Read tyap Ma̱rkut 2 Bible Online

Ma̱rkut 2 - tyap bible

Ma̱rkut 2

¹Á̱ si̱ bwuo mam ma̱ chunchwiit, Yesu si̱ bu bwuok a̱ nat a̱keang Ka̱fanahum. Á̱niet ba si̱ fa̱k nkhang nang gu mbwuok a̱ bai da̱ a̱vwuo khwat nggu ka a̱ni.

²Mat a̱nia, á̱niet ma̱ a̱di̱di̱t si̱ tung á̱ hyat a̱li ka ma̱ng a̱zanunwuai ka. Da̱ mba, á̱ mbwat a̱wat bah. A̱wot Yesu si̱ shei mba A̱lyiat A̱gwaza na.

³A̱wot á̱niet a̱naai si̱ kin neet á̱ ba̱ng a̱tyu nzwan nang a̱ti̱tak ba ta̱luk a̱ni da̱ a̱gbaat.

⁴Mat á̱kpa á̱niet ka, nang ba̱ nshya̱ ntat ma̱ng a̱nggu da̱ a̱vwuo Yesu ka a̱ni bah; ba̱ si̱ nyeak tazwa nyuo ji. Ba̱ si̱ khwuk a̱kup wu, ba̱ si̱ ta̱kyak di̱di̱r ma̱ng a̱vwuo ka nang Yesu nshya̱ a̱ni. Ba̱ si̱ chyok ma̱ng a̱tyu nzwan wu ma̱ng a̱gbaat wu á̱ sak a̱byin cha̱chaat a̱zaghyi Yesu.

⁵Nang Yesu ndi si̱sak ji ba̱ nnwuak nfwuo mba na da̱ a̱nggu a̱ni, a̱ si̱ nyia̱ ma̱ng a̱tyu nzwan wu, “Nggwon nung, á̱ chi a̱ka̱tuk nyia̱ ang wu.”

⁶Á̱ghyang á̱niet mami a̱yaagwak tyiet doka Musa ba ba̱ swan a̱ja a̱ni, si̱ ta̱bat a̱di̱dam mi̱ nfwuo mba na nyia̱,

⁷“Kwot! Yihwa a̱tyu wuni ndyiat a̱nia? A̱ nyia̱ A̱gwaza lihyat hwa! A̱nyan wa maai a̱ chi a̱ka̱tuk nyia̱, kang ma̱ng A̱gwaza ma̱nyin nggu?!”

⁸Mi̱ di̱ yong a̱hwa, nang Yesu ndyen mi̱ fwuo nggu hu nkyang nang ba̱ nyia̱ a̱di̱dam mi̱ nfwuo mba na a̱ni, a̱ si̱ lyip ba, “Yihwa mbyia̱ nyi ndam a̱nia mami nfwuo nyin na?

⁹Zang huhwa yet a̱hyohyoot a̱ swak, á̱ tak kpa̱sai nyia̱, ‘Á̱ chi a̱ka̱tuk nyia̱ ang wu;’ kee á̱ nyia̱ ma̱ng a̱tyu a̱ta̱luk nkap wu, ‘Doot yong, kyiak a̱gbaat ang wu, a nkat?’

¹⁰“A̱wot ma̱ninika n na tak nyin kpa̱sai nyi ka lyen nang nung, Nggwon A̱tyubishyi, n byia̱ tyok ku maai chi a̱ka̱tuk nyia̱ mi̱ swanta hu a̱ni.” Huhwa Yesu si̱ nyia̱ ma̱ng a̱tyu nang a̱ti̱tak ba ta̱luk a̱ni,

¹¹“Fa̱k la, ta̱ngam! Doot yong a kyiak a̱gbaat ang wu a nkat a̱mali!”

¹²A̱tyu nzwan wu si̱ tat a̱ doot. A̱ si̱ kyiak a̱gbaat nggu wu, a̱ si̱ ghwut a̱ bai nta a̱zaghyi konyan. A̱mgba̱m mba konyan si̱ fa̱k a̱ga̱de. Ba̱ si̱ ta̱bat dyep A̱gwaza nyia̱, “Zi̱ ka̱n di tangka̱i kyang a̱ri̱bi̱di nang si̱ huni a̱ni bah!”

¹³Yesu si̱ ghwon Ka̱fanahum a̱ si̱ bu bwuok a̱ nat di̱n khwong a̱gba̱ndang jok Ga̱lili hu. Á̱kpa á̱niet ma̱ a̱di̱di̱t si̱ nat, á̱ si̱ shya̱ Yesu. A̱ si̱ yong mi̱ di̱ tyiet mbaa.

¹⁴Nang gu nshya̱ di̱ chong a̱ sweap a̱ni, a̱ si̱ li a̱ghyang a̱niet á̱ ngyei nggu La̱wi a̱fai A̱lfayat, nang gu shya̱ di saai kurum ga̱ndu. Yesu si̱ nyia̱ ma̱ng a̱nggu, “Doot, a khwi nung!” A̱ si̱ kin tat a̱ doot, a̱ si̱ khwi Yesu!

¹⁵Á̱ghyang á̱tuk La̱wi si̱ yei Yesu ya kyayak a̱gbang nggu. Á̱niet saai kurum ga̱ndu mbeang á̱ghyang á̱niet ma̱ a̱di̱di̱t nang á̱ ku mun á̱ kyiak ba̱ yet á̱niet a̱ka̱tuk nyia̱ a̱ni, si̱ nshya̱ di̱ ya kyayak hu ma̱ng Yesu, mbeang mman ta̱m nggu na.

¹⁶A̱wot nang a̱yaagwak tyiet doka Musa nang á̱ ngyei A̱fa̱risawa a̱ni, ndi Yesu gu ya kyayak ma̱ng á̱niet a̱ka̱tuk nyia̱ mbeang á̱niet saai kurum ga̱ndu a̱ni; ba̱ si̱ ta̱bat lyi̱ri̱m mman ta̱m nggu na, “Yihwa mbyia̱ a̱tyoli nyin wu ngya a̱ tsa a̱ nswuo ma̱ng á̱niet saai kurum ga̱ndu, mbeang á̱kum á̱niet a̱ka̱tuk nyia̱ á̱ghyang?!”

¹⁷Nang Yesu nfa̱k a̱nia a̱ni, a̱ si̱ nyia̱ ma̱ng a̱mba, “Á̱niet ba̱ shya̱ ka̱nka̱ra̱ng a̱ni, ba̱ chat a̱tyu kan bah; si̱ á̱niet nzwán bibya chat a̱tyu kan wu. Ma a̱nia wa, n bai n gyei á̱niet ba̱ kyiak á̱pyia̱ mba ba̱ yet tsotswat bya a̱ni bah. Da̱ a̱kwonu a̱kya, n bai n gyei á̱niet ba̱ lyen nang ba̱ ngyet á̱niet a̱ka̱tuk nyia̱ bya a̱ni, ba̱ ka khwi nung.”

¹⁸Di̱n jen jhyang nang mman ta̱m Yoona a̱tyu nyia̱ ba̱ptisman, mbeang A̱fa̱risawa ba̱ lak ya kyayak di̱ naai A̱gwaza a̱ni; huhwa á̱ghyang á̱niet ma̱ mba si̱ bai ba̱ si̱ lyip Yesu nyia̱, “Yihwa mbyia̱ mman ta̱m Yoona a̱tyu nyia̱ ba̱ptisman na mbeang A̱fa̱risawa ba, ba̱ ni̱ ndak ya kyayak di̱ naai A̱gwaza. A̱wot á̱si̱ nwan mman ta̱m na, nyia̱ a̱nia bah?”

¹⁹Yesu si̱ nwuak ba shim nyia̱, “Ku myim á̱kpa̱ndang a̱tyu byia̱ nyeang ba̱ lak ya kyayak mi̱ nyeang hu nang a̱tyu byia̱ nyeang wu ni̱ shya̱ ma̱ng a̱mbaa? Kaai, ku myim a̱nia bah! Ka̱ a̱tyu byia̱ nyeang wu ni̱ shya̱ ma̱ng a̱mba, ku myim ba̱ lak ya kyayak bah.

²⁰A̱wot jen na bai nang á̱ bye nkyiak a̱tyu byia̱ nyeang wu á̱ ghwon mba a̱ni. Ka̱ jen a̱ja bai, ba̱ na nwuo lak ya kyayak di̱ naai A̱gwaza.

²¹“Á̱ mbyia̱ a̱tyu a̱ na seap tyiang a̱toot swai a̱ mbeet da̱ a̱toot a̱lyen a̱ni bah! Ka̱ a̱yin nyia̱ a̱nia, tyiang a̱toot swai ji na kuut, ji̱ seap a̱toot a̱lyen wu; bwong hu ku mbeang shi hu ba̱t.

²²“Ma a̱nia wa, á̱ mbyia̱ a̱tyu a̱ na koot a̱ta̱bwai a̱fai ma̱ a̱ta̱bwai a̱lyen a̱ni bah. Kalak a̱ta̱bwai a̱lyen na na̱ guup na̱ tyia̱ za̱nzam, na̱ byian. Ku myim á̱ kyiai a̱ta̱bwai a̱fai ma̱ng a̱ta̱bwai a̱fai á̱ghyang nia.”[12]

²³A̱tuk Mam fwung A̱yahudawa a̱ghyang, Yesu ma̱ng mman ta̱m nggu na si̱ chong, a̱ si̱ nwuo ma̱ a̱byin swaat. Mman ta̱m nggu na si̱ ta̱bat chak swaat ji, á̱ shwam.

²⁴Huhwa A̱fa̱risawa ba si̱ ndyip Yesu nyia̱, “Di la! Yihwa mbyia̱ mman ta̱m ang na nnyia̱ nta̱m chak swaat, ku tyat doka Mam Fwung[13] ji a̱ni?”

²⁵Yesu si̱ nwuak ba shim nyia̱, “Nyi ka̱n fang kyang hu nang a̱gwam Da̱wuda ma̱ng á̱kpa̱ndang chyet nggu ba ku nyia̱ a̱ni baa? Nang ba̱ ku ndyin kyayak, di̱n jen nang zong ji ku nta̱bat mba a̱ni;[14]

²⁶nyi jhyung si̱sak ji nang Da̱wuda ku nnwuo mi̱ Suswak Nwuat Za̱nang A̱gwaza hu[15] di̱n jen nang A̱biyata ku ngyet a̱gba̱ndang pris wu a̱ni. A̱ si̱ ya burodi wu nang á̱ khap á̱ sak á̱ neap A̱gwaza a̱ni, a̱ si̱ nang doka ji shim konyan a̱ ya a̱ni bah; si̱ a̱tyu a̱ yet pris a̱ni.[16] Ma̱ng a̱nia, Da̱wuda si̱ ya, a̱ si̱ mun a̱ ka̱u á̱kpa̱ndang chyet nggu ba a̱ni baa?”

²⁷Huhwa Yesu si̱ nyia̱ ma̱ng a̱mba a̱ni, “A̱gwaza nyia̱ Mam Fwung hu da̱nian a̱tyubishyi kya; a̱ nyia̱ a̱tyubishyi da̱nian Mam Fwung hwa bah.

²⁸Mat a̱nia, nung Nggwon A̱tyubishyi, n gyet A̱tyoli wa ku tazwa a̱tuk Mam Fwung ka.”