Read tyap Ma̱rkut 4 Bible Online

Ma̱rkut 4 - tyap bible

Ma̱rkut 4

¹Yesu si̱ bu nwuo tyiet a̱beam a̱gba̱ndang jok Ga̱lili. Á̱kpa á̱niet ka si̱ tung ba̱t, ba̱ si̱ feap guu. Ku si̱ tyia̱ a̱ si̱ nwuo kukwon a̱wak hu, a̱ si̱ swan mami, a̱ si̱ shya̱i nang á̱niet ba shya̱ di̱n khwong a̱gba̱ndang jok hu.

²A̱ si̱ tyiet mba nkyang ma̱ a̱di̱di̱t di̱ kidee, ma̱nang si̱ jini a̱ni, nyia̱,

³“Nyi myiai a̱fufwuo nyi fa̱a̱k! A̱tyu khap a̱ghyang wa nat nai zwá yak.

⁴Nang gu nshya̱ di̱ nai hu a̱ni, zwá jhyáng si̱ kwa̱i di̱ gak. A̱ka̱man si̱ bai na̱ si̱ tang.

⁵“A̱wot zwá jhyáng si̱ kwa̱i da̱ a̱vwuo kukwaak. Ji̱ si̱ ta ma a̱nfaan, mat a̱vwuo ka byia̱ mbyin gba̱mgbam bah.

⁶A̱wot nang mam ntat jenjai a̱ni, yak hu si̱ shyuk, mat á̱ni̱nan ba nwuo a̱byin shansham bah.

⁷“Zwá jhyáng si̱ kwa̱i mi̱ sa̱kan. Nang sa̱kan ji ndaai a̱ni, ji̱ si̱ feap, ji̱ si̱ ta̱fa̱k yak hu, ku si̱ lak tyia̱ tswá ji.

⁸“Zwá jhyáng si̱ kwa̱i di̱n tyan ji ji̱ byia̱ bwum a̱ni. Ji̱ si̱ ta, ji̱ si̱ laai, ji̱ si̱ tyia̱ tswá gba̱mgbam; tswá jhyáng si̱ yet nswak ti̱ntat, jhyáng nswak a̱tataa, jhyáng meang ji̱ si̱ yet chyi chyi.”

⁹Yesu si̱ nyia̱, “Konyan wa chat lyen a̱ni gu myiai a̱fufwuo gu fa̱a̱k!”

¹⁰Jen nang Yesu nshya̱ ma̱nyin gu ma̱ng mman ta̱m nggu na swak ma̱ a̱feang mbeang á̱ghyang á̱niet ba̱ khwi gu a̱ni, ba̱ si̱ lyip gu kyang nang gu fa ma̱ng kidee jini a̱ni.

¹¹A̱ si̱ nyia̱ ma̱ng a̱mba a̱ni, “Nyin bya á̱ shim á̱ tyai nyin a̱chuchuk a̱ shya̱ di̱ niat tazwa Tyok A̱gwaza hu a̱ni, nyi fi̱k. A̱wot á̱kum á̱niet ba̱ shya̱ zan ma̱ng a̱nyin a̱ni; kuzang kyang á̱ na tak mba hu di̱ kidee ja.

¹²“Mat ma̱nang A̱lyiat A̱gwaza na nhyia̱ a̱ni, ‘Ba̱ na nwuan, a̱wot ba̱ na li bah. Ba̱ na fwuong, a̱wot da̱ mba, ba̱ na fi̱k bah. Kalak ka̱ ba̱ fi̱k kuzang nkyang, ba̱ na ghwon a̱ka̱tuk nyia̱ mba wu, ba̱ khwi A̱gwaza, A̱gwaza a̱ chi a̱ka̱tuk nyia̱ mba wu.’ ”

¹³Huhwa Yesu si̱ nyia̱ ma̱ng a̱mba a̱ni, “Nyi fi̱k kidee jini baa? Nyi na nyia̱ ni wa nyi nfi̱k kidee jhyáng?

¹⁴A̱tyu nai zwá yak a̱wa, li nang a̱tyu shei a̱lyiat A̱gwaza wa a̱ni.

¹⁵“Gak hu nang zwá yak ji nkwa̱i a̱ni,[25] huhwa yet kidee nfwuo á̱niet ba̱ fa̱k a̱lyiat A̱gwaza na a̱ni. A̱wot da̱ a̱bada̱dei njen, nang ba̱ nfa̱k na a̱ni, A̱ta̱nyeang[26] ka si̱ bai ka̱ si̱ ta̱wap A̱lyiat A̱gwaza na, nang á̱ nai mi̱ nfwuo mba na a̱ni. Ka̱ si̱ ghwon mbaa.

¹⁶“Kukwak hu nang zwá yak ji nkwa̱i a̱ni,[27] huhwa yet kidee nfwuo á̱niet ba̱ fa̱k A̱lyiat A̱gwaza na a̱ni; ba̱ si̱ san naa ma̱ng a̱gwai da̱ a̱ka̱nyiung.

¹⁷A̱wot nang A̱lyiat A̱gwaza na mbyia̱ á̱ni̱nan ba̱ nwuo á̱ nat gbang mi̱ nfwuo mba na a̱ni bah, ba̱ si̱ mi̱n dabeang mi̱ khwi hu bah. Ki̱ swuo a̱bung ba̱ bai, ku á̱ ya̱shuk baa mat A̱lyiat A̱gwaza na, ba̱ na bwuok lilyim ma a̱nggang.

¹⁸“A̱wot tyan sa̱kan ji nang zwá yak ji nkwa̱i a̱ni,[28] jija yet kidee nfwuo á̱niet ba̱ san A̱lyiat A̱gwaza na;

¹⁹a̱wot a̱fi̱fa swanta wuni, shyuo kurum ji̱ laai mba a̱ni, ma̱ng nkyang jhyang si̱ nwuo mi̱ nfwuo mba na. Nkyang nani si̱ feap A̱lyiat A̱gwaza na, na̱ si̱ tyia̱ a̱tan tswá bah.

²⁰A̱wot a̱tsatsak a̱byin wu a̱ byia̱ bwum hu nang á̱ nnai zwá yak ji a̱ni,[29] kikya yet kidee nfwuo á̱niet ba̱ fa̱k A̱lyiat A̱gwaza na; ba̱ si̱ san naa, ba̱ si̱ nnyia̱ nta̱m, na̱ si̱ tyia̱ tswá ba̱t. Jhyáng si̱ yet nswak ti̱ntat, jhyáng nswak a̱tataa, jhyáng si̱ yet chyi chyi.”

²¹Yesu si̱ nyia̱ ma̱ng a̱mba a̱ni, “A̱tsak a̱lyiat, nyi ni̱ tyia̱ long hu mi̱ fi̱tila, nyi kup ma̱ng a̱dam wa kee, nyi ni̱ sak ji tafa a̱tyii kya? N wa ngyei nyi ni̱ sak ji tazwa a̱tyii kya, ji̱ ka sai a̱vwuo kaa?

²²Kyang hu ku shya̱ di̱ niat a̱ni, á̱ bye tyai huu. A̱wot si̱ hu nang á̱ kup a̱ni, á̱ na khwuk hu á̱ ghwon kpa̱sai.

²³Konyan wa chat lyen a̱ni, gu myiai a̱fufwuo gu fa̱a̱k!”

²⁴Yesu si̱ bu nyia̱ ma̱ng a̱mba a̱ni, “Nyi myiai a̱fufwuo nyi fa̱k shansham! Si̱sak ji nang a myiai a̱fufwuo a̱ni, a̱nia wa a na nfi̱k shansham; a̱wot á̱ na mbeang ang lyen.

²⁵A̱tyu a̱ fwuong nung shansham a̱ni, a̱ na fi̱k a̱ mbeang. A̱tyu da̱ a̱ fa̱k nung shansham a̱ni bah, ku a̱bada̱dei kyang nang gu fa a̱ fi̱k a̱ni, á̱ na san ka á̱ ghwon guu.”

²⁶Yesu si̱ bu nyia̱ ma̱ng a̱mba a̱ni, “A̱ni wa nang Tyok A̱gwaza hu ndi; ku li nang a̱tyu a̱ nat nai zwá yak ma̱ a̱byin a̱ni.

²⁷Á̱ kwai á̱ doot, zwá yak ji̱ si̱ ta, ji̱ si̱ laai. Da̱ a̱nggu, a̱ lyen si̱sak ji á̱ nnyia̱ a̱ni bah.

²⁸Mbyin na ma̱ á̱pyia̱ na ni̱ tyia̱ ku tyia̱ sum. Di̱ ntsa hu a̱ka̱kung na ta á̱ ghwut; feang hu ku chyip a̱ka̱fa; di̱ ngaan hu ku ti̱n dudung, a̱wot ku tyia̱ tswá.

²⁹Ki̱ jen nang yak hu mbyang a̱ni nyia̱, da̱ a̱ka̱nyiung a̱tyu khap hu na kyiak a̱la̱unjhyi, gu nwuo chak hu. Mat jen chak ji nyia̱.”

³⁰Yesu si̱ bu nyia̱, “Yihwa zi̱ na ntyan Tyok A̱gwaza hu? Kee zang kidee ja, zi̱ na ntak hu kpa̱sai?

³¹Ku li nang tswa mustat nang á̱ ti̱p ma̱ a̱ti̱tam a̱ni; ji ja yet a̱bada̱dei ka a̱mgba̱m mi̱ zwá nkyang ji mi̱ swanta hu.

³²“A̱wot ka̱ á̱ ti̱p jii, ji̱ si̱ laai, ji̱ tyia̱ a̱gba̱ndang a̱kwon a̱ swak á̱kum a̱ka̱kwon ka mi̱ ti̱tam hu. Ji̱ bu tyia̱ a̱cha̱chet mbwak nang a̱ka̱man na bai na̱ ntat a̱ka̱le mi̱ shyishyim mbwak ji a̱ni.”

³³Di̱ kidee ja ma̱ a̱di̱di̱t nang Yesu ntyiet mba A̱lyiat A̱gwaza na, ma̱ cha̱chaat nang ba̱ na nfi̱k na a̱ni.

³⁴Kang mi̱ kidee ji, a̱ ku lyiat ma̱ng a̱mba bah. A̱wot jen ji gu nshya̱ ma̱nyin gu ma̱ng mman ta̱m nggu na a̱ni, a̱ ni̱ wa̱i mba kidee ji kpa̱sai.

³⁵Jenshyung a̱tuk a̱kya, Yesu si̱ nyia̱ ma̱ng mman ta̱m nggu na a̱ni, “Nyi bai, zi̱ wak byia̱k a̱gba̱ndang jok wu. Zi̱ nat a̱ma̱nyi keniaau.”

³⁶Nang ba̱ n ghwon á̱kpa á̱niet ka a̱ni, ba̱ si̱ nwuo kukwon a̱wak hu, ba̱ si̱ nkat. A̱mgba̱m ma̱ng a̱nia, a̱kukwon a̱wak á̱ghyang si̱ khwi ngguu.

³⁷Á̱ si̱ labeang bah, wun si̱ kin hyap mi̱ chet ma̱ fuu da̱ a̱ka̱nyiung! Ywan a̱sa̱khwot hu si̱ kin tsot kukwon a̱wak hu, ku si̱ nwuo nhyaai á̱ mban ma̱ng a̱sa̱khwot na. Ku si̱ nwuo ya̱lyi̱ri̱p!

³⁸Nang Yesu shya̱ ma̱ lyim kukwon a̱wak ka a̱ khat nda a̱ sak a̱pyia̱ ka di̱ kyang saai a̱pyia̱ hu; mman ta̱m nggu na si̱ shyip guu. Ba̱ si̱ nyia̱ ma̱ng a̱nggu a̱ni, “A̱tyu tyiet, a dam baa, zi̱ na kwi ma̱ a̱sa̱khwot?!”

³⁹Nang gu nshyip a̱ni, a̱ si̱ doot a̱ si̱ kam wun hu, a̱ si̱ nyia̱ ma̱ng ywan a̱sa̱khwot hu, “Yong, tyia̱ nywang!” A̱jawa wun hu si̱ kin tyia̱ bobwak, a̱wot a̱mgba̱m a̱vwuo ka si̱ kin tyia̱ lyot!

⁴⁰A̱wot Yesu si̱ nyia̱ ma̱ng mman ta̱m nggu na a̱ni, “Yihwa mbyia̱ nang nyi nfa̱k a̱wun na a̱nia? Ba̱ng ba̱ tat a̱fwun, nyi ka̱n nwuak fwuo da̱ nung baa?”

⁴¹Ba̱ si̱ fa̱k a̱wun ba̱t. Ba̱ si̱ nwuo lyi̱ri̱m á̱ghyang mba nyia̱, “A̱nyan wa lili huni? Hat nang wun ma̱ng ywan a̱sa̱khwot nfwuong khai nggu hu!”