Read tyap Ma̱rkut 15 Bible Online

Ma̱rkut 15 - tyap bible

Ma̱rkut 15

¹A̱wot ma̱ a̱tsotson a̱tson, a̱cha̱chet a̱yaapris, á̱niet khwop á̱niet, á̱niet tyiet doka, ma̱ng a̱mgba̱m á̱kum sot a̱cha̱chet A̱yahudawa ji si̱ nyia̱ a̱gba̱ndang a̱tung, da̱nian ba̱ ka la̱p kyang ba̱ na nyia̱ a̱ni. A̱jawa ba̱ si̱ la̱p Yesu, ba̱ si̱ nat ma̱ng a̱nggu, ba̱ si̱ tyia̱ nggu mbwak Bilatut a̱ yet Gwomna A̱romawa wu a̱ni.

²Gwomna Bilatut si̱ lyip gu nyia̱, “Nwan wa yet a̱gwam A̱yahudawa wu a?” Yesu si̱ nwuak gu shim nyia̱, “A hyia̱ a̱nia ma̱ a̱pyia̱ ang.”

³A̱cha̱chet a̱yaapris ba ku bat gu di̱ bwoi a̱bun ma̱ a̱di̱di̱t.

⁴Huhwa gwomna Bilatut si̱ bu lyip gu nyia̱, “A na kaat kyang baa? Fa̱k si̱sak ji ba̱ mbat ang a̱bun ma̱ a̱di̱di̱t a̱ni.”

⁵A̱mgba̱m ma̱ng a̱nia, Yesu du kaat kyang bah, a̱wot gwomna Bilatut si̱ fa̱k a̱ga̱de.

⁶Kuzang A̱yet Ghwut Mman Isi̱rela mi̱ Khwo, gwomna Bilatut ni̱ ti̱n a̱khwo a̱nyiung a̱ shya̱ mi̱ njaru a̱ni a̱ ghwon, nang á̱niet ba naai gu ti̱n mba ndyo a̱ni.

⁷A̱wot di̱n jen a̱ja a̱tyok a̱ghyang nang á̱ ngyei Ba̱ra̱bat a̱ni, ku nshya̱ di̱ nyim mi̱ njaru ma̱ng á̱ghyang á̱niet ba̱ ku tyia̱ tyok A̱romawa hu zat. Ba̱ si̱ bu hyat a̱yin a̱ni.

⁸Á̱kpa á̱niet ka si̱ nat da̱ a̱vwuo gwomna Bilatut, ba̱ si̱ naai nggu nyia̱ gu ti̱n mba a̱khwo mi̱ jaru a̱ ghwon ma̱nang gu mmeang a̱ni.

⁹A̱wot gwomna Bilatut si̱ lyip ba nyia̱, “Nyi chat n ti̱n nyin A̱gwam A̱yahudawa wu ghwon a?”

¹⁰Gwomna Bilatut hyia̱ a̱nia mat di̱ yong a̱hwa a̱ ku fi̱k nang a̱cha̱chet a̱yaapris ba ku nkwi swam hwa di̱ Yesu; huhwa si̱ mbyia̱ ba̱ si̱ ntyia̱ Yesu mbwak gu.

¹¹A̱wot a̱cha̱chet a̱yaapris ba si̱ fuut á̱niet ba ba̱ tyia̱ gwomna Bilatut, gu ti̱n Ba̱ra̱bat mi̱ jaru a̱ ghwon mba ndyo da̱ a̱kwonu Yesu.

¹²Gwomna Bilatut si̱ bu lyip ba nyia̱, “Yihwa nang nyi chat n nyia̱ ma̱ng a̱tyu nang á̱ ngyei A̱gwam A̱yahudawa wu a̱ni?”

¹³Ba̱ si̱ koot a̱gugong nyia̱, “Á̱ kpang nggu da̱ a̱team a̱khwu!”

¹⁴Gwomna Bilatut si̱ lyip ba nyia̱, “Yihwa mbyia̱? Zang a̱bun wa nang gu bwuo?” Ba̱ si̱ mbeang a̱gugong wu nyia̱, “Á̱ kpang gu da̱ a̱team a̱khwu wu!”

¹⁵Gwomna Bilatut si̱ chat a̱ mwang á̱kpa á̱niet ka ba̱ tyia̱ nywang. A̱ si̱ ti̱n Ba̱ra̱bat mi̱ jaru ji a̱ ghwon. A̱ si̱ tyia̱ Yesu mbwak á̱niet nzwang A̱romawa na, ba̱ tsot gu ma̱ng a̱ya̱u a̱ byia̱ pyipyia̱ ntswam a̱ni; a̱wot ba̱ nat ma̱ng a̱nggu ba̱ kpang gu da̱ a̱team a̱khwu.

¹⁶Á̱niet nzwang ba si̱ nat ma̱ng Yesu mami didyaat gaat a̱li tyok gwomna (nang á̱ ngyei Ba̱ratoriyom a̱ni). Ba̱ si̱ yorong a̱mgba̱m á̱kum á̱niet nzwang ka ba̱ nwuo mi̱ didyaat hu.

¹⁷Ba̱ si̱ kup Yesu a̱shong a̱toot tyok. Ba̱ si̱ kup gu bung tyok nang á̱ tat ma̱ng sa̱kan a̱ni.

¹⁸A̱wot ba̱ si̱ nwuo byiat gu di̱ lihyat nyia̱, “A̱gwam A̱yahudawa, swuan ang ji labeang!”

¹⁹Ba̱ si̱ tsot gu a̱pyia̱ ma̱ng shan. Ba̱ si̱ shum gu a̱ta̱mpyia̱. Ba̱ si̱ kpaat a̱khwukhwut a̱zaghyi nggu di̱ nwuat gu shi si̱ lihyat.

²⁰Nang ba̱ ntyak nyia̱ nggu lihyat hu a̱ni, ba̱ si̱ khwuk gu a̱shong a̱toot tyok wu, ba̱ si̱ bu kup gu a̱yaatoot nggu ba. A̱wot ba̱ si̱ ghwut ma̱ng a̱nggu ta̱usa, á̱ nat ndyo da̱ a̱vwuo á̱ na nkpang nggu da̱ a̱team a̱khwu wu a̱ni.

²¹Nang ba̱ nshya̱ di̱n vak á̱ naat a̱ni, ba̱ si̱ tyia̱ gba̱ng ma̱ng a̱tyok a̱ghyang nang á̱ ngyei Siman a̱ni, a̱ ku yet a̱tyu Si̱ri̱n wa (a̱tyia̱ A̱liza̱nda ma̱ng Rufot); nang gu neet mi̱ a̱bakeang a̱ghyang a̱ nwuai Urusha̱lima. A̱wot ba̱ si̱ nyia̱ nggu khwo gu faat a̱team a̱khwu Yesu wu.

²²Ba̱ si̱ nat ma̱ng Yesu da̱ a̱vwuo a̱ghyang nang á̱ ngyei Goli̱gota a̱ni (Si̱ huni fa “A̱vwuo A̱ghyighyak A̱pyia̱”).

²³A̱wot ba̱ si̱ kwan ba̱ nwuak gu a̱sa̱khwot a̱na̱p nang á̱ kyiai ma̱ng mur, na̱ na ghyuai nggu fa̱k a̱khwu a̱ni. A̱wot a̱ si̱ lak swuo hu.

²⁴Ba̱ si̱ kpang nggu da̱ a̱team a̱khwu wu. A̱wot ba̱ si̱ ka̱u a̱yaatoot nggu ba tsi̱tsak mba. Ba̱ si̱ koot tswak ba̱ ka li a̱toot nang konyan na shya̱ a̱ni.

²⁵Jen ji ba̱ ku nkpang nggu da̱ a̱team wu a̱ni, ku yet tswam a̱kubunyiung ja a̱tsotson.

²⁶Ba̱ si̱ lyuut a̱bun nang ba̱ mbat gu a̱ni ma̱ a̱lo, á̱ lya̱u tazwa a̱pyia̱ nggu ka nyia̱, “DI, A̱GWAM A̱YAHUDAWA WU WA WU!”

²⁷Ba̱ si̱ kpang á̱niet á̱tsaai a̱feang dundung ma̱ng Yesu; a̱tyo nyiung a̱zayak, a̱tyo nyiung a̱za myian nggu ka.

²⁸[[Ku si̱ bai cha̱chaat nang á̱ ndyuut ma̱ A̱lyiat A̱gwaza na a̱ni nyia̱, “Á̱ ku kyiak gu nang a̱tyu bwoi a̱bun a̱ni.”]][96]

²⁹Á̱niet ba̱ ku sweap a̱ni, si̱ mai nggu di̱ lihyat, ba̱ si̱ kang pyipyia̱ mba nyia̱, “Aap! Nwan a̱tyu a̱ nyia̱ a̱ na bi̱ri̱m A̱li Nwuat Za̱nang A̱gwaza ka, a̱ bu nok ka mami mam ntat a̱ni;

³⁰da̱ chyok da̱ a̱team a̱khwu wu bai a̱byin, a san a̱pyia̱ ang zi̱ li la! Á̱ laai ang!”

³¹Ma a̱nia wa, a̱cha̱chet a̱yaapris ba meang, ma̱ng á̱niet tyiet doka ba si̱ nyia̱ nggu lihyat nyia̱, “Hee ang! A ku san á̱ghyang á̱niet. A̱wot a̱ si̱ mi̱n san a̱pyia̱ ang bah!

³²Yok Kristi wuni, A̱gwam Isi̱rela, ma̱ninika gu chyok da̱ a̱team a̱khwu wu; da̱nian zi̱ ka li zi̱ sii nwuak fwuo da̱ a̱nggu!” A̱wot á̱niet nang á̱ kpang mba ndung ma̱ng a̱nggu a̱ni, mba meang, ba̱ si̱ mun á̱ lyiat gu lihyat hu.

³³A̱tyia̱ka̱u a̱ta̱mam, chobai tswam swak mi̱ sweang, a̱mgba̱m a̱byin ka si̱ tyia̱ lyin ma̱ kyi̱ri̱p ba̱ng si̱ nat tswam tsat!

³⁴Nang tswam tsat ji nnyia̱ a̱ni, Yesu si̱ yorong ma̱ng a̱gba̱ndang a̱nwuat nyia̱, “Eloi! Eloi! Lama Sa̱baktani!”[97] Swáng a̱lyiat jini fa, “A̱gwaza nung, A̱gwaza nung, yihwa mbyia̱ a ndak nung ghwon?”

³⁵Á̱ghyang á̱niet ba̱ yong a̱ja a̱ni si̱ fa̱k, ba̱ si̱ nyia̱, “Fa̱k, á ngyei a̱ yei Iliya a̱ta̱m a̱kwonu A̱gwaza wa!”

³⁶A̱tyo nyiung ma̱ mba si̱ tyong chung. A̱ si̱si̱ kyiak soso a̱ si̱ tyia̱ ma̱ a̱sa̱sat a̱sa̱khwot, a̱ si̱ tyia̱ di̱ shan. A̱wot a̱ si̱ neap Yesu a̱ swuo, a̱ si̱ nyia̱, “Yok gu! Yok, zi̱ li ka̱ Iliya a̱ta̱m a̱kwonu A̱gwaza na bai a̱ chyok ma̱ng a̱nggu da̱ a̱team a̱khwu wu!”

³⁷A̱jawa Yesu si̱ tyia̱ kun mi̱ chet, a̱ si̱ khwat a̱mgba̱m swuan nggu wu.

³⁸A̱gba̱ndang a̱kpi̱mi̱mi̱t a̱teap wu nang á̱ lya̱u á̱ ghai á̱ fwun A̱swang ka̱ yet A̱za̱za̱rak a̱ Swak mami A̱li Nwuat Za̱nang A̱gwaza ka a̱ni; si̱ seap ma̱ kpeak a̱ tyia̱ a̱feang neet tazwa ba̱ bai a̱byin!

³⁹A̱gba̱ndang a̱kwak a̱son á̱niet nzwang wu, a̱ yong a̱zanson Yesu ka a̱ni, si̱ li si̱sak ji nang Yesu mmat fwuo a̱ni, gu si̱ nyia̱, “A̱tsak a̱lyiat, a̱tyu wuni yet Nggwon A̱gwaza kya za̱m!”

⁴⁰Á̱nyiuk á̱ghyang ku shya̱ a̱ja, á̱ yong gbang á̱ nwuan; mami mba Sa̱lomi, ma̱ng Ma̱ryamu Ma̱ga̱daliya ma̱ng Ma̱ryamu (a̱yang Isuu ma̱ng Yakubu a̱ yet a̱shushyuo a̱ni).

⁴¹Ba̱ ku khwi Yesu neet mi̱ fam a̱byin Ga̱lili nang gu ni̱ shya̱ ma̱ng swuan. Ba̱ si̱ beang ngguu ma̱ng nta̱m. Á̱nyiuk á̱ghyang ma̱ a̱di̱di̱t ku mun á̱ nshya̱, ba̱ si̱ khwi nggu á̱ nat Urusha̱lima.

⁴²A̱tuk a̱kya yet Juma, nang á̱ ni̱ njhyi kuzang kyang á̱ fwuong a̱tuk Mam Fwung ka a̱ni. Nang jenshyung nnyia̱ a̱ni,

⁴³Isuu a̱tyu A̱ri̱matiya, si̱ gbang a̱lyia̱ a̱ si̱ nat da̱ a̱vwuo gwomna Bilatut. A̱ si̱ naai a̱ nwuak nggu kwom Yesu hu. Isuu ku yet a̱tyo nyiung mami sot a̱cha̱chet A̱yahudawa ji. A̱wot a̱ si̱ bu yet a̱tyu a̱ swan a̱ fwuong Tyok A̱gwaza hu ku bai a̱ni.

⁴⁴Gwomna Bilatut si̱ fa̱k a̱ga̱de nang Yesu ka̱n khwu a̱ni. A̱ si̱ yei a̱kwak a̱son á̱niet nzwang wu a̱ si̱ lyip gu, ke Yesu mi̱ nkai khwu.

⁴⁵Nang gu nfa̱k nkhang a̱khwu Yesu chi̱k da̱ a̱vwuo a̱kwak a̱son á̱niet nzwang wu a̱ni; a̱ si̱ nwuak Isuu kwom Yesu hu.

⁴⁶Isuu si̱ san a̱sha̱shet a̱toot, a̱ si̱ chyok ma̱ng kwom Yesu hu da̱ a̱team a̱khwu wu. A̱ si̱ gat hu ma̱ng a̱sha̱shet a̱toot wu. A̱ si̱ myiai nggu mi̱ lyak nang á̱ lung da̱ a̱fang a̱ni. A̱wot a̱ si̱ yuut a̱gba̱ndang a̱fang, a̱ si̱ nkup a̱nu lyak ka.

⁴⁷Ma̱ryamu Ma̱ga̱daliya ma̱ng Ma̱ryamu a̱yang Isuu ku yong á̱ cham ba̱ li a̱vwuo lyak ka nang á̱ myiai kwom Yesu hu a̱ni.