Read tyap Matyu 6 Bible Online

Matyu 6 - tyap bible

Matyu 6

¹“Nyi ta̱bam! Nyi yok nyia̱ a̱tan nta̱m kpa̱sai a̱zaghyi á̱niet, mat ba̱ ka chyin nyin bah. Kalak nyi na lyin zang da̱ a̱vwuo A̱tyia̱ nyin wu a̱ shya̱ tswazwa ka a̱ni.

²Mat a̱nia, ka̱ nyi na beang á̱kunak ma̱ng kurum, nyi yok nyia̱ ma̱nang á̱bubuk á̱niet ni̱ nyia̱ a̱ni bah. Ba̱ ni̱ tyiap gugwa ma̱ á̱tutu a̱tung A̱yahudawa ba ma̱ng nvak na, á̱niet ba̱ ka li a̱tan nta̱m mba wu kpa̱sai, á̱ chyin baa! N tak nyin a̱tsak a̱lyiat, ba̱ wa ka̱n san a̱mgba̱m zang mba ji.

³A̱wot ka̱ nyi na beang á̱kunak ma̱ng kurum, nyi yok shim á̱niet ba̱ lyen kyang nang nyi nyia̱ a̱ni bah.[43]

⁴Nyi nang za̱nang nyin ji nyonywang. A̱wot A̱tyia̱ nyin wu, a̱ nwuan kuzang kyang nang nyi nyia̱ di̱ niat a̱ni, a̱ na tan nyin zang.

⁵“A̱wot ka̱ nyi na naai A̱gwaza, nyi yok naai nggu nang á̱bubuk á̱niet ni̱ nnaai a̱ni bah. Mat ba̱ ni̱ chat ba̱ doot á̱ yong ka̱tsak ma̱ng gba̱p a̱pyia̱ ma̱ á̱tutu a̱tung A̱yahudawa ba, ma̱ng a̱yaaga̱sat nvak ba̱ naai A̱gwaza kpa̱sai, da̱nian á̱niet ba̱ ka li ba̱ chyin baa. N tak nyin a̱tsak a̱lyiat, ba̱ wa ka̱n san zang mba ji.

⁶Da̱ a̱kwonu a̱kya, nwan, ka̱ a na naai A̱gwaza, a nwuo ma̱ swang nyuo ma̱nyin ang. A nyim nyinyiit hu, a sii naai A̱gwaza a̱ yet a̱tyia̱ ang wu a̱ni a̱ja. A̱wot A̱gwaza a̱ yet a̱tyia̱ ang wu, a̱ nwuan kuzang kyang ku shya̱ di̱ niat a̱ni, a̱ na nwuak ang zang.

⁷“Jen nang nyi ni̱ nshya̱ di̱ naai A̱gwaza wu a̱ni, nyi yok lyiat tangka̱i a̱jojoot a̱tai a̱lyiat di̱ kyang nyiung, nang nnwap na̱ chyi A̱gwaza nnyia̱ a̱ni bah. Ba̱ fa mat tangka̱i a̱jojoot naai mba wu wa a̱yaagwaza mba ba na nfa̱k naai mba hu.

⁸Nyi yok naai A̱gwaza tangka̱i naai á̱niet a̱hwa bah. Mat A̱gwaza a̱ yet a̱tyia̱ nyin wu a̱ni, wa ka̱n dyen kyang hu nyi chat a̱ni, neet nang nyi ka̱n dyip gu bah!

⁹A̱ni wa nang nyi na nnaai A̱gwaza wu nchi̱ri̱ng; ‘A̱tyia̱ nzi̱t wu a̱ shya̱ tswazwa ka a̱ni, á̱ ja̱u a̱lyoot ang ka.

¹⁰Tyok ang hu ku bai. Á̱ nyia̱ kyang hu a chat a̱ni mi̱ swanta hu, ma̱nang á̱ nyia̱ nhu tswazwa ka a̱ni.

¹¹Nang zi̱t kyayak kwa mam.

¹²Chi a̱ka̱tuk nyia̱ wu nang zi̱ nyia̱ ang ndyo a̱ni, ma̱nang zi̱ nchi a̱bun nang á̱ghyang á̱niet bwoi nzi̱t ndyo a̱ni.

¹³Yok ghwon zi̱t zi̱ kwa di̱n jen mak bah. Da̱ a̱kwonu a̱kya, ti̱n zi̱t ma̱ a̱ka̱tuk wu wa[44]. [[Mat tyok, chet, ma̱ng kyenkyai shi, yet si̱ nwan hwa, si̱ nat sang sangba̱p. Samba̱rka!]][45]’

¹⁴“Ka̱ nyi chi a̱ka̱tuk nyia̱ nang á̱ghyang á̱niet nyia̱ nyin dyo a̱ni, ma a̱nia wa A̱tyia̱ nyin wu a̱ shya̱ tswazwa ka a̱ni, na nchi a̱ka̱tuk nyia̱ nyin wu.

¹⁵A̱wot ka̱ nyi lak chi a̱ka̱tuk nyia̱ nang á̱ghyang á̱niet nyia̱ nyin ndyo a̱ni, ma a̱nia wa A̱tyia̱ nyin wu a̱ shya̱ tswazwa ka a̱ni, na ndak chi a̱ka̱tuk nyia̱ nyin wu.

¹⁶“A̱wot jen nyi nswan a̱fa a̱khwot di̱ naai A̱gwaza a̱ni, nyi yok vwun á̱ghyi nang á̱bubuk á̱niet nnyia̱ a̱ni bah. Mat ba̱ ni̱ byian á̱ghyi, ba̱ tak kpa̱sai nang ba̱ naai A̱gwaza a̱fa a̱khwot, da̱nian á̱niet ba̱ ka li, ba̱ chyin baa. N tak nyin a̱tsak a̱lyiat, zang ji ba̱ na san a̱ni, jija a̱ja.

¹⁷A̱wot nyin, jen nyi na nnaai A̱gwaza a̱fa a̱khwot a̱ni, nyi kwi á̱ghyi nyin ba, nyi kwon hya̱u, a̱wot nyi zap pyia̱ nyin hu.

¹⁸Ka̱ nyi nyia̱ a̱nia, a̱yin si̱ mi̱n dyen nang nyi nswan a̱fa a̱khwot di̱ naai A̱gwaza bah, si̱ ma̱ A̱tyia̱ nyin wu wa, a̱ lyen kuzang kyang nang nyi nyia̱ di̱ niat a̱ni. A̱wot A̱tyia̱ nyin wu a̱ nwuan kuzang kyang di̱ niat a̱ni, nggu wa na nwuak nyin zang ji.[46]

¹⁹“Nyi yok tung á̱pyia̱ nyin zwá mi̱ swanta huni, a̱vwuo nang zwú na ngya nji, ku ji̱ kwa̱i ji̱ byian, a̱wot á̱tang ba̱ nwuo ba̱ nyiin nji a̱ni bah.

²⁰Da̱ a̱kwonu a̱kya, nyi tung á̱pyia̱ nyin zwá ji Ma A̱gwaza tswazwa kya, a̱vwuo da̱nang zwú na ngya zwá ji, ku ji̱ kwa̱i ji̱ byian, a̱wot á̱tang ba̱ nwuo ba̱ nyiin ji a̱ni bah.

²¹Mat a̱vwuo ka nang nyi ntung zwá nyin ji a̱ni, a̱ja wa nang a̱di̱dam nfwuo nyin wu nshya̱.

²²“Tswa a̱li ang ji yet fi̱tila ji̱ tyei sai mi̱ vam ang hu a̱ni. Ki̱ tswa a̱li ang ji byia̱ shok ka̱u nkyang,[47] a̱mgba̱m vam ang hu na sai ma̱ kyenkyai.

²³A̱wot ka̱ tswa a̱li ang ji byia̱ shi̱shi̱p,[48] a̱mgba̱m vam ang hu na yet lyin hwa. A̱wot ki̱ sai hu nang a fa a byia̱ a̱ni yet lyin hwa za̱m, zang tangka̱i a̱gba̱ndang dyin hwa a̱hwa!

²⁴“Á̱ mbyia̱ a̱tyu a̱ na nyia̱ khwo a̱yaatyoli a̱feang a̱ni bah. Ku a̱ lak a̱tyo nyiung, a̱wot gu chat a̱tyo nyiung wu. Ma a̱nia wa, a̱ na nwuak a̱tyo nyiung wu shi, a̱wot a̱ jhyuai a̱tyo nyiung wu. Ma a̱nia wa, nyi si̱ mi̱n nyia̱ A̱gwaza khwo ntsa bu nnyia̱ khwo kurum bah.

²⁵“Huhwa mbyia̱ n shei ma̱ng a̱nyin. Nyi yok nyia̱ a̱fi̱fa kuzang a̱tuk tazwa swuan nyin ji bah. A̱wot nyi bu yok nyia̱ a̱fi̱fa ke nyi byia̱ kyayak nang nyi na ya ma̱ng kyang nyi na swuo a̱ni bah, ku a̱yaatoot nang nyi na kup, ba̱ maai nyin a̱ni bah. Nyi lyen nang swuan nyin ji ndan kyayak, a̱wot nvam nyin na si̱ lan a̱yaatoot baa?

²⁶Nyi nwuan a̱ka̱man na, nyi lii. Na̱ ni̱ chyui yak bah. Da̱ na, na̱ ni̱ chak yak bah. Ku na̱ tung yak á̱ tyei ma̱ a̱yaagban bah. A̱mgba̱m ma̱ng a̱nia, A̱tyia̱ nyin wu a̱ shya̱ tswazwa ka a̱ni, nggu wa ni̱ nwuat na nkyayak na. A̱wot nyin, nyi swak a̱ka̱man na ma̱ng yet ma̱ za̱nzan baa?

²⁷A̱nyan wa ma̱ nyin mat a̱fi̱fa nggu wu maai a̱ mbeang a̱banjen ma̱ chunchwiit mi̱ swuan nggu ji?

²⁸“Yihwa mbyia̱ nang nyi nyia̱ a̱fi̱fa da̱ a̱yaatoot? Nyi nwuan nkywat a̱ka̱kwon na mi̱ kyai a̱yit hu, nyi li si̱sak ji nang na̱ ndaai a̱ni. Na̱ nyia̱ ta̱m bah. Da̱ na, na̱ nok á̱pyia̱ na a̱yaatoot bah.

²⁹A̱mgba̱m ma̱ng a̱nia, A̱gwam Solomon ma̱ng a̱gba̱ndang a̱kyenkyai shi nggu wu, ku khwi a̱yaatoot ba̱ yet a̱sham nang nkywat a̱ka̱kwon nani a̱ni bah.

³⁰Ka̱ A̱gwaza tyei nkywat a̱ka̱kwon mi̱ nkyai a̱yit shisham, na̱ nshya̱ a̱fwun, a̱wot a̱tson á̱ wu tyia̱ na mi̱ ndong a̱ni, ku myim nyi lyen nang gu na nnwuak nyin a̱yaatoot za̱m. Yihwa mbyia̱ nang nyi nnwuak fwuo ma̱ a̱da̱dei da̱ A̱gwaza?

³¹“Mat a̱nia, nyi yok nyia̱ a̱fi̱fa bah, ku nyi lyi̱ri̱m á̱pyia̱ nyin nyia̱, ‘Yihwa zi̱ na ya? Yihwa zi̱ na swuo? Yihwa zi̱ na kup?’

³²Da̱nian nkyang nani nia nang nnwap na̱ chyi A̱gwaza a̱ni ni̱ dam mi̱ nfwuo mba na ba̱ na shya̱. A̱wot A̱tyia̱ nyin wu a̱ shya̱ tswazwa ka a̱ni, lyen chi̱k nang nyi nchat nkyang nani a̱mgba̱m na.

³³“A̱wot nyin, nyi ya ntsa kup á̱ghyi di̱ chat Tyok A̱gwaza hu ma̱ng tsotswat nggu hu. Nggu meang, a̱ na mbeang nyin a̱mgba̱m á̱kum nkyang ka nang nyi chat a̱ni.

³⁴“Mat a̱nia, nyi yok nyia̱ a̱fi̱fa da̱nian a̱tson bah. Mat a̱tson ka wu bai ma̱ng a̱fi̱fa nka. Swuo a̱bung a̱fwun hu maai a̱fwun ka.”