Read tyap Matyu 25 Bible Online

Matyu 25 - tyap bible

Matyu 25

¹“A̱wot á̱ na tyan Tyok Ma A̱gwaza tswazwa hu ma̱ng kidee a̱ka̱neam swak na̱ yet a̱kpa̱ndang mi̱ nyeang a̱ni. Ba̱ ku kyiak fí̱tila mba ji, ba̱ si̱ nat ba̱ myim ma̱ng a̱tyu byia̱ nyeang a̱ni.

²To, mami a̱ka̱neam a̱nia, a̱fwuon ma̱ mba ku yet á̱bwuon bya, a̱wot a̱fwuon si̱ byia̱ mumwang.

³Á̱bwuon a̱ka̱neam ba ku kyiak fí̱tila mba ji. A̱wot ba̱ si̱ mbeang hya̱u ghyáng ma̱ zan bah.

⁴A̱ka̱neam na na̱ byia̱ mumwang hu a̱ni, si̱ jhyi fí̱tila mba ji. A̱wot ba̱ si̱ ba̱ng hya̱u ghyáng ma̱ zan.

⁵A̱tyu byia̱ nyeang wu ku bai a̱nggang bah. Mat a̱nia, a̱mgba̱m a̱ka̱neam na si̱ ta̱bat nyiin nda, a̱wot ba̱ si̱ kai nda.

⁶“Ma̱ a̱ka̱wa̱tyia̱ a̱tyetuk, á̱ si̱ kan fa̱k nang á̱ yei mi̱ chet nyia̱, ‘Di, a̱tyu byia̱ nyeang wuwa wa wu chobai! Nyi ghwut, nyi san guu!’

⁷A̱mgba̱m a̱ka̱neam a̱nia si̱ doot, ba̱ si̱ jhyi fí̱tila mba ji.

⁸Huhwa á̱bwuon a̱ka̱neam ba si̱ nyia̱ ma̱ng á̱si̱ mumwang ba, ‘Nyi ta̱kpang zi̱t hya̱u nyin hu la! Mat fí̱tila nzi̱t ji nyi̱ri̱p ma̱ninika.’

⁹“A̱wot a̱ka̱neam na̱ byia̱ mumwang hu a̱ni si̱ nyia̱ ma̱ng á̱bwuon ba, ‘Kaai, hya̱u nzi̱t hu na maai nzi̱t a̱mgba̱m ma̱ng a̱nyin bah. Si̱ nyi nat da̱ a̱vwuo á̱niet lyiai hya̱u ba, nyi san si̱ nyin.’

¹⁰“A̱wot nang á̱bwuon a̱ka̱neam ba nshya̱ di̱ naat san hya̱u hu a̱ni, a̱tyu byia̱ nyeang wu si̱ bai. A̱ka̱neam byia̱ mumwang na na̱ shya̱ di̱ swan fwuong hu a̱ni, si̱ ghwut, ba̱ si̱ san gu. A̱wot ba̱ si̱ nwuo ndung ma̱ng a̱nggu da̱ a̱vwuo song nyeang ka, á̱ si̱ nyim nyinyiit hu.[184]

¹¹Á̱ si̱ labeang bah, á̱bwuon a̱ka̱neam ba si̱ bwuok san hya̱u hu. Ba̱ si̱ yong a̱ta̱usa a̱li song nyeang ka, á̱ yei nyia̱, ‘A̱tyoli! A̱tyoli! Khwuk nzi̱t nyinyiit hu la!’

¹²“A̱wot a̱tyu byia̱ nyeang wu si̱ nyia̱ ma̱ng a̱mba, N tak nyin a̱tsak a̱lyiat, n mbyia̱ a̱ka̱ta ma̱ng a̱nyin bah![185]

¹³“Mat a̱nia, nyin á̱niet ba nyi fwuong kidee jini a̱ni meang, ku yet ta hwa nyi swan cham ma̱ng la̱p vam! Mat nyi lyen jen ku mam hu nang Nggwon A̱tyubishyi na mbwuok a̱ bai a̱ni bah.

¹⁴“Á̱ bu na tyan Tyok Ma A̱gwaza tswazwa hu ma̱ng kidee a̱tyu a̱ naat chyet, a̱ si̱ labeang a̱ni. A̱ si̱ yei á̱khwo nggu ba dundung. A̱ si̱ tyia̱ mba kurum nggu hu mbwak, ba̱ ka mbwuang nggu ndyo. A̱ si̱ nkat.

¹⁵A̱ si̱ nwuak a̱tyo nyiung gumaat kurum tsuon. A̱ si̱ nwuak a̱tyo nyiung gumaat kurum sweang. A̱wot a̱tat wu, a̱ si̱ nwuak gu gumaat kurum jhyung. A̱ si̱ ka̱u mba kurum hu, konyan ma̱ cha̱chaat ma̱ng chet gu. A̱wot a̱ si̱ nkat chyet hu.

¹⁶“A̱khwo wu a̱ ku san gumaat kurum tsuon ji a̱ni, a̱ si̱ nwuo a̱bwuang ma̱ng kurum hu. A̱ si̱ shya̱ kpangti̱n gumaat kurum tsuon jhyáng tazwa.

¹⁷Ma a̱nia wa a̱khwo a̱ ku san gumaat kurum sweang ji a̱ni. A̱ si̱ ma nshya̱ kpangti̱n gumaat kurum sweang jhyáng tazwa.

¹⁸A̱wot a̱khwo wu a̱ san gumaat kurum jhyung ji a̱ni, a̱ si̱ nat a̱ si̱ lung a̱byin, a̱ si̱ nniat kurum a̱tyoli nggu hu.

¹⁹“Á̱ si̱ kyiak a̱junjung jen ba̱t, a̱tyoli á̱khwo a̱bya si̱ bwuok. A̱wot a̱ si̱ yei mbaa konyan a̱ tak si̱sak gu mbwuang ma̱ng kurum nang gu jong mba a̱ni.

²⁰A̱khwo a̱ ku san gumaat kurum tsuon ji a̱ni, a̱ si̱ bai ma̱ng kpangti̱n gumaat kurum tsuon jhyáng tazwa. A̱ si̱ nyia̱, ‘A̱tyoli, a ku jong nung gumaat kurum tsuon ja. Di, n shya̱ kpangti̱n gumaat kurum tsuon jhyáng tazwa!’

²¹“A̱tyoli wu si̱ nyia̱ ma̱ng a̱nggu, ‘A yet a̱tan ma̱ng a̱tsotswat a̱khwo, a nyia̱ shansham! A nyia̱ tsotswat di̱ nkyang ma̱ chunchwiit. Mat a̱nia, n na ntyia̱ ang nkyang ma̱ a̱di̱di̱t mbwak. Bai, a gwai dundung ma̱ng a̱nung!’

²²“Ma a̱nia wa, a̱khwo wu a̱ san gumaat kurum sweang ji a̱ni, a̱ si̱ ma mbai. A̱ si̱ nyia̱, ‘A̱tyoli, a ku jong nung gumaat kurum sweang ja, n si̱ mbwuang. Di, n shya̱ kpangti̱n gumaat kurum sweang jhyáng tazwa!’

²³“A̱tyoli nggu wu si̱ nyia̱ ma̱ng a̱nggu, ‘A yet a̱tan ma̱ng a̱tsotswat a̱khwo wa, a nyia̱ shansham. A nyia̱ tsotswat di̱ nkyang ma̱ chunchwiit. Mat a̱nia, n na ntyia̱ ang nkyang ma̱ a̱di̱di̱t mbwak. Bai, a gwai dundung ma̱ng a̱nung!’

²⁴“A̱jawa a̱khwo a̱ ku san gumaat kurum jhyung ji a̱ni, a̱ si̱ bai, a̱ si̱ nyia̱, ‘A̱tyoli, n dyen a yet a̱tyu shim kyang wa. A ni̱ chak yak da̱ a̱vwuo nang a nchyui a̱ni bah. Ma a̱nia wa, a bu ni̱ tung yak da̱ a̱vwuo da̱nang nwan wa chyok a̱ni bah.

²⁵Huhwa mbyia̱, n ku nfa̱k a̱wun nang kurum ang hu na mbwuk a̱ni. Mat a̱nia, n si̱ nat n si̱si̱ ndung a̱byin, n si̱ nniat hu. Di, ngga gumaat kurum ang ji! N bu byia̱ a̱ka̱ta ma̱ng a̱nhu bah.’

²⁶“A̱tyoli wu si̱ nyia̱ ma̱ng a̱nggu, ‘A yet a̱ka̱tuk a̱khwo, a̱wot a si̱ yet a̱tyu a̱li̱t! A lyen nang n ni̱ nchak yak da̱ a̱vwuo nang n chyui a̱ni bah. Ma a̱nia wa, a lyen nang n bu ni̱ ntung da̱ a̱vwuo nang n chyok a̱ni bah.

²⁷Ka̱ a̱nia wa, yihwa mbyia̱ a ndak tyia̱ kurum nung hu mbwak á̱niet a̱bwuang? Shimba, ki̱ n bwuok, n san kurum nung hu ma̱ng kpangti̱n tazwa!’

²⁸“Mat a̱nia, A̱tyoli wu si̱ kam á̱ghyang á̱niet nyia̱, ‘Nyi ta̱wap gumaat kurum ji mbwak nggu ka, nyi nwuak a̱khwo a̱ byia̱ gumaat kurum swak ji a̱ni.

²⁹Mat, á̱niet ba̱ ba̱ng nkyang nang á̱ jong ba shansham a̱ni, á̱ na mbeang mba ndyo. A̱wot á̱ na mbeang mba ndyo gba̱mgbam! Da̱ a̱kwonu a̱kya, á̱niet ba̱ ba̱ng nkyang nang á̱ jong ba shansham a̱ni bah, ku a̱bankyang nang ba̱ byia̱ a̱ni, á̱ na ta̱wap ka, á̱ ghwon baa.

³⁰“ ‘Ma̱ninika, nyi kyiak a̱buk a̱khwo wuni, nyi ta nggu a̱ta̱usa mami a̱gbi̱ri̱ng ndyin. A̱ja wa á̱ na ntwei á̱ nywai a̱nyunyung!’

³¹“Jen nang Nggwon A̱tyubishyi[186] na mbwuok a̱ bai ma̱ng a̱kyenkyai shi nka wu ndung ma̱ng a̱mgba̱m a̱yaata̱m tswá nggu ba a̱ni, a̱ na swan da̱ a̱gba̱ndang chuk tyok nggu ji, ji̱ byia̱ shi a̱ni.

³²A̱mgba̱m nnwap mi̱ bibyin swanta na, á̱ na tung na a̱zaghyi nggu. A̱wot Nggwon A̱tyubishyi na khap á̱niet ba kankang, ma̱nang a̱tyu chok ni̱ nkhap zón seap ma̱ng zón á̱ta̱m kankang a̱ni.

³³A̱ na tyia̱ zón seap ji a̱zayak nggu ka. A̱wot a̱ tyia̱ zón á̱ta̱m ji a̱zamyian.[187]

³⁴“A̱wot nung, ngyet A̱gwam wu a̱ni, n na nyia̱ ma̱ng á̱niet a̱zayak na nyia̱, ‘Nyi bai, nyin á̱niet nang A̱tyia̱ nung wu tyia̱ mba a̱li̱ba̱rka a̱ni, nyi san gado tyok hu nang A̱gwaza mi̱ njhyi a̱ sak nyin ndyo, neet di̱ mat swanta hu a̱ni.

³⁵Mat di̱n jen ji ji̱ swak a̱ni, ki̱ n fwuong zong, nyi ni̱ nang nung kyayak. Ki̱ n fwuong mashyi, nyi ni̱ nang nung a̱sa̱khwot. Ki̱ n bai a̱chi̱chen, nyi ni̱ san nung mbwak nfeang ma̱ a̱ka̱sa nyin na.

³⁶Ki̱ n chong ka̱gbang, nyi ni̱ nang nung a̱toot, n kup. Ki̱ n nyia̱ ma̱ng zwan, nyi ni̱ chok nung. Ki̱ n shya̱ di̱ nyim mi̱ jaru, nyi ni̱ bai byiat nung.’

³⁷“A̱jawa á̱tsotswat á̱niet ba na nwuak gu shim nyia̱, ‘A̱tyoli, zang jen ja zi̱ ku ndi zong ya ang, zi̱ si̱ nang ang kyayak hu? Ku nang a fwuong mashyi, zi̱ si̱ nang ang a̱sa̱khwot swuo?

³⁸Zang jen ja zi̱ ku ndi ang a yet á̱nietchen wu, zi̱ si̱ san ang ma̱ a̱ka̱sa nzi̱t na? Ku nang a chong ka̱gbang, zi̱ si̱ nang ang a̱toot kup wu?

³⁹Zang jen ja zi̱ ku ndi ang nang a nyia̱ ma̱ng zwan ji, a si̱ bu shya̱ di̱ nyim hu, zi̱ si̱ byiat ang?’

⁴⁰“A̱wot nung A̱gwam wu, n na nwuak mba shim nyia̱, ‘N tak nyin a̱tsak a̱lyiat, jen nang nyi ku mbeang a̱tyu a̱ swak ma̱ng yet a̱da̱dei hu ma̱ á̱na̱nyiuk nung mba a̱ni, nung gwa nyi ku beang.’[188]

⁴¹“A̱wot nung, A̱gwam wu a̱tuk a̱kya, n na mbwuak n nyia̱ ma̱ng á̱niet ba ba̱ shya̱ a̱zamyian nung ka a̱ni, ‘Nyi tyong nyi ghwon nung, nyin á̱niet nang á̱ shyi a̱ni. Nyi nwuo ma̱ a̱nga̱ngak ndong sang sangba̱p hu, nang á̱ jhyi á̱ sak A̱ta̱nyeang ka ndyo ma̱ng á̱ka̱tuk a̱yaata̱m tswá nggu ba a̱ni.

⁴²Mat di̱n jen ji ji̱ swak a̱ni, ka̱ n fwuong zong, nyi si̱ lak nang nung kyayak. Ki̱ n fwuong mashyi, nyi ni̱ lak nang nung a̱sa̱khwot swuo.

⁴³Ki̱ n bai a̱chi̱chen, nyi ni̱ lak san nung ma̱ a̱ka̱sa nyin na. Ki̱ n chong ka̱gbang, nyi ni̱ lak nang nung a̱toot, n kup. Ki̱ n nyia̱ ma̱ng zwan, á̱ si̱ bu nyim nung mi̱ jaru, nyi ni̱ lak bai byiat nung hu.’

⁴⁴“A̱wot mba meang, ba̱ na nwuak gu shim nyia̱, ‘A̱tyoli, zang jen ja zi̱ ku ndi ang a fwuong zong ku mashyi, ku nang a bai a̱chi̱chen, ku nang a chong ka̱gbang, ku nang a nyia̱ mi̱ zwan, ku nang a shya̱ di̱ nyim mi̱ jaru ji, a̱wot zi̱ si̱ lak beang ang hu?’

⁴⁵“A̱jawa nung, A̱gwam wu na nwuak ba shim nyia̱, ‘N tak nyin a̱tsak a̱lyiat, mi̱ jen ji̱ swak a̱ni, nang nyi ku ndak beang a̱tyo nyiung a̱ swak ma̱ng yet a̱da̱dei hu ma̱ á̱na̱nyiuk nung ba a̱ni, nung gwa nang nyi ku lak beang hu.’

⁴⁶“A̱jawa á̱ na khap á̱ka̱tuk á̱niet a̱bya, á̱ tyia̱ mba swuo a̱bung sang sangba̱p. A̱wot á̱tsotswat á̱niet ba na shya̱ swuan sang sangba̱p.”