot nang a̱gwam wu nnwuo mi̱ gaat ji a̱ ka myim ma̱ng á̱nietchen ba a̱ni, a̱ si̱ li a̱ghyang a̱niet ma̱ á̱nietchen ba, nang gu kup a̱toot da̱ a̱ myim á̱ kup mi̱ nyeang hu a̱ni bah.

¹²A̱gwam wu si̱ lyip a̱tyu a̱wa nyia̱, ‘A̱tuba nung, a nyia̱ ni wa a si̱ nwuo a̱ji. Da̱ nwan, a kup a̱toot song nyeang wu bah?’ A̱wot a̱tyu a̱wa si̱ lyin kyang nggu na kaat a̱ni.

¹³A̱jawa a̱gwam wu nnyia̱ ma̱ng á̱khwo nggu ba, ‘Nyi la̱p mbwak nggu na ma̱ng a̱ti̱tak nggu ba. Nyi ta nggu a̱ta̱usa mami ndyin, a̱jawa á̱ na ntwei á̱ nywai a̱nyunyung!’

¹⁴“Mat, á̱ yei á̱niet ma̱ a̱di̱di̱t. A̱wot á̱niet ba á̱ khai a̱ni, ba̱ shi á̱kpa bah.”

¹⁵A̱jawa A̱fa̱risawa ba si̱ tung ndung. Ba̱ si̱ la̱p á̱ sak ba̱ tya̱ra̱m Yesu di̱ kyang gu na hyia̱ a̱ni, ba̱ ka shya̱ kyang nang ba̱ na nta̱bat gu a̱ni.

¹⁶Huhwa ba̱ si̱ ta̱m ma̱ng mman ta̱m mba na ma̱ng sot á̱ghyang á̱niet ba̱ li̱n a̱ma a̱gwam Hiridut a̱ni[162], ba̱ si̱ shya̱ Yesu. Ba̱ si̱ nyia̱ ma̱ng a̱nggu, “A̱tyu tyiet, zi̱ lyen a yet a̱tsotswat a̱yin wa. A tyiet a̱lyiat A̱gwaza na mami a̱chuchuk. A bu byia̱ a̱ka̱ta ma̱ng a̱yin bah. Da̱ nwan, a khai á̱niet da̱ á̱ghyi bah.

¹⁷Mat a̱nia, di̱ li ang hu, tak ma̱ng a̱nzi̱t, á̱ shim nzi̱t ndyo zi̱ tan Kaisar a̱gwam shan A̱romawa wu kurum ga̱ndu nggu hu a, kee zi̱ yok?”

¹⁸A̱wot nang Yesu ndyen mumwang yet a̱yaabang a̱byin mba hu a̱ni, a̱ si̱ nyia̱ ma̱ng a̱mba, “Nyin a̱yaabang a̱byin, yihwa mbyia̱ nyi chat tya̱ra̱m nung?

¹⁹Nyi bai ma̱ng a̱nung kurum hu, n di.” Nang ba̱ mbai ma̱ng a̱nggu tswa kurum A̱romawa ji a̱ni,

²⁰a̱ si̱ lyip ba nyia̱, “Ghwughwu huni ma̱ng a̱lyoot kani tazwa kurum hu, yet si̱ a̱nyan hwa?”

²¹Huhwa ba̱ si̱ nwuak gu shim nyia̱, “Si̱ Kaisar, a̱gwam shan A̱romawa hwa!” Yesu si̱ nyia̱ ma̱ng a̱mba, “Ka̱ a̱nia wa, kyang ku yet si̱ Kaisar a̱ni, nyi ni̱ nwuak Kaisar. A̱wot kyang ku yet si̱ A̱gwaza a̱ni, nyi ni̱ nwuak A̱gwaza!”

²²A̱wot ba̱ si̱ tyia̱ ma̱ tai, di̱ si̱sak nang Yesu nnwuak ba shim hu a̱ni. Ba̱ si̱ ghwon gu, ba̱ si̱ nkat.

²³Ma̱ a̱tuk a̱kya, sot A̱sa̱ndukiyawa[163] jhyang ba̱ yet a̱yaakwak a̱son á̱niet khwi doka A̱yahudawa a̱ni, si̱ bai da̱ a̱vwuo Yesu. Sot A̱sa̱ndukiyawa jini tyiet nyia̱ á̱niet ba̱ ka̱n kwi a̱ni, da̱ ba̱ na doot ma̱ng swuan bah. A̱wot ba̱ si̱ lyip Yesu nyia̱,

²⁴“A̱tyu tyiet, Musa ku lyuut doka nyia̱, ka̱ a̱tyok khwu nang gu byia̱ nggwon bah, ku yet ta hwa, a̱na̱nyiuk nggu wu a̱ chi̱t a̱byii̱k wu, a̱ ka mbyin nggwon a̱ ghwon zwa.[164]

²⁵To, ka̱nang á̱ byia̱ á̱na̱nyiuk a̱natat, a̱niet khwop wu si̱ bwuo a̱byii̱k, a̱ si̱ khwu nang gu byia̱ nggwon bah. Mat a̱nia, a̱shushyuo wu si̱ chi̱t a̱byii̱k wu.

²⁶A̱wot a̱shushyuo wu si̱ bu khwu. A̱tyu a̱ ntung da̱ nggu a̱ni, si̱ bu chi̱t a̱byii̱k wu. Ma a̱nia wa ku si̱ ndi ma̱ng a̱mgba̱m á̱na̱nyiuk a̱natat ba.

²⁷“Di̱ ngaan hu, a̱byii̱k wu meang si̱ ma nkhwu.

²⁸Ma̱ninika, tak ma̱ng a̱nzi̱t, a̱byii̱k a̱nyan wa gu na yet di̱ doot á̱niet ba̱ ka̱n kwi a̱ni? Mat, a̱mgba̱m ba a̱natat a̱kya swan nyeang ma̱ng a̱byii̱k wu.”

²⁹Yesu si̱ nwuak ba shim nyia̱, “Lyip huni tak nang nyi ka̱n ghyuap wa. Mat nyi ka̱n dyen A̱lyiat A̱gwaza na ma̱ng chet nggu hu bah.

³⁰Mat jen nang á̱niet ba̱ ka̱n kwi na ndoot ma̱ng swuan a̱ni, ba̱ na nyia̱ a̱ka̱nyeang bah. Da̱ mba, ba̱ na tyei a̱ka̱nyeang bah. Da̱ a̱kwonu a̱kya, ba̱ na li nang a̱yaata̱m tswá Ma A̱gwaza tswazwa a̱ni.

³¹“A̱wot da̱ a̱lyiat doot á̱niet ba̱ ka̱n kwi a̱ni, nyi ka̱n fang tazwa na ma̱ A̱lyiat A̱gwaza na baa? A̱gwaza hyia̱ tazwa a̱yaatyia̱ a̱khwop ba̱ ka̱n kwi a̱ni nyia̱,

³²‘Nung gwa ngyet A̱gwaza Ibrahim, A̱gwaza Ishaku, ma̱ng A̱gwaza Yakubu’[165] A̱gwaza yet á̱si̱ á̱niet ba̱ ka̱n kwi wa a̱ni bah. A̱ yet á̱si̱ á̱niet ba̱ ni̱ nswuan wa a̱ni.”

³³Nang á̱kpa á̱niet ka nfa̱k a̱lyiat Yesu na a̱ni, ba̱ si̱ fa̱k a̱ga̱de mat tyiet nggu hu.

³⁴Nang A̱fa̱risawa ba nfa̱k Yesu mmat A̱sa̱ndukiyawa ba ma̱ng a̱lyiat a̱ni, ba̱ si̱ bu tung á̱pyia̱ mba, á̱ bu lyi̱ri̱m guu.

³⁵A̱tyo nyiung mami mba, a̱ ku yet a̱gwak lyen doka wa, a̱ si̱ kwan a̱ tya̱ra̱m Yesu ma̱ng lyip huni, nyia̱,

³⁶“A̱tyu tyiet, mami doka Musa ji, zang doka ja swak á̱kum ka ma̱ng shi hu?”

³⁷Yesu si̱ nwuak gu shim nyia̱, “ ‘Ku yet ta hwa a chat A̱gwaza, a̱ yet A̱tyoli ang wu a̱ni, ma̱ng a̱mgba̱m fwuo ang hu, ma̱ng a̱mgba̱m swuan ang ji, ma̱ng a̱mgba̱m lyen ang hu.’[166]

³⁸“Doka jini ja yet a̱son ka, ji̱ si̱ bu swak á̱kum ka ma̱ng shi hu.

³⁹A̱wot doka ji ji̱ nkhwi a̱ tai nji a̱ni, jija yet: ‘A bu chat a̱kpa̱ndang swat ang wu, ma̱nang a nchat a̱pyia̱ ang a̱ni.’[167]

⁴⁰“A̱mgba̱m á̱kum doká ka ma̱ng tyiet a̱yaata̱m a̱kwonu A̱gwaza hu, ta̱yuk di̱ doká jini ja sweang.”

⁴¹Nang A̱fa̱risawa ba ntung á̱ keang Yesu a̱ni, nggu meang a̱ si̱ lyip ba, nyia̱,

⁴²“Yihwa yet a̱di̱dam nyin wu tazwa Kristi, a̱tyu nang A̱gwaza kup gu tyok a̱ni? A̱ka̱mbwon a̱nyan kya nang gu yet?” Ba̱ si̱ nwuak gu shim nyia̱, “A̱ neet mi̱ kwai a̱gwam Da̱wuda ja.”

⁴³Yesu si̱ nyia̱ ma̱ng a̱mba, “Yihwa mbyia̱ nang Da̱wuda, mami chet A̱za̱za̱rak Ntswa hu ndyiat, a̱ si̱ ngyei Kristi wu, ‘A̱tyoli nung’? Mat a̱gwam Da̱wuda ku lyuut nyia̱,

⁴⁴‘A̱gwaza nyia̱ ma̱ng Kristi, a̱tyoli nung wu: “A̱tyoli, swan a̱ji a̱zayak nung, si̱ nang n tyia̱ á̱niet lak li ang ba a̱tafa á̱tai a̱ti̱tak ang mba.” ’[168]

⁴⁵“Ki̱ a̱gwam Da̱wuda yei Kristi wu, ‘A̱tyoli nung,’ á̱ na nyia̱ ni wa Kristi wu a̱ bu ngyet a̱ka̱mbwon nggu kya?”

⁴⁶Á̱ si̱ bu byia̱ a̱tyu a̱ si̱ mi̱n nwuak gu shim a̱ni bah. A̱wot nang si̱ a̱hwa nswak a̱ni, á̱ si̱ bu mbyia̱ a̱tyu a̱ gbang a̱lyia̱, a̱ si̱ tya̱ra̱m nggu di̱ lyip gu kyang a̱ni bah.