Read tyap Ma̱rkut 3 Bible Online

Ma̱rkut 3 - tyap bible

Ma̱rkut 3

¹Mi̱ jen jhyang, Yesu si̱ bu nwuo mi̱ tutu a̱tung A̱yahudawa hu. A̱ja wa gu si̱ nshya̱ a̱tyu nang bwak hu khwu a̱ni.

²Huhwa á̱ghyang á̱niet ba̱ lak li Yesu a̱ni, ba̱ si̱ tyia̱ nggu á̱ghyi ba̱ li ke a̱ na choot a̱tyu nang bwak hu khwu a̱ni a̱tuk Mam Fwung A̱yahudawa ka; ba̱ ka shya̱ kyang nang ba̱ na ntyap gu a̱ni.

³Huhwa Yesu si̱ nyia̱ ma̱ng a̱tyu nang bwak hu khwu a̱ni, “Doot, a bai konyan á̱ li ang!”

⁴Yesu si̱ lyip ba nyia̱, “Yihwa doka ji shim á̱ nyia̱ a̱tuk Mam Fwung ka? Ji̱ shim á̱ nyia̱ shok ja, kee a̱ka̱tuk? Ku myim á̱ san swuan ja, kee á̱ hyat ji wa?” A̱wot á̱niet ba si̱ tyia̱ nywang.

⁵Yesu si̱ nwuan mba a̱ kaat mami a̱lyia̱ ya, ma̱ng byian nfwuo, mat lak fwuong mba hu. A̱ si̱ nyia̱ ma̱ng a̱tyu nang bwak hu khwu a̱ni, “Neap bwak ang hu!” A̱ si̱ neap bwak nggu hu, ku si̱ kin choot ka̱p!

⁶Nang A̱fa̱risawa ba ndi a̱nia a̱ni, ba̱ si̱ ghwut á̱ nat ma a̱nggang á̱ si̱ myim ma̱ng sot á̱niet, ba̱ li̱n a̱ma a̱gwam Hiridut a̱ni. Ba̱ si̱ la̱p a̱nu di̱ si̱sak ji ba̱ na nhyat Yesu a̱ni.

⁷Yesu ma̱ng mman ta̱m nggu na si̱ doot, ba̱ si̱ nat a̱beam a̱gba̱ndang jok ka. Á̱kpa á̱niet ma̱ a̱di̱di̱t si̱ khwi mba neet di̱ nfam bibyin Ga̱lili ma̱ng Yahudiya.

⁸Nang á̱kpa á̱niet ma̱ a̱di̱di̱t nfa̱k a̱mgba̱m nkyang a̱ri̱bi̱di nang Yesu nnyia̱ a̱ni, ba̱ si̱ bai da̱ a̱vwuo nggu neet di̱ fam a̱byin Idumiya, nfam bibyin a̱ma̱nyi a̱ghyui Urdun, nfam bibyin na̱ hyia̱k a̱ka̱keang Taya, Sidon, ma̱ng a̱keang Urusha̱lima a̱ni.

⁹Mat á̱kpa á̱niet ka, Yesu si̱ tak ma̱ng mman ta̱m nggu na, nyia̱ ba̱ bai ma̱ a̱nggu a̱da̱dei kukwon a̱wak a̱nyiung gu ka shya̱i, kalak á̱niet ba ba̱ du feap guu.

¹⁰Mat nang gu ka̱n choot á̱niet ma̱ a̱di̱di̱t a̱ni, huhwa á̱niet nzwán si̱ bai á̱ ghyun á̱ghyang da̱nian ba̱ ka bai kpa̱mkpaan ma̱ng a̱nggu, ba̱ ka byam gu, ba̱ choot.[17]

¹¹A̱wot kuzang jen nang á̱niet ba̱ byia̱ á̱ka̱tuk ntswá ba ndi Yesu a̱ni, ba̱ ni̱ kwa a̱byin a̱zaghyi nggu, ba̱ koot nkun nyia̱, “Nwan wa yet Nggwon A̱gwaza ka!”

¹²Ma̱ng a̱nia, Yesu ni̱ khai mba ba̱ tyia̱ nywang, ba̱ yok tak kpa̱sai a̱tyu nang gu yet a̱ni bah.

¹³Mi̱ jen jhyang, Yesu si̱ nyeak a̱ nat tazwa a̱fan. A̱ si̱ yorong á̱niet nang gu chat a̱ khai a̱ni, ba̱ si̱ bai da̱ a̱vwuo nggu.

¹⁴A̱ si̱ khai mman ta̱m swak ma̱ a̱feang, a̱ si̱ bu sak ba̱ yet a̱yaata̱m guu, da̱nian ba̱ ka shya̱ dundung ma̱ng a̱nggu; a̱wot gu bu ni̱ nta̱m mba ba̱ shei a̱lyiat nggu na;

¹⁵a̱wot gu bu nang mba tyok vwuong á̱ka̱tuk ntswá ghwut ndyo ma̱ á̱nietbishyi.

¹⁶Lyulyoot a̱yaata̱m swak ma̱ a̱feang nang gu ku khai a̱ni, huhwa hu: Siman (nggu wa nang gu ku tyia̱ a̱lyoot “Bitut” ka),

¹⁷Yakubu a̱fai Za̱ba̱di ma̱ng a̱na̱nyiuk nggu wu Yoona. (Bibya Yesu ku tyia̱ mba a̱lyoot nggan “Buwanaji̱t,” ku fa “Mman A̱gbai nza.”)

¹⁸Anda̱rawut, Filibut, Ba̱tolomi, Matyu (á̱ bu ngyei La̱wi a̱ni), Toma, Yakubu a̱fai A̱lfayat, Tadiyut, Siman (nang á̱ ngyei Za̱loti[18] a̱ni),

¹⁹ma̱ng Yahuda Iska̱riyoti (a̱tyu a̱ ku[19] yet a̱bang a̱byin wu a̱ni).

²⁰Á̱ si̱ labeang bah, Yesu si̱ nwuo a̱mali a̱ghyang, a̱wot á̱kpa á̱niet si̱ bu tung a̱ja. Ku si̱ vwuong Yesu ma̱ng mman ta̱m nggu na ya kyayak.

²¹Nang á̱na̱nyiuk Yesu ba nfa̱k a̱nia a̱ni, ba̱ si̱ doot á̱ nat ba̱ ka tyia̱ nggu gu bwuok a̱ nat a̱mali, nyia̱, “A̱tyu wuni tyia̱ tai!”

²²A̱wot á̱niet tyiet doka á̱ghyang ba̱ ku neet ma̱ a̱keang Urusha̱lima a̱ni, si̱ nyia̱, “Baalza̱but[20] a̱ yet a̱gwam á̱ka̱tuk ntswá a̱ni, nggu wa nwuo ma̱ Yesu. Ma̱ng tyok Baalza̱but hwa nang gu nkhai á̱ka̱tuk ntswá ba̱ ghwut ma̱ á̱niet!”[21]

²³Huhwa Yesu si̱ yorong mbaa, a̱ si̱ lyiat ma̱ng a̱mba di̱ kidee nyia̱, “Á̱ na nyia̱ ni wa A̱ta̱nyeang[22] ka̱ nkam A̱ta̱nyeang ka̱ ghwut ma̱ á̱niet?

²⁴Ki̱ tyok a̱byin ghai á̱ nyia̱ na̱nvan ma̱ng a̱ghyang, tyok a̱byin a̱hwa na yong bah, ku na kwa.

²⁵Ma a̱nia wa, ka̱ kyang bwak a̱li a̱nyiung ghai á̱ nyia̱ na̱nvan ma̱ng á̱ghyang ba, a̱li a̱kya na yong bah, ka̱ na kwa.

²⁶Ma a̱nia wa, ka̱ A̱ta̱nyeang[23] ka nyia̱ na̱nvan ma̱ng a̱pyia̱ nka, ka̱ si̱ gang. Ka̱ si̱ mi̱n gyong bah. Tyok nka hu tyak wa a̱wa.

²⁷“A̱tsak a̱lyiat, a̱yin si̱ mi̱n nwuo mali a̱tyu byia̱ chet[24] a̱ kwok gu nkyang a̱ nkat ndyo bah; si̱ nang gu ya nda̱p a̱tyu byia̱ chet wu. Huhwa gu na nshya̱ a̱wat gu na nkwok nkyang na na̱ shya̱ a̱mali a̱tyu byia̱ chet ka a̱ni, a̱ nkat ndyo.

²⁸“N tak nyin a̱tsak a̱lyiat, á̱ na chi kuzang a̱ka̱tuk nyia̱ ma̱ng lihyat nang a̱tyubishyi nyia̱ A̱gwaza ndyo a̱ni.

²⁹A̱wot konyan wa nyia̱ A̱za̱za̱rak Ntswa A̱gwaza wu lihyat a̱ni, á̱ si̱ mi̱n mak chi a̱ka̱tuk nyia̱ nggu wu bah. A̱tyu a̱wa nyia̱ a̱ka̱tuk nyia̱ nang á̱ na chi a̱ni bah, si̱ nat sang sangba̱p.”

³⁰Yesu ku hyia̱ ma̱ mba a̱lyiat nani, mat nang ba̱ jhyuai gu nyia̱, “Yesu byia̱ a̱ka̱tuk ntswa wa!”

³¹Di̱n jen a̱ja a̱yang byin ma̱ng á̱na̱nyiuk Yesu si̱ bai á̱ ba̱ yong a̱ta̱usa. Ba̱ si̱ ta̱m a̱yin a̱ yorong ngguu.

³²Á̱kpa á̱niet ka ba̱ swan á̱ tyong Yesu á̱ keang a̱ni, ba̱ si̱ nyia̱ ma̱ng a̱nggu, “Di, a̱yang byin ang wu ma̱ng á̱na̱nyiuk ang ba shya̱ a̱ta̱usa ba̱ chat ba̱ li ang!”

³³Huhwa Yesu si̱ lyip ba nyia̱, “A̱nyan wa yet a̱yang byin nung wu ma̱ng á̱na̱nyiuk nung ba?”

³⁴Yesu si̱ nwuan á̱niet ba̱ swan á̱ tyong gu á̱ keang a̱ni, a̱jawa gu nyia̱ ma̱ng a̱mba, “Di, a̱tsak a̱yang byin nung wuwa wu, ma̱ng á̱tsatsak á̱na̱nyiuk nung bibya ba!

³⁵Konyan wa khwi kyang nang A̱gwaza chat a̱ni, nggu wa yet a̱na̱nyiuk nung a̱sam, ma̱ng a̱nap, ma̱ng a̱yang byin nung wu.”