Read tyap Ma̱rkut 1 Bible Online

Ma̱rkut 1 - tyap bible

Ma̱rkut 1

¹A̱tyin A̱sham Nkhang kikya ka, tazwa Yesu Kristi[1] [[Nggwon A̱gwaza.]][2]

²Ma̱nang Ishaya a̱ta̱m a̱kwonu A̱gwaza wu ku ndyuut gbangbang a̱ni nyia̱, “A̱gwaza nyia̱, ‘Di, n na ta̱m ma̱ng a̱ta̱m nung a̱ khwat a̱son ang! Nggu wa na jhyi ang vak hu.[3]

³A̱nwuat gu kikya yei mi̱ tswa a̱yit nyia̱, “Nyi jhyi vak nang A̱tyoli wu bye nkai a̱ni! Nyi but vak hu nang gu bye nchong a̱ni, ku nat cha̱chaat!”[4]’ ”

⁴A̱nia wa Yoona a̱tyu nyia̱ ba̱ptisman si̱ bai, a̱ si̱ chong mi̱ ntswa a̱yit a̱ shei A̱lyiat A̱gwaza na. A̱ si̱ nyia̱ á̱niet ba̱ptisman ku tak ba̱ ghwon a̱ka̱tuk ba̱ nwuo khwi A̱gwaza a̱ni, da̱nian A̱gwaza a̱ ka chi a̱ka̱tuk nyia̱ mba wu.

⁵Á̱niet ma̱ a̱di̱di̱t mi̱ fam a̱byin Yahudiya ma̱ng a̱keang Urusha̱lima, ba̱ si̱ chong da̱ a̱vwuo Yoona, á̱ tyai a̱ka̱tuk nyia̱ mba wu, nang gu nyia̱ mba ba̱ptisman ma̱ a̱ghyui Urdun.

⁶Yoona A̱tyu nyia̱ ba̱ptisman ku khwi a̱pyia̱ gu ma̱ng a̱toot nang á̱ twai ma̱ng chat a̱lakumi a̱ni. A̱ si̱ la̱p kwa ndyang[5]. A̱wot nkyayak nggu na si̱ yet á̱ga̱u bya ma̱ng tong a̱yit.

⁷A̱ si̱ shei A̱lyiat A̱gwaza na nyia̱, “A̱yin chobai a̱ khwi nung lilyim, a̱ lan nung ma̱ng chet. Nung, n maai mi̱ maai n ta̱bwak n byii̱k ywan á̱kwatak gu hu bah.

⁸Nung, n nyia̱ nyin ba̱ptisman ji ma̱ng a̱sa̱khwot nia. A̱wot nggu, a̱ na nyia̱ nyin dyo ma̱ng A̱za̱za̱rak Ntswa wa.”

⁹Di̱n jen a̱ja Yesu ku neet ma̱ a̱keang Na̱za̱ra̱t ka̱ shya̱ mi̱ fam a̱byin Ga̱lili ka a̱ni. Yoona si̱ nyia̱ nggu ba̱ptisman ji mi̱ a̱ghyui Urdun.

¹⁰Nang Yesu nshya̱ di̱ ghwut ma̱ a̱sa̱khwot na a̱ni, a̱ si̱ kin di kyai tswazwa hu khwuk, nang A̱za̱za̱rak Ntswa wu chorop a̱ chobai da̱ nggu nang a̱bwa a̱ni!

¹¹A̱nwuat si̱ kin ghwut neet Ma A̱gwaza tswazwa nyia̱, “Nwan wa yet Nggwon nung ka nang n chat n bu mba̱ng fwuo a̱ni. N fa̱k a̱lyia̱ sai da̱ nwan za̱m!”[6]

¹²Ma̱nang but á̱ghyi a̱ni, A̱za̱za̱rak Ntswa wu si̱ kin tyia̱ Yesu si̱ nat mi̱ tswa a̱yit.

¹³A̱ si̱ swan a̱yit ka a̱ nyia̱ mam swak naai, nang A̱ta̱nyeang ka mai nggu; nang nggu shya̱ dundung ma̱ng nyam a̱yit. A̱wot a̱yaata̱m tswá A̱gwaza ba si̱ shya̱ dundung ma̱ng a̱nggu á̱ beang guu.

¹⁴Di̱n jen a̱ja, nang á̱ ka̱n nyim Yoona a̱tyu nyia̱ Ba̱ptisman mi̱ jaru, Yesu si̱ nat fam a̱byin Ga̱lili a̱ shei A̱sham Nkhang A̱gwaza ka.

¹⁵A̱ si̱ nyia̱, “Jen nyia̱! Tyok A̱gwaza hu bai kpa̱mkpaan! Nyi ghwon a̱ka̱tuk nyia̱ nyin wu nyi khwi A̱gwaza, nyi bu nwuak a̱chuchuk da̱ A̱sham Nkhang ka!”[7]

¹⁶Nang Yesu nchong a̱ sweap di̱n khwong a̱gba̱ndang jok Ga̱lili wu a̱ni, a̱ si̱ li Siman ma̱ng a̱na̱nyiuk gu Anda̱rawut nang ba̱ khwot á̱ka̱li ma̱ a̱gba̱ndang jok wu á̱ bwoi fa̱n. Mat ba̱ yet á̱niet bwoi fa̱n bya.

¹⁷Yesu si̱ nyia̱ ma̱ng a̱mba, “Nyi bai nyi khwi nung! N na bwuak nyin nyi yet á̱niet ba̱ na kwak á̱ghyang á̱niet á̱ bai ndyo da̱ a̱vwuo nung, nang á̱niet bwoi fa̱n a̱ni.”

¹⁸Mi̱ di̱ yong a̱hwa, ba̱ si̱ kin ghwon á̱ka̱li mba na, ba̱ si̱ khwi nggu.

¹⁹Yesu si̱ chong a̱ nat a̱zanson da̱dei, a̱ si̱ bu li Yakubu a̱fai Za̱ba̱di ma̱ng a̱na̱nyiuk nggu wu Yoona, nang ba̱ shya̱ mi̱ kukwon a̱wak mba hu, á̱ jhyi á̱ka̱li bwoi fa̱n mba na.

²⁰Mi̱ di̱ yong a̱hwa, Yesu si̱ yorong mba ba̱ bai. Ba̱ si̱ kin ghwon a̱tyia̱ mba wu Za̱ba̱di ma̱ng á̱khwo mba nang ba̱ kyiak mba ta̱m hu a̱ni, ba̱ si̱ khwi guu.

²¹Nang a̱tuk Mam Fwung A̱yahudawa nkaat a̱ bai a̱ni, Yesu ma̱ng á̱niet ba̱ khwi nggu a̱ni si̱ nwuo a̱keang Ka̱fanahum. A̱ si̱ nwuo tutu a̱tung A̱yahudawa hu, a̱ si̱ ta̱bat tyiet á̱niet ba.

²²Á̱niet ba si̱ fa̱k a̱ga̱de ma̱ng kyang nang gu tyiet a̱ni! Mat a̱ tyiet baa nang a̱tyu tyiet a̱ byia̱ tyok a̱ni, a̱ swak á̱niet tyiet doka ba.[8]

²³Mi̱ di̱ yong a̱hwa, mi̱ tutu a̱tung hu, a̱tyok a̱ghyang a̱ byia̱ a̱ka̱tuk ntswa a̱ni si̱ kin tyia̱ ku nnyia̱,

²⁴“Yesu a̱tyu Na̱za̱ra̱t, yihwa mbyia̱ a nda̱u nzi̱t a̱nia? A bai a tyak ma̱ng a̱nzi̱t waa?! N dyen a̱tyu nang a yet a̱ni; a yet A̱za̱za̱rak Nggwon A̱gwaza wa!”

²⁵Yesu si̱ kam a̱ka̱tuk ntswa wu, nyia̱, “Tyia̱ nywang a̱ja! Ghwut ma̱ a̱tyu a̱wa!”

²⁶A̱ka̱tuk ntswa wu si̱ jhyip a̱tyu a̱wa a̱ mat a̱byin. A̱ si̱ tyia̱ kun mi̱ chet, a̱ si̱ ghwut ma̱ nggu!

²⁷A̱mgba̱m á̱niet ba si̱ fa̱k a̱ga̱de, ba̱ si̱ nwuo lyi̱ri̱m á̱ghyang mba nyia̱, “Kwot! Yihwa lili huni? Kyang fai hwa nang gu tyiet ma̱ng tyok! A̱ mun a̱ tyei á̱ka̱tuk ntswá ba̱ fwuong guu, a̱ bu nwuat gu shi!”

²⁸Nkhang Yesu na si̱ kai koji ma a̱nggang mi̱ fam a̱byin Ga̱lili hu.

²⁹Mi̱ di̱ ghwut mba hu mi̱ tutu a̱tung A̱yahudawa hu, ba̱ si̱ nat a̱mali Siman ma̱ng Anda̱rawut, nang Yakubu ma̱ng Yoona shya̱ ndung ma̱ng a̱mba.

³⁰A̱kwang Siman wu ku shya̱ di̱ myian nang a̱sok a̱za doot guu. A̱wot á̱ si̱ hyia̱ ma̱ng Yesu.

³¹Yesu si̱ nat da̱ a̱vwuo myian nggu ka. A̱ si̱ ta̱bat gu di̱ mbwak a̱ si̱ ta̱ngam gu. A̱kwang wu si̱ choot, a̱wot a̱ si̱ doot, a̱ si̱ wan ba kyayak.

³²Jenshyung a̱kya nang mam hu ka̱n kwa, ba̱ si̱ bai ma̱ng Yesu á̱niet nzwán ma̱ a̱di̱di̱t ma̱ng á̱si̱ ba ba̱ byia̱ á̱ka̱tuk ntswá a̱ni.

³³Á̱niet ma̱ a̱di̱di̱t a̱di̱t ma̱ a̱keang ka si̱ tung a̱zanunwuai a̱li ka.

³⁴Yesu si̱ choot á̱niet ma̱ a̱di̱di̱t ba̱ byia̱ kuzang tangka̱i nzwan a̱ni. A̱ si̱ khai á̱ka̱tuk ntswá ba̱ si̱ ghwut ma̱ á̱niet ma̱ a̱di̱di̱t. Da̱ nggu, a̱ ghwon á̱ka̱tuk ntswá ba ba̱ hyia̱ kyang bah, mat ba̱ ku lyen a̱tyu gu yet a̱ni.

³⁵Ma̱ a̱tsotson a̱tson a̱tuk mam feang ka, neet nang a̱vwuo ka ni̱ li duduu, Yesu si̱ shyip, a̱ si̱ ghwut, a̱ si̱ nat a̱ma̱nta a̱keang ka, da̱ a̱vwuo nang a̱yin nshya̱ a̱ni bah. A̱ si̱si̱ naai A̱gwaza a̱ja.

³⁶Huhwa Siman ma̱ng á̱kpa̱ndang nggu ba, si̱ ghwut ba̱ si̱ nat chat gu.

³⁷Nang ba̱ nshya̱ nggu a̱ni, ba̱ si̱ nyia̱ ma̱ng a̱nggu, “Á̱niet ma̱ a̱di̱di̱t shya̱ di̱ chat ang!”

³⁸Huhwa Yesu si̱ nwuak ba shim nyia̱, “Ku yet nzi̱t ta hwa zi̱ nat ma̱ a̱ka̱keang á̱ghyang na̱ shya̱ kpa̱mkpaan a̱ni, da̱nian n ka shei a̱lyiat A̱gwaza na a̱ja mameang. Kyang ku mbyia̱ nang n bai mi̱ swanta hu a̱ni, huhwa a̱hwa.”

³⁹Yesu si̱ chong a̱ kai a̱byin Ga̱lili, a̱ si̱ shei A̱sham nkhang A̱gwaza ka ma̱ á̱tutu a̱tung A̱yahudawa ba. A̱ si̱ khai á̱ka̱tuk ntswá ba̱ ghwut ma̱ á̱niet ma̱ a̱di̱di̱t.[9]

⁴⁰A̱tyu gbap si̱ bai da̱ a̱vwuo Yesu, [[a̱ si̱ kpaat a̱khwukhwut]][10], a̱ si̱ naai nggu, gu beang nggu nyia̱, “Ka a shim, a byia̱ chet a choot nung, n tyia̱ za̱za̱rak.”

⁴¹Huhwa Yesu si̱ fa̱k kunak gu ba̱t, a̱ si̱ neap bwak a̱ si̱ mbyiam guu. A̱ si̱ nyia̱ ma̱ng nggu, “N shim, da̱ choot!”

⁴²Ma̱nang but á̱ghyi a̱ni, a̱tyu gbap wu si̱ kin choot, a̱ si̱ tyia̱ za̱za̱rak!

⁴³A̱jawa Yesu si̱ byiat gu saak, a̱ si̱ gba nggu nyia̱,

⁴⁴“Nwan ta̱bam, yok hyia̱ ma̱ng a̱yin si̱sak ji á̱ nchoot ang a̱ni bah. A̱wot nat a tyai a̱pyia̱ ang kpa̱sai da̱ a̱vwuo pris. A bu neap za̱nang ji nang Musa ku ndyuut mi̱ doka A̱gwaza ji á̱ neap da̱nian kwi nzwán a̱ni.[11] Nyia̱ si̱ a̱hwa, da̱nian á̱niet ba ba̱ ka li chi̱k nang a nchoot a si̱ tyia̱ za̱za̱rak.”

⁴⁵A̱mgba̱m ma̱ng a̱nia, a̱tyu gbap wu si̱ ghwut a̱ si̱ ta̱bat shei nkhang ma̱ sa̱t, a̱ kwok si̱sak nang á̱ nchoot gu a̱ni. Nkhang na si̱ kai kuzang a̱vwuo, ku si̱ tyia̱ Yesu si̱ bu maai a̱ nwuo ma̱ a̱keang kpa̱sai bah. A̱ si̱ ghwut, a̱ si̱ swuat nta da̱ a̱vwuo da̱nang á̱niet nshya̱ a̱ni bah. Ma̱ng a̱nia, á̱niet ba si̱ ka ghwut da̱ a̱ka̱vwuo ma̱ a̱di̱di̱t á̱ chong á̱ ba̱ shyat guu.