Read tyap Matyu 28 Bible Online

Matyu 28 - tyap bible

Matyu 28

¹Nang a̱tuk Mam Fwung A̱yahudawa ka nswak a̱ni, ma̱ a̱tsotson a̱tson a̱tuk Ladi ka, Ma̱ryamu Ma̱ga̱daliya, ma̱ng Ma̱ryamu a̱nyiung wu, ba̱ si̱ nat da̱ a̱vwuo a̱bi ka nang á̱ lung da̱ a̱fang ka a̱ni.

²Mi̱ di̱ yong a̱hwa, a̱bi ka si̱ kin tyi̱ri̱m ba̱t! Ma̱nang a̱ta̱m tswa A̱gwaza a̱ghyang ku nchyok a̱ neet Ma A̱gwaza tswazwa, a̱ si̱ bai a̱ si̱ yuut a̱gba̱ndang a̱fang nang á̱ nkup a̱bi ka a̱ni, a̱ sak da̱ a̱gbang a̱nyiung, a̱ si̱ nswan tazwa.

³A̱ghyi a̱ta̱m tswa ba si̱ ya a̱ghyi mya̱myat a̱myat nang a̱mya̱ra̱m nza a̱ni! A̱yaatoot nggu ba si̱ sai ma̱ kyenkyai a̱nkyai nang a̱lulo a̱ni!

⁴Nang á̱niet nzwang ba̱ cham a̱bi ka ndi gu a̱ni, ba̱ si̱ tyi̱ri̱m vam mat a̱wun, a̱wot ba̱ si̱ chak a̱kwi.

⁵A̱jawa a̱ta̱m tswa A̱gwaza wu si̱ nyia̱ ma̱ng á̱nyiuk ba, “Nyi yok fa̱k a̱wun bah! Mat n dyen nyi chat Yesu wa, nang á̱ ku kpang da̱ a̱team a̱khwu wu a̱ni.

⁶A̱ shya̱ a̱ji bah! A̱ wa ka̱n shyip a̱ si̱ doot ma̱ á̱niet ba̱ ka̱n kwi a̱ni, cha̱chaat ma̱nang gu ku nhyia̱ a̱ni. Nyi bai nyi li a̱vwuo ka nang á̱ ku mmyiai kwom nggu hu a̱ni!

⁷Nyi nat a̱nggang, nyi si̱ tak ma̱ng mman ta̱m nggu na nyia̱, ‘Yesu doot ma̱ng swuan ma̱ á̱niet ba̱ ka̱n kwi a̱ni! Nyi fa̱k la, a̱ kyiak a̱son nyin a̱ naat mi̱ fam a̱byin Ga̱lili, a̱ja wa nyi na ndi guu!’ “Nyi jhyung ta̱m ji nang n ku nta̱m nyin a̱ni!”

⁸Á̱nyiuk a̱bya si̱ ghwon a̱bi ka ma a̱nggang di̱n chung. Ba̱ si̱ fa̱k a̱wun ba̱t. A̱mgba̱m ma̱ng a̱nia, ba̱ si̱ shya̱ ma̱ng fwuo sai gba̱mgbam. A̱wot ba̱ si̱ nkat di̱n chung, á̱ nat ba̱ ka tak ma̱ng á̱kum mman ta̱m Yesu na ta̱m a̱ta̱m tswa A̱gwaza ji.

⁹Ma̱nang but á̱ghyi a̱ni, Yesu si̱ myim ma̱ng a̱mba, a̱ si̱ nyia̱, “N byiat nyin!” A̱wot á̱nyiuk a̱bya si̱ tyia̱ chung á̱ nat a̱ si̱ shya̱ nggu. Ba̱ si̱ vwuk gu da̱ a̱ti̱tak, ba̱ si̱ kyuak gu ntong.

¹⁰A̱jawa Yesu si̱ nyia̱ ma̱ng a̱mba, “Nyi yok fa̱k a̱wun bah! Nyi nat nyi si̱ tak mman nta̱m nung na[205] ba̱ nat Ga̱lili, a̱ja wa ba̱ na ndi nung.”

¹¹Nang á̱nyiuk a̱bya nshya̱ ma̱ a̱chyet ka a̱ni, á̱niet nzwang á̱ghyang ma̱ á̱niet cham a̱bi Yesu ba, si̱ nat Urusha̱lima. Ba̱ si̱si̱ tak a̱cha̱chet a̱yaapris ba kyang hu ku bai a̱ni.

¹²Nang a̱cha̱chet a̱yaapris ma̱ng á̱niet khwop á̱niet A̱yahudawa ba ntung a̱ni, ba̱ si̱ la̱p a̱nu, ba̱ si̱ nwuak á̱niet nzwang a̱bya kurum gba̱mgbam da̱ bang, ba̱ ka niat a̱chuchuk wu.

¹³Ba̱ si̱ hyia̱ ma̱ng á̱niet nzwang ba, nyia̱, “Ku yet ta hwa, nyi tak á̱niet ba nyia̱, ‘Mman ta̱m Yesu nia ku bai a̱tyetuk, á̱ ba̱ nyiin kwom nggu hu á̱ nkat ndyo, nang zi̱ shya̱ mi̱ nda.’

¹⁴Ki̱ gwomna Bilatut fa̱k á̱lyiat nani, zi̱ na yong zi̱ wa̱i nggu a̱lyiat na, kalak nyi du swuo a̱bung.”

¹⁵Á̱niet nzwang a̱bya si̱ san kurum hu, ba̱ si̱si̱ nyia̱ ma̱nang á̱ ntak ba a̱ni. A̱wot á̱ ni̱ bwoi nkhang nani á̱ kat a̱byin A̱yahudawa ka ba̱ng ba̱ tat a̱fwun.

¹⁶Mman ta̱m Yesu na swak ma̱ a̱nyiung si̱ nat mi̱ fam a̱byin Ga̱lili, da̱ a̱fan ka nang Yesu ku mi̱ ntak ma̱ng a̱mba ba̱ nnat a̱ni.

¹⁷Nang ba̱ ndi Yesu a̱ni, ba̱ si̱ kyuak gu ntong. A̱wot á̱ghyang ma̱ mba si̱ nwuak a̱chuchuk da̱ nggu bah!

¹⁸Yesu si̱ bai, a̱ si̱ tyia̱ mman ta̱m nggu na ta̱m nyia̱, “Á̱ nwuak nung a̱mgba̱m Tyok Ma A̱gwaza tswazwa ma̱ng swanta.

¹⁹Mat a̱nia, nyi nat nyi si̱ tyia̱ a̱mgba̱m á̱niet kuzang nwap mi̱ swanta hu ba̱ yet mman ta̱m ba̱ khwi nung. Nyi nyia̱ mba ba̱ptisman mami a̱lyoot A̱tyia̱, ma̱ng Nggwon, ma̱ng A̱za̱za̱rak Ntswa wu.

²⁰Nyi bu tyiet mman ta̱m á̱fai na na̱ bu khwi a̱mgba̱m tyiet nang n tak nyin a̱ni. A̱wot nyi nwuak a̱chuchuk, n ni̱ shya̱ ndung ma̱ng a̱nyin kuzang jen, si̱ nat a̱mgba̱m che wu!”