Read tyap Ma̱rkut 12 Bible Online

Ma̱rkut 12 - tyap bible

Ma̱rkut 12

¹Yesu si̱ kin nwuo tyiet a̱cha̱chet a̱yaakwak a̱son ba di̱ kidee nyia̱, “A̱tyok a̱ghyang wa kap a̱byin a̱na̱p. A̱ si̱ nok bat a̱ nkeang kaa. A̱ si̱ lung jhyat da̱ a̱fang nang gu na nshyui a̱sa̱khwot a̱na̱p na a̱ni. A̱wot a̱ si̱ nok a̱ga̱nga̱ng a̱dak nang á̱ na nswan á̱ cham a̱byin ka a̱ni. A̱ si̱ khwap á̱niet khap á̱ghyang a̱byin ka. A̱wot a̱ si̱ nkat a̱keang a̱ghyang.

²“Nang seam mbai, jen kpa̱i sum a̱na̱p ji si̱ nnyia̱ a̱ni, a̱ si̱ ta̱m ma̱ng a̱khwo nggu da̱ a̱vwuo á̱niet khap nang gu khwap ba a̱byin ka a̱ni; ba̱ ka̱u a̱sa̱khwot a̱na̱p na, ba̱ nwuak gu a̱kwonu ngguu.

³A̱wot á̱niet khap ba si̱ ta̱bat a̱khwo wu, ba̱ si̱ tsot gu. Ba̱ si̱ vwuong gu á̱ bwuok ndyo mbwak nkhwot.

⁴A̱tyu byia̱ a̱byin wu si̱ bu ta̱m ma̱ng a̱khwo a̱ghyang. Nggu meang, ba̱ si̱ tsot gu a̱pyia̱. Ba̱ si̱ nyia̱ nggu lihyat.

⁵A̱tyu byia̱ a̱byin wu si̱ bu ta̱m ma̱ng a̱khwo a̱ghyang. Á̱niet khap ba si̱ hyat gu. Ma a̱nia wa á̱niet khap ba si̱ nyia̱ ma̱ng á̱khwo ma̱ a̱di̱di̱t; ba̱ si̱ tsot á̱ghyang, ba̱ si̱ bu hyaai á̱ghyang.

⁶A̱mgba̱m ma̱ng a̱nia, a̱tyu byia̱ a̱byin wu byia̱ nggwon nang gu nsak fwuo a̱ni, a̱ si̱ ta̱m nka a̱ngaan ma̱ng a̱di̱dam nyia̱, ‘Ba̱ na nwuak nggwon nung ka shi!’

⁷“A̱wot nang á̱niet khap ba ndi nggwon ka ka̱ chobai a̱ni, ba̱ si̱ la̱p a̱nu nyia̱, ‘Di nggwon ka̱ na ya gado a̱byin hu a̱ni kikya chobai! Nyi bai zi̱ hyat ka, a̱wot gado hu ku yet si̱ nzi̱t!’

⁸A̱jawa ba̱ si̱ ta̱bat nggwon ka ba̱ si̱ hyat. Ba̱ si̱ ji̱p kwom hu a̱ma̱nta a̱byin ka.

⁹“Yihwa nang nyi dam a̱tyu byia̱ a̱byin a̱wa na nyia̱? A̱ bye bai a̱ hyaai á̱niet khap a̱bya, a̱wot a̱ nwuak á̱ghyang á̱niet a̱byin ka.

¹⁰Nyi ka̱n fang ma̱ A̱lyiat A̱gwaza na nang á̱ ndyuut a̱ni baa? Nyia̱, ‘A̱fang ka nang á̱niet nok ba lak a̱ni; kikya nang á̱ kpaat da̱ a̱ta̱m kuntyin nok ka.

¹¹Si̱ huni neet da̱ a̱vwuo A̱gwaza kya. A̱wot ku yet kyang a̱ga̱de hwa ma̱ á̱ghyi nzi̱t.’[84] ”

¹²A̱wot a̱cha̱chet a̱yaakwak a̱son A̱yahudawa ba si̱ chat vak nang ba̱ na nta̱bat Yesu a̱ni. Mat ba̱ ku lyen nang gu ndyiat kidee jini tazwa mba kya. A̱mgba̱m ma̱ng a̱nia, ba̱ si̱ fa̱k a̱wun á̱kpa á̱niet ka. Ba̱ si̱ nkat, ba̱ si̱ ghwon guu.

¹³Huhwa ba̱ si̱ ta̱m A̱fa̱risawa á̱ghyang ma̱ng á̱niet ba̱ shya̱ mi̱ sot a̱gwam Hiridut a̱ni. Da̱nian ba̱ ka tya̱ra̱m Yesu gu hyia̱ kyang nang ba̱ na ba̱ng ba̱ nta̱bat gu a̱ni.

¹⁴Nang ba̱ mbai da̱ a̱vwuo Yesu a̱ni, ba̱ si̱ nyia̱, “A̱tyu tyiet, zi̱ lyen a yet a̱tsotswat a̱yin wa. Da̱ nwan, a bu byia̱ a̱ka̱ta ma̱ng a̱yin bah. Mat a khai a̱yin da̱ á̱ghyi bah. Da̱ a̱kwonu a̱kya, a tyiet vak A̱gwaza hu mami a̱chuchuk. Tak ma̱ng a̱nzi̱t, á̱ shim nzi̱t ndyo zi̱ tan Kaisar a̱gba̱ndang a̱gwam shan A̱romawa kurum ga̱ndu hu a, kee zi̱ yok?”

¹⁵A̱wot nang Yesu ndyen mumwang yet a̱yaabang a̱byin mba hu a̱ni; huhwa gu nyia̱ ma̱ng a̱mba, “Yihwa mbyia̱ nyi nchat nyi tya̱ra̱m nung? Nyi bai ma̱ng a̱nung kurum hu, n di.”

¹⁶Ba̱ si̱ bai ma̱ng a̱nggu ndyo. Yesu si̱ lyip ba nyia̱, “Ghwughwu huni ma̱ng a̱lyoot kani tazwa kurum hu; yet si̱ a̱nyan hwa?” Ba̱ si̱ nyia̱, “Si̱ Kaisar hwa!”

¹⁷Huhwa Yesu si̱ nyia̱ ma̱ng a̱mba, “Ka̱ a̱nia wa, kyang ku yet si̱ Kaisar a̱ni, nyi ni̱ nwuak Kaisar. Kyang ku yet si̱ A̱gwaza a̱ni, nyi nwuak A̱gwaza.” A̱wot ba̱ si̱ tyia̱ ma̱ tai di̱ si̱sak gu nnwuak ba shim hu a̱ni.

¹⁸A̱jawa sot A̱sa̱ndukiyawa jhyang si̱ bai da̱ a̱vwuo Yesu; á̱si̱ ba ba̱ ni̱ tyiet nyia̱, á̱niet ba̱ kwi a̱ni, da̱ ba̱ na doot ma̱ng swuan ma̱ á̱niet ba̱ ka̱n kwi a̱ni bah. Huhwa ba̱ si̱ lyip gu nyia̱,

¹⁹“A̱tyu tyiet, Musa ku lyuut nzi̱t doka nyia̱; ka̱ a̱na̱nyiuk a̱yin khwu a̱ si̱ ghwon a̱byii̱k wu di̱ mi̱n nggwon, ku myim a̱na̱nyiuk a̱tyu a̱ khwu wu gu chi̱t a̱byii̱k a̱wa, ba̱ ka nghwon a̱tyu a̱ khwu wu zwa.

²⁰Di̱n jen jhyang, á̱ ku byia̱ á̱na̱nyiuk a̱natat. A̱niet khwop wu si̱ bwuo a̱byii̱k, a̱ si̱ khwu di̱ mi̱n ghwon zwa.

²¹A̱tyu a̱ tung da̱ a̱nggu a̱ni si̱ chi̱t a̱byii̱k wu. Nggu meang, a̱ si̱ khwu di̱ mi̱n ghwon zwa. Ma a̱nia wa ku si̱ ndi ma̱ng a̱tyu a̱ yet a̱tat wu a̱ni.

²²A̱mgba̱m á̱na̱nyiuk a̱natat a̱bya si̱ kwi di̱ mi̱n ghwon zwa. Di̱ ngaan hu, a̱byii̱k wu meang si̱ khwu.”

²³“Mat a̱nia, a̱tuk doot ma̱ng swuan ma̱ á̱niet ba̱ ka̱n kwi a̱ni; a̱byii̱k a̱nyan wa gu na yet? Mat a̱mgba̱m mba a̱natat a̱kya, a̱byii̱k wu swan nyeang ma̱ng a̱mba.”

²⁴Yesu si̱ nwuak ba shim nyia̱, “Lyip huni tak nang nyi ka̱n ghyuap wa. Nyi ka̱n dyen A̱lyiat A̱gwaza na ma̱ng chet gu hu bah.

²⁵Jen nang á̱niet ba na ndoot ma̱ng swuan ma̱ á̱niet ba̱ ka̱n kwi a̱ni; ba̱ na nyia̱ a̱ka̱nyeang bah. Mi̱ da̱ mba, ba̱ na tyei a̱ka̱nyeang bah. Da̱ a̱kwonu a̱kya, ba̱ na li nang a̱yaata̱m tswá A̱gwaza tswazwa a̱ni.

²⁶“A̱wot da̱ a̱lyiat doot ma̱ng swuan ma̱ á̱niet ba̱ ka̱n kwi a̱ni; nyi ka̱n fang mami A̱lyiat A̱gwaza na nang Musa ku lyuut tazwa nkhang nang sop ji ku ngya long hu mi̱ tswa a̱yit ji a̱ni baa? Di̱ si̱sak ji nang A̱gwaza ku ndyiat ma̱ng Musa a̱yit ka, tazwa a̱yaatyia̱ a̱khwop ba̱ ka̱n kwi a̱ni, nyia̱, ‘Nung gwa ngyet A̱gwaza Ibrahim, A̱gwaza Ishaku, ma̱ng A̱gwaza Yakubu.’

²⁷“A̱gwaza yet á̱si̱ á̱niet kukwi wa bah. A̱ yet á̱si̱ á̱niet nswuan wa. Nyi ghyuap za̱m!”

²⁸A̱tyok a̱ghyang ma̱ á̱niet tyiet doka ba ku shya̱ a̱ja, a̱ si̱ wup a̱ fa̱k nang ba̱ ya fwuang ji. Nang nggu nfa̱k Yesu nnwuak ba shim hu shansham a̱ni, a̱ si̱ lyip gu nyia̱, “Zang doka ja swak á̱kum ka ma̱ng shi hu?”

²⁹Yesu si̱ nwuak gu shim nyia̱, “Doka ji swak á̱kum ka ma̱ng shi a̱mgba̱m a̱ni, ji ja yet; ‘Nyin á̱niet Isi̱rela, nyi myiai a̱fufwuo nyi fa̱a̱k! A̱gwaza a̱ yet A̱tyoli nzi̱t wu a̱ni, a̱ yet A̱gwaza a̱nyiung wa ma̱nyin gu.

³⁰Mat a̱nia, ku yet ta hwa a chat A̱gwaza a̱ yet A̱tyoli ang wu a̱ni ma̱ng a̱mgba̱m fwuo ang hu, ma̱ng a̱mgba̱m swuan ang ji, ma̱ng a̱mgba̱m lyen ang hu, ma̱ng a̱mgba̱m chet ang hu.’[85]

³¹Doka sweang ji, ji̱ swak ma̱ng shi a̱ni, jija yet; ‘A bu chat a̱kpa̱ndang nswat ang wu ma̱nang a nchat a̱pyia̱ ang a̱ni.’[86] Á̱ bu mbyia̱ doka ji ji̱ swak si̱ jini ma̱ng shi a̱ni bah.”

³²A̱jawa a̱tyu tyiet doká wu si̱ nyia̱ ma̱ng Yesu, “A̱tyu tyiet, a̱tsatsak a̱lyiat wa za̱m nang a hyia̱. A̱gwaza wu yet a̱nyiung wa, á̱ bu mbyia̱ a̱ghyang bah; mi̱ nggu wa ma̱nyin gu.

³³A̱wot n dyen ku yet ta hwa n bu nchat gu ma̱ng a̱mgba̱m fwuo nung hu, ma̱ng a̱mgba̱m lyen, ma̱ng a̱mgba̱m chet. A̱wot n bu chat a̱kpa̱ndang nswat nung wu, nang n chat a̱pyia̱ nung a̱ni. Si̱ huni hwa shi a̱ swak za̱nang nang á̱ fwui ma̱ng a̱mgba̱m si̱ ji nang doka ji nyia̱ á̱ nwuat a̱ni.”

³⁴Nang Yesu nfa̱k a̱tyu tyiet doka wu nnwuak shim ma̱ng mumwang a̱ni, a̱ si̱ nyia̱ ma̱ng a̱nggu, “A shya̱ kpa̱mkpaan ma̱ng nwuo Tyok A̱gwaza hu.” Nang si̱ a̱hwa nswak a̱ni, á̱ bu mbyia̱ a̱tyu a̱ gbang a̱lyia̱ a̱ si̱ lyip Yesu kyang a̱ni bah.

³⁵Di̱n jen nang Yesu nshya̱ di̱ tyiet mi̱ didyaat A̱li Nwuat Za̱nang A̱gwaza hu a̱ni; a̱ si̱ lyip á̱niet ba, nyia̱, “Yihwa mbyia̱ nang á̱niet tyiet doka ba nnyia̱ Kristi neet mi̱ kwai Da̱wuda ja?

³⁶Mat Da̱wuda ma̱ a̱pyia̱ nggu, ku lyuut mami chet A̱za̱za̱rak Ntswa hu nyia̱, ‘A̱gwaza nyia̱ ma̱ng Kristi A̱tyoli nung wu, “A̱tyoli, swan a̱ji a̱zayak nung; si̱ nat jen nang n na ntyia̱ á̱niet lak li ang mba a̱tafa á̱tai a̱ti̱tak ang mba a̱ni.” ’

³⁷“Ki̱ Da̱wuda ma̱ a̱pyia̱ nggu ngyei Kristi ‘A̱tyoli’ nggu wu; ku na li ni wa gu bu ngyet a̱ka̱mbwon gu?” A̱gba̱ndang á̱kpa á̱niet si̱ myiai a̱fufwuo á̱ fwuong guu ma̱ng a̱gwai.

³⁸Mami tyiet Yesu hu, a̱ si̱ khwat á̱niet khwi nggu ba a̱fufwuo nyia̱, “Nyi ta̱bam ma̱ng a̱yaagwak tyiet doka ba; á̱niet ba̱ fa̱k di̱ kichong á̱ tam ma̱ng a̱cha̱chet a̱yaatoot. Ba̱ chat á̱ li mba á̱ byiat ba á̱ nwuat ba shi mi̱ tungga.

³⁹A̱wot ba̱ ni̱ chat a̱cha̱chet a̱vwuo nswat mi̱ á̱tutu a̱tung A̱yahudawa, ma̱ng a̱cha̱chet a̱vwuo nswat mi̱ bukí.

⁴⁰“Bibya yet á̱niet ya gado á̱nyiuk nang á̱tyok mba ba ka̱n kwi a̱ni da̱ mi̱n nsum. A̱wot ba̱ ni̱ chat á̱ ka li nang ba̱ ngyet a̱za̱za̱rak á̱niet, ba̱ ni̱ kyiak a̱junjung jen nang ba̱ naai A̱gwaza mami á̱niet. Bibya nang A̱gwaza na nyia̱ mba a̱gba̱ndang shi̱ri̱ya wu!”

⁴¹Nang Yesu nswan kpa̱mkpaan ma̱ng a̱vwuo khwot kurum mi̱ didyaat A̱li Nwuat Za̱nang A̱gwaza hu a̱ni; a̱ si̱ swan a̱ nwuan si̱sak ji nang á̱niet ba nkhwot kurum hu a̱ni. A̱wot á̱niet nzwá ma̱ a̱di̱di̱t si̱ nwuat a̱cha̱chet kurum.

⁴²A̱wot a̱ si̱ bu li a̱byii̱k a̱ghyang a̱ yet a̱kunak nang a̱tyok nggu wu ka̱n khwu a̱ni; nang gu nwuat a̱nini a̱feang.

⁴³Huhwa Yesu si̱ yorong mman ta̱m nggu na, a̱ si̱ nyia̱ ma̱ng a̱mba, “Yok n tak nyin a̱tsak a̱lyiat, a̱byii̱k a̱ yet a̱kunak kani nang a̱tyok wu ka̱n khwu a̱ni; mmat kurum ku swak si̱ á̱kum á̱niet hu a̱ni, da̱ a̱vwuo khwot kurum ka.

⁴⁴Mat a̱mgba̱m á̱niet nzwá ba, ba̱ nwuak za̱nang chunchwiit mami gba̱mgbam zwá nang ba̱ byia̱ a̱ni. A̱wot nggu a̱byii̱k wuni, bi̱ri̱ng ma̱ng kunak nggu hu, a̱ si̱ kyiak a̱mgba̱m a̱byi kurum nang gu byia̱ mi̱ swat gu hu a̱ni, a̱ si̱ nnwuak za̱nang.”